Isaia 53 - Buki Tabu Lowaenei 1919

‘UPWA 53.

¹ Iaita ‘ida tetera ‘i iarena? ta iaita ‘ena Ieoba nimana ‘i apwesa?

² Matanaia ‘i tabwa ‘atua kaiwe nuana ta ‘enega, ta ramu ‘atua bwa‘a iadaiada ‘enega: nigea ma‘oonamo nai ‘ana ‘ita bobo‘ana; ta ‘ena ta ‘itena, nigea ‘e bweu ‘ana ‘ita bobo‘ana be ta da nuanuana.

³ Tai si sinarina, ta si e‘idi‘idiena; tai ma‘ina dedoi, ta ‘ate‘uiauia ‘i mwaratoni: ta nadigega ‘e bweu ‘enega tai si mia sana‘ila si sinarina, ta nigea ta ‘amaiabena.

⁴ ‘Ida ‘ate‘uia‘uia i ‘a‘ara ‘ai‘ailidi, ta ‘ida dedoi i ‘a‘aridi: ta ‘esinuena ‘aene unuunuina, esilae Eaubada ‘enega, ta elo‘uia.

⁵ Ta ‘i e‘abiiama ‘ida li‘oa‐loina manudi, i ‘aue‘umula ‘ida bubuna bokobokodi manudi: ‘ida guguia ‘ana unua ‘ena ‘i miami; ta ‘ana sapiao ‘ediega ta bobo‘ana limana.

⁶ Iauiauda sipi ‘atua ni‘atu ta tauia gesi; ‘abo‘ada ni‘atu ta sana‘ila ‘e bweuna ‘e bweuna tauna ‘ina ‘eda ‘enaia; ta Ieoba ‘ida bubuna bokobokona iauiauda ni‘atu ‘ena ‘i sa‘u.

⁷ Si ununa, ta ‘i gimwa‘utena taunamo ta ‘awana nigea i ‘ebarina; ‘atua lami si ‘au‘ewena esilae ‘ena, ta ‘atua sipi ‘ana to‐‘upwa matadia nigea ‘i da ona; tamo, ‘awana nigea i ‘ebarina.

⁸ ‘Ebedidiga ta etara ‘ediega si tauiena; ta ‘ana epata manuna, iaita ‘ediega ‘i nuena ‘aene si ‘upwa iaulena maiawasidi ‘idi asega? ‘igu tomota ‘idi li‘oa‐loina manuna ‘i esilae.

⁹ Ta ‘ana ‘ari‘ari si bubuna to to‘umalidi ma‘edi, ta to esaesa ma‘edi ‘ina mwawasa ‘enaia; nadigega tuga ta nigea ‘e bweu iage toila ‘i guinuena, nai ‘e bweu kabo ‘awanaia ‘i miami.

¹⁰ Ta Ieoba nuana ‘i da ‘aue‘umulina; ‘ana ‘ateuiauia ‘i sa‘ui: ‘ena iaruiaruana ‘u bubuna be i ‘ebwaeadaita loegesi manuna, tubuna ‘i da ‘ita, ‘ana asiatao ‘i da gieduduri, ta Ieoba ‘ina ‘ebeguausoara ‘i da loeposeana nimanaia.

¹¹ Iaruiaruana ‘ina edadama ‘i da ‘ita, ta sawesawenaia: ‘ina sinasinapuiega ‘igu toguinua paruparu iauiaudi ‘i da ‘awaparuparuiedi: ta ‘idi bubuna bokobokodi ‘i da ‘a‘ara.

¹² Ta ‘enega tomwana ia da ‘eguiai‘ena mesinabwadi ma‘edi, ta tauna gwegwe‘oae ‘i da ‘eguiai e‘ewaiwaidi ma‘edi; iaruiaruana ‘i siwena mwawasa ‘enaia ia ‘enega, ta si sawena to li‘oa‐loina ma‘edi: ta iauiaudi ‘idi loegesi i ‘a‘ara, ta ‘i sidasida to li‘oa‐loina manudi.