Isaia 52 - Buki Tabu Lowaenei 1919

‘UPWA 52.

¹ ‘U da tooro, ‘u da tooro, ‘imu waiwai ‘u da ‘otena, Siona ie; ‘amu ‘oama ‘adi ‘ita bobo‘ana ‘u da ‘otedi, Ierusalema ie, ‘asa tabu: gete ‘enega ta muriega gea‘abo wate taudi nigea si lodaba ta nigea si ‘esasena ‘emuia si da rugu ta ‘enega.

² Kauiega ‘u da giniuieio tauio; ‘u da tooro, ‘u da miatoa, Ierusalema ie: ‘otoio ‘ana ‘ebepaimiao ‘ediega ‘u da li‘amiio, ‘oio Siona natuna mewainena ioniionina.

³ Gete nadigega Ieoba ‘i gwae ta ‘enega, Si gimwanidaisiio ta ‘enega; ta ia da ‘au‘ewalimeio ta nigea maniega.

⁴ Gete nadigega ‘Inapwana Eaubada ‘i gwae ta ‘enega, ‘Igu tomota nugana si mwa‘uta Aigupito ‘ena sabi miabaula ‘enaia: ta goma Asiria ‘i didiga daisidi.

⁵ Gete ‘enega, to‘ase ia guinua gete, Ieoba ‘i gwae, ‘igu tomota si ‘au‘ewa daisidi ta ‘enega? Taudi si loinedi si bwaubwau didiga, Ieoba ‘i gwae, ta ‘agu esana asiata maibo‘ana si ‘ina‘inana besobeso ‘ataia.

⁶ Ta ‘enega ‘igu tomota ‘agu esana si da mwaratoni: ta ‘enega asiata gote ‘enega si da mwaratoni ‘aene ‘abo‘agu tauna ‘i onaona; wa ‘ita, ‘Abo‘agu.

⁷ Tauna tetera bobo‘adi ‘i me‘edi ‘aena bobo‘ai‘ailidi ‘oeao ‘edia, tauna guguia ‘i etetera, tauna bobo‘ana ‘ina tetera bobo‘adi ‘i me‘edi, tauna ‘etoseana ‘i guguiaei; tauna Siona ‘ena ‘i ona, ‘Imu Eaubada ‘i loiloina!

⁸ To ‘ita‘i‘isiao ‘enadi! si onaona toila, si wariwari rererea; si da ‘ita ta ‘enega, e‘awatanesinesi, ‘ena Ieoba i ‘ilama Siona ‘enaia.

⁹ Guausoara ‘enega wa da weari, wa da wari rererea, ‘omi Ierusalema ‘ina esena waborebore: Ieoba ni‘atu ‘ina tomota ‘adi guausoara ‘i sa‘u ta ‘enega, Ierusalema ni‘atu i ‘ewalimena.

¹⁰ Ieoba ni‘atu nimana tabu ‘ana ‘oama ‘i lolona ‘ebeloina iauiauna matadia; ta bare‘u ‘ana ‘ebelosaroni iauiauna ‘ida Eaubada ‘ina ‘etoseana si da ‘ita.

¹¹ Wa da tauiawa, wa da tauiawa, gote ‘enega wa da apwesawa, gea‘abo ‘e bweu iage baila wa da gitoo; gamwagamwaninega wa da tauiawa; wa da ‘esasena, ‘omi Ieoba ‘ina keigao wa ‘a‘aridi.

¹² Gea‘abo wa da apwesa manini ta ‘enega, nai wa da tauia denega: Ieoba ‘i da tauia nuganemi ta ‘enega; ta Iseraela ‘ina Eaubada ‘i da ‘imi to egogona muria.

¹³ Wa ‘ita, ‘igu toguinua ‘i da bubu ‘ai‘aila, ‘i da lo‘etana ta ‘i da miatu‘e, ta ‘i da to lo‘etana sana.

¹⁴ Nadigega iauiaudi nuadi ‘i owana ‘emuia, (maninina ‘i sawara ta tai nigea ‘e bweu nadigega, ta oona wate ta tai natudiao me‘olotodi nigea nadigega,)

¹⁵ Nadigega ‘ebeloina iauna ‘i da loseuseulidi; kiniao ‘awadi si da gibode manuna: iage nigea si etetera ‘edia si da ‘ita ta ‘enega; ta iage nigea si nonona si da mwaratoni.