Isaia 50 - Buki Tabu Lowaenei 1919

‘UPWA 50.

¹ Gete nadigega Ieoba ‘i gwae, Sinami ‘ina sa‘ila ‘ina ‘etoladi mane, tauna ‘enega ia sa‘ilena? nai to tai ‘igu to iotura ‘ediega ‘ena ia gimwaniemi? Wa ‘ita, ‘imi bubuna bokobokona manudi ia gimwaniemi, ta ‘imi li‘oa‐loina manudi sinami ia sa‘ilena.

² Toase manuna, ‘ena ia mai, nigea ‘e bweu tai ‘i miami? Ena ia bwau, nigea ‘e bweu ‘i da onalimana nai? Nimagu ‘i kukupa nai, be ‘enega gea‘abo ‘i da ‘ewalima? Nai nigea ma‘igu waiwai be ia ‘etosee? Wa ‘ita, ‘igu ba‘eiega ora ia gieiapasina, boasi‘awa ia bubudi be si emitawa: ‘idi iana si mwa‘ulu, nigea ‘idi boasi ta ‘enega, ta si mwawasa tona‘adi ‘i iapasa manuna.

³ Garewa ia e‘otedi gaigaiega, ta ‘oama ‘oausa ia sa‘una ‘idi ‘ebelobodaboda.

⁴ ‘Inapwana Eaubada tonono e‘ita meiadi ni‘atu i ‘ebwaegu, be ‘enega ia da mwaratoni be tauna ‘i lo‘ame‘ame ia da gi‘ete ona ‘ediega: gonagona be gonagona ‘i lowanowanogu, tenagu ‘i lowanowanona be ‘i nono nadigega to nono e‘ita

⁵ ‘Inapwana Eaubada tenagu ‘i gigegena, ta nigea ia loguitoasa, nai ia sana‘ilawa.

⁶ Guaugu ia tagwarena to‐sapi ‘edia, ta aseaseguao taudi ‘uia‘uiagu si lisi ‘iwena ‘edia: maninigu nigea ia kwaiena ‘omaiamaiega ta giwagiwarega.

⁷ ‘Inapwana Ieoba ‘i da lemegu ta ‘enega; ta ‘enega nigea ia nuaowana: ta ‘enega maninigu ia sa‘u ‘ai‘aila ginausa ‘atua, ta ia mwaramwaratoni gea‘abo ia da omaiamaia.

⁸ Tauna ‘i ‘awaparuparuiegu ‘i serabeguia: iaita ma‘ieagu ‘a da e‘upwa? ta da tooro rererea: iaita ‘agu tarauwara? ‘i da mai serabeguia.

⁹ Wa ‘ita, ‘Inapwana Eaubada ‘i da lemegu; ‘iaita tauna ‘i da ‘awato‘umaliegu? wa ‘ita, iauiaudi si da ekadekaderidi ‘atua ‘oama; manumanuao si da ‘e‘egumwaridi.

¹⁰ Iaita ‘emia Ieoba ‘i matautena, ‘ina to‐guinua ‘enana ‘ena ‘i ematamatana? tauna ‘i lopilidadana guguioi ‘ena, ta nigea ‘ina ma‘edananamo, tauna Ieoba ‘ana esana ‘ena ‘i da ‘emisa, ta ‘ina Eaubada ‘ena ‘i da tugadara.

¹¹ Wa ‘ita, iauiaumi ‘awe wa loe‘abia, wa logadiwanimi taumimo ‘ara‘arata ‘ediega: ‘imi awe meianao ‘edia wa da lopilidadana, ta gudara wa loe‘abi gamwagamwanidia. Gete wa da ‘ewa nimaguiega; wa da ‘eno‘eno dedoiega.