Isaia 51 - Buki Tabu Lowaenei 1919

‘UPWA 51.

¹ ‘Eguia wa da nono, ‘omi bubuna paruparu wa muria, ‘omi Ieoba wa ‘ebesa: gurewa ‘enega si taimi ‘ena wa da ‘ita, ta gaula ‘arena ‘enega si salemi.

² Aberaamo tamami ‘ena wa da ‘ita, ta sinami Sara ‘enaia; ‘ena tauna ‘e bweunamo ia bwauiena ta ‘enega, ta ia ona obobomena, ta ia gieiauiena.

³ Ieoba Siona ‘ana guausoara ‘i sa‘u ta ‘enega: ‘ina esena waborebore iauiaudi ‘adi guausoara ‘i sa‘u, ta ‘ina mitawa ‘i bubuna Edena nadigega, ta ‘ina kaukaudaisinamo nadigega Ieoba ‘ina bagura; guausoara ta ‘uiawana si da lobedi ‘enaia, lotuputupu, ta wari ‘ai‘aila ‘enana.

⁴ ‘Omi ‘igu tomota, ‘eguia wa da sana‘ilama; ‘Oio ‘igu ‘asa, ‘eguia ‘u da enonotenasi: loina ‘i da tauiawa ‘eguiega ta ‘enega, ta ‘igu etara ia da sa‘u ‘ai‘aili tomota ‘idi ma‘edana manuna.

⁵ ‘Igu bubuna paruparu ‘i serabenaia, ‘igu ‘etoseana ‘i apwesa, ta nimaguao tomota si da loinedi; saruiao si da iamwaiamwa manugu, ta nimagu ‘ena si da ‘emisa.

⁶ Wa da ‘ita tu‘e garewaia, ta bare‘u lo‘ubuna ‘ena ‘u da dune: garewao si da sawara ‘asu ‘atua, ta bare‘u ‘i da kadekaderi ‘oama ‘atua, ta taudi ‘ena si miami si da mwawasa nadigega: ta ‘igu ‘etoseana ‘i da mia ‘ataia, ta ‘igu bubuna paruparu gea‘abo ‘i da sawara.

⁷ ‘Eguia wa da nono, ‘omi bubuna paruparu wa mwaratoni, ‘omi tomota ‘igu loina ‘atemia ‘i miami; tai ‘idi ba‘e gea‘abo wa matautena, nai wa da ‘atesa‘ara ‘idi eliao manudi.

⁸ Sarasara ‘i da ‘enidi ‘oama nadigega ta ‘enega, ta didimwana ‘i da ‘enidi wula nadigega: ta ‘igu bubuna paruparu ‘i da mia ‘ataia, ta ‘igu ‘etoseana epata‐tomota iauiauna ‘edia.

⁹ ‘U da tooro, ‘u da tooro, waiwai ‘u da ‘otena, Ieoba nimana ie; ‘u da tooro, ‘atua gimi asiatao ‘edia, gimi tutao ‘idi epata‐tomota. Nigea ‘oio nai tauna Raaba i ‘upwa tomwatomwa, tauna waregoa ‘i badi be ‘i sasa‘a?

¹⁰ Nigea ‘oio nai tauna ora ‘i gieiapasa, ni‘u sinabwana ‘ina ora; tauna ora ‘ina ni‘u ‘i bubuna be ‘eda ‘enega li‘ali‘amidi si taona?

¹¹ Ta Ieoba ‘ina li‘ali‘amidi si da ‘ilama, ta Siona ‘ena si da mai wariwariega; ta guausoara ‘ataia debadia ‘i da miami: guausoara ta ‘uiawana si da ‘ewa, ta dedoi be eiawasilagalaga si da dena.

¹² ‘Abo‘agu, tuga ‘Abo‘agu, taugu ia gieguausoarimi: iaita ‘oio, ‘u matauta tai ‘i da mwawasa manuna, ta tai natuna ‘i da enedu ‘atua manuna;

¹³ Ta Ieoba ‘amu Tomwerurua ‘u nuapupurena, tauna garewa ‘i neasidi ta bare‘u ‘ina ‘autu ‘i sa‘udi; ta ‘u matauta ‘ataia asiata maibo‘anega to didiga ‘ina egamwagamwagu didiga manuna, ‘ena ‘i abe ‘i giesaoora? ta to didiga ‘ina egamwagamwagu didiga mane?

¹⁴ To mia apwesa ioniionina ‘i da li‘ami manini: ta gea‘abo ‘i da mwawasa be ‘i mwa‘uta gaulaia, nai ‘ina masura ‘i da gumwara.

¹⁵ ‘Abo‘agu Ieoba ‘imu Eaubada ta ‘enega, tauna ora ‘i ilia, be ‘enega lisuna si dududu: ‘Ana esana bodao ‘idi Ieoba.

¹⁶ Ta ‘igu ona ni‘atu ia sa‘u ‘awamuia, ta nimagu ‘ina iauiaukwa ‘ena ia bodemu, be ‘enega garewa ia da sa‘u ‘ai‘ailidi, ta bare‘u ‘ana ‘autu ia da sa‘udi, ta ia da ona Siona ‘ena, ‘Oio ‘igu tomota.

¹⁷ ‘U da tooro, ‘u da tooro, ‘u da tooro ‘ai‘aila, Ierusalema ie, tauio Ieoba nimanega ‘ina egamwagamwagu didiga ‘ina keiga ‘u numena; keiga gadogado gaebana ni‘atu ‘u numena, ga ‘i iapasa.

¹⁸ Natunao me‘olotodi iauiaudi taudi si enatunedi nigea ‘e bweu ‘edia i ‘au‘ewena; nai natunao me‘olotodi iauiaudi i ‘amwamwedi ‘e bweuna ‘edia ‘i da enima‘abi ma‘ieana.

¹⁹ Iage ‘e rua getedi si apwesa ‘emuia; iaita manuio ‘i da dedo? waborebore ta saoora, botana ta sisisaia: mwa‘adega ia da gieguausoariio?

²⁰ Natumuao ni‘atu si be‘u, si ‘eno‘eno ‘eda iauiauna debadia, na‘ieana gota‐mitawa tore ‘enaia; si maa Ieoba ‘ina egamwagamwaguiega, ‘imu Eaubada ‘ina ba‘e ‘enega.

²¹ Ta ‘enega gete ‘u da nono, ‘oio ma‘imu elo‘uia, ta laulausiio, ta nigea oineega:

²² Gete nadigega ‘imu ‘Inapwana Ieoba ‘i gwae, ta ‘imu Eaubada tauna ‘ina tomota manudi ‘i ona leme, U ‘ita, keiga logadogado nimamuiega ia ‘ewena, tuga ‘igu egamwagamwagu keigana gaebana; gea‘abo wate ‘u da numa limena:

²³ Ta taudi si unuunumi nimadia ia da sa‘u; taudi si ona iaruiaruaio ‘ena, ‘U da ‘opu‘opu, be ‘enega ‘a da taona: ta guauio ‘u sa‘u bwa‘a na‘ieana, ta ‘eda na‘ieana, taudi si taona ‘edia.