Isaia 55 - Buki Tabu Lowaenei 1919‘UPWA 55. 1 Ie, iauiaumi tona‘ami ‘i iapasa, wa da mai boasi ‘edia, ta tauna nigea ‘ina manimo; wa da ma, wa da gimwani, wa da ‘e‘ai; tamo, wa da mai, oine be susu wa da gimwani ta nigea maniega ta nigea e‘isega. 2 To‘ase manuna mani wa loegumwarina iage nigea masura manuna? ta ‘imi guinua iage nigea ‘i loema‘emi manuna? ‘eguia wa da nono‘i‘isi, ta iage ‘i bobo‘ana wa da ‘e‘ai, ta iaruiaruami wa da tagwara be ‘i guausoara iapa ‘enaia. 3 Wa da enonotenasi, ta ‘eguia wa da mai; wa da nono, ta iaruiaruami ‘i da bobo‘ana: ta ona‘upa‘upa ‘ataia ia da bubu ma‘emi, tuga Dabida ‘ina nua‘ole‘ole ‘ai‘ailidi. 4 Wa ‘ita, ni‘atu ia ‘ebwaea‘ena to ‘ita tomota ‘edia, to nugana be to loina tomota ‘edia. 5 U ‘ita, ‘ebeloina nigea ‘u mwaramwaratoni ‘u da bwauiena, ta ‘ebeloina ‘e bweuna nigea ‘i mwaratoniio ‘i da pili ‘emuia, Ieoba ‘imu Eaubada manuna, ta Iseraela ‘ina Tabu Tebweuna manuna; ni‘atu i ‘awaeseesemu ta ‘enega. 6 Ieoba wa da ‘ebesa ‘ena ‘u da loba, wa da bwauiena ‘ena ‘i serabemia: 7 To to‘umalina ‘ina ‘eda ‘i da pilisinena, ta tai nigea bubuna paruparu ‘ina nuanua: ta Ieoba ‘ena ‘i da ‘ilama, ta ‘i da ‘atenua‘ole‘oleiena: ta ‘ida Eaubada ‘ena, tauna to‘umalina ‘i da giekweu ‘ai‘ailina ta ‘enega. 8 ‘Igu nuanuaiao nigea ‘imi nuanuaiao ta ‘enega, nai ‘imi ‘edao ‘igu ‘edao, Ieoba ‘i gwae. 9 Nadigega garewao si lo‘etana wawasae bare‘u ‘ena, nadigega ‘igu ‘edao si lo‘etana wawasae ‘imi ‘edao ‘edia, ta ‘igu nuanuaiao ‘imi nuanuaiao ‘edia. 10 Nadigega ta ‘enega ‘usana ‘i mwa‘utama ta sinou garewega, ta nigea ‘ena i ‘ila, ta bare‘u ‘i giepwasena, ta ‘i bubuna be ‘i tabwa ta ‘i bwasila, ta ‘atuna i ‘ebwaea to lelewana ‘ena ta masura to ‘e‘ai ‘ena; 11 Nadigega ‘igu ona tauna ‘awaguiega ‘i apwesa: gea‘abo ‘i da ‘ila daita ‘eguia, ta iage ia nuanuana ‘i da guinua, ta iage ‘ena ia etunena ‘i da loeposeana ‘enaia. 12 Ma‘imi guausoara wa da apwesawa ta ‘enega, ta si da ‘au‘ewemi guguiega: ‘oea sinabwadi ta ‘oea gidaridi si da weari matamia wariwariega, ta mitawa ‘ina kaiwe iauiauna nimadi si da pwasi. 13 Kaiwe saiperesa ‘i da tabwa kwakwakwara ‘ana lopa‘eru, ta kaiwe saido ‘i da tabwa kaiwe dakadakana ‘ana lopa‘eru: ta ‘i da esana manuna Ieoba ‘enaia, we‘iwe‘iiaia ‘ataia nigea si da ‘upwa iaulena manuna. |
Published by the British and Foreign Bible Society in 1919
British & Foreign Bible Society