Isaia 54 - Buki Tabu Lowaenei 1919

‘UPWA 54.

¹ ‘U da wari, Oio megagariio, ‘oio nigea ‘u enatuna; ‘u da weari wari ‘ena, ta ‘u da bwau toila, ‘oio nigea ‘u edaedadama goama manuna: to miawaborebore natunao si iauwawasae ta ‘enega to ai mewainena natunao ‘edia, Ieoba ‘i gwae.

² ‘Imu anuanaia ‘ana esena ‘u da giebababa ta ‘imu ‘ebemia ‘ana ‘aubodakaleko si da lisidiwa: gea‘abo ‘u egaegagare: ‘imu barae ‘u da gieduduridi, ta ‘imu ‘ora ‘u da giepa‘aridi.

³ ‘U da sasaila ‘ataimuiega ta gegeumiioega ta ‘enega; ta tubumuao ‘ebeloinao si da ‘ewedi, ta ‘asa waborebore tomota ‘edia si da sa‘u.

⁴ Gea‘abo ‘u matauta; gea‘abo ‘u da omaiamaia ta ‘enega: nai nuaio ‘i da owana; gea‘abo ‘amu omaiamaiamo ta ‘enega: ‘imu tuta gomagweine ‘ina omaiamaia ‘u da nuapupure ta ‘enega, ta ‘imu tuta ‘oabura ‘ana ‘ebesinara gea‘abo wate ‘u da nua‘i‘isina.

⁵ ‘Amu Tomwerurua mwaneio ta ‘enega: bodao ‘idi Ieoba ‘ana esana: ta Iseraela ‘ina Tabu Tebweuna tauna ‘amu to‐‘ewalimana; si da eesena bare‘u maibo‘ana ‘ina Eaubada.

⁶ Ieoba ‘i bwauiemu na‘ieana to‐aimewainena e‘idi‘idiena ta ‘ate‘uia‘uia ta ‘enega, tuga to‐aimewainena megoamana, ‘ena si e‘idi‘idiena, ‘imu Eaubada ‘i gwae.

⁷ Tuta tomwana gidarina ia e‘idi‘idiemu ta ‘enega; ta nua‘ole‘ole sinabwadi ‘ediega ia da egogoneio.

⁸ Egamwagamwagu maa‘apu‘apu ‘ena maninigu ia kwaiena ‘emuiega tuta tomwanega; ta oboboma mia ‘ataiega ia da ‘atenua‘ole‘oleio, Ieoba ‘amu to ‘ewalimana ‘i gwae.

⁹ Gete nadigega Noa ‘ana boasiao ‘eguia ta ‘enega: nadigega ia ona‘upa‘upa ni‘atu ta ‘enega ‘aene Noa ‘ana boasiao gea‘abo wate bare‘u si da bodena, nadigega tuga ni‘atu ia ona‘upa‘upa ‘aene gea‘abo ia da gamwasoara ‘emuia, nai ia da ba‘eio.

¹⁰ ‘Oea sinabwadi si da sawara ta ‘enega, ta ‘oea gidaridi si da tauia: ta ‘igu oboboma gea‘abo ‘i da pilisineio, nai ‘igu ona‘upa‘upa guguia ‘i da tauia, Ieoba tauna i ‘atenua‘ole‘oleio ‘i gwae.

¹¹ ‘Oio ‘elo‘uiaio, wedilia i ‘ula tu‘eieio, ta nigea ‘imu guausoaramo, u ‘ita, ‘imu gurewao ia da sa‘u mena‘arega, ta ‘imu ‘autuiao sapairega.

¹² Ta ‘imu winidou ia da bubudi gurewa‐bweabwearidi ‘ediega, ta ‘imu ‘eberugu gurewa‐tuiaiara ‘ediega, ta ‘imu tupitupi maibo‘ana gurewa ‘adi ‘ita bobo‘ana ‘ediega.

¹³ Ta natumuao iauiaudi si da Ieoba ‘ina disaipeliao; ta natumuao ‘idi guguia ‘i da sinabwara.

¹⁴ Bubuna paruparuiega ‘u da mia pa‘ara: didigega ‘u da mia ‘edasora, gea‘abo ‘u da matauta ta ‘enega; ta ‘ebedidigega, gea‘abo ‘i da mai serabemuia ta ‘enega.

¹⁵ U ‘ita, si da deriegogona nai ta nigea ‘eguiega: taudi si egogona matamuia, si da be‘u manuio.

¹⁶ Wa ‘ita, tobubu‐kainumu ia mweruruina tauna kebwanigita ‘ara‘arata ‘i loweniwenini, ta ‘ebeguinua i ‘ewenama ‘ina guinua manuna; ta to mudara ia mweruruina sabi giesaoora.

¹⁷ Nigea ‘e bweu ‘ebesaia si bubu manuio ‘i da bobo‘ana; ta meia ‘e bweuna ‘e bweuna ‘i tooro manuio etara ‘ena ‘u da ‘awato‘umaliena. Gete Ieoba ‘ina to‐guinuao ‘idi ‘egu‘eguia, ta ‘idi bubuna paruparu tauna ‘eguiega, Ieoba ‘i gwae.