Isaia 49 - Buki Tabu Lowaenei 1919

‘UPWA 49.

¹ ‘Omi saruiao, wa da nono ‘eguia: ta ‘omi tomota, ‘edasorega wa da nono: Ieoba ‘i bwauiegu gamwega; sinagu dianega ‘agu esana i ‘inana:

² Ta ‘awagu ‘i bubuna sisisaia mamatana nadigega, nimana ‘ina iauiaukwa ‘ena ‘i kwaiegu; ta ‘i bubugu gita usiusina, ‘ina ‘ebe‘a‘aragita ‘ena ‘i egagaregu:

³ Ta ‘eguia ‘i gwae, ‘Oio ‘igu to‐guinua; Iseraela, ‘ena si da tupugu.

⁴ Ta ia gwae, Ni‘atu ia guinua besobeso, ‘igu waiwai ia loegumwarina iage nigea ‘e bweu ta iage besobeso manudi: ta ‘igu etara Ieoba ma‘ieana ‘ai‘aila, ta ‘igu e‘isa ‘igu Eaubada ma‘ieana.

⁵ Ta gete ‘enega Ieoba ‘i gwae tauna gamwega ‘i bubugu be ‘abo‘agu ‘ina to‐guinua, be Iakobo ia da me‘ena limana ‘enaia, ta ‘aene Iseraela ‘i da egogona ‘enaia: (‘abo‘agu ia esaesa Ieoba matanaia ta ‘enega, ta ‘igu Eaubada Tauna ‘igu waiwai:)

⁶ Tamo, ‘i gwae, Iage kapekapeana wawasae ‘aene ‘oio ‘igu toguinua be Iakobo ‘ina susuiao ‘u gietooro‘edi, ta Iseraela ‘ina tomia egagara ‘u da sa‘u limedi: wate ia da ‘ebwaea‘eio ‘Asa apwesa ‘idi ma‘edana manuna, be ‘oio ‘igu ‘etoseana ga bare‘u ‘ina ‘ebelosaroni.

⁷ Gete nadigega Ieoba ‘i gwae, Iseraela ‘ana to‘ewa limana, ta ‘ina Tabu Tebweuna, tauna tai ‘i sinarina ‘enaia, tauna ‘asa ‘i guitoasena ‘enaia, ‘inapwanao ‘idi toguinua ‘enaia: Kiniao si da ‘ita ta si da tooro; ‘inapwanao, ta si da bwago: Ieoba tauna to bubu ‘ai‘aila manuna, tuga Iseraela ‘ina Tabu Tebweuna, tauna i ‘esinueio.

⁸ Gete nadigega Ieoba ‘i gwae, Tuta bobo‘ana ‘enega ni‘atu ia onalimana ‘emuia, ta ‘etoseana ‘ana asiata ‘enega ni‘atu ia lememu: ta ia da egagareio, ta ia da ‘ebwaea‘eio tomota ‘idi ona‘upa‘upa manuna, be bare‘u ‘u da sa‘u ‘ai‘aili, be ‘u da loinedi be ‘egu‘eguia waboreboreao si da ‘ewa:

⁹ Be ioniionidi ‘edia ‘u da gwae, Wa da apwesawa; tomia guguioi ‘edia, Wa da e‘ita‘emi. Si da ‘e‘ai ‘eda ‘ediega, ta ‘oea bwa‘adaisidimo iauiauna ‘adi ‘e‘ai ‘edia ‘i da miami.

¹⁰ Gea‘abo si da botana nai tonaadi ‘i da iapasa; nai ara nai sinara ‘i da unudi: tauna i ‘atenua‘ole‘oleiedi ‘i da ‘au‘ewedi ta ‘enega, tuga boasi wewerupwa ‘ediega ‘i da nuganedi.

¹¹ Ta ‘igu ‘oea iauiaudi ia da bubuna be si e‘eda, ta ‘igu ‘eda sinabwadi si da miatu‘e.

¹² Wa ‘ita, getedi ‘edasorega si da mai: ta, wa ‘ita, getedi iaaratega ta ‘ebwagega; ta getedi ‘asa Sinima ‘enega.

¹³ Wa da wari, Garewa ie; ta ‘u da guausoara; Bare‘u ie; ta wa da ‘arapwaila wari ‘ena, ‘omi ‘oeao: Ieoba ‘ina tomota ‘i gieguausoaridi ta ‘enega, ta ‘ina to‐elo‘uia ‘edia ‘i da ‘atenua‘ole‘ole.

¹⁴ Ta Siona ‘i gwae, Ieoba ‘i e‘idi‘idiegu, ta ‘Inapwana ‘i nuapupuregu.

¹⁵ Waine natuna ‘i esusu ‘i da nuapupura nai, be ‘enega gamwana natuna nigea ‘i da ‘atenua‘ole‘oleiei? Tamo, getedi si da nuapupura nai, ta ‘abo‘agu gea‘abo ia da nuapupureio.

¹⁶ U ‘ita, nimaiapaiapagu ‘edia ia daiagiio; ‘imu pita si mia ‘ataia mataguia.

¹⁷ Natumuao si lomanini; ‘amu togiesaoora ta taudi si giesawariio ‘emuiega si da tauiawa.

¹⁸ Wa da dunedune tu‘e dadana, ta wa da ‘ita: iauiaudi getedi si egogona rererea, ta si mai ‘emuia. Maiawasigu, Ieoba ‘i gwae, ‘u da e‘ote‘ai‘ailiio iauiaudi ‘ediega na‘ieana ‘ebeiarega, ta ‘u da logadiwaniio ‘ediega, nadigega to ai mewainena.

¹⁹ Ta, ‘imu esena kaukaudaisidimo ta ‘imu esenao waborebore ta ‘imu bwa‘a ni‘atu ‘i saoora manudi, ‘ai‘aila ‘u da gilele to mia manudi, ta taudi si toneio si da mia ‘edasora.

²⁰ Natumuao ‘emuiega si ‘ewedi si da ona limana tenaio ‘edia, Esena nina ‘i gilele wawasae manugu: wa da mia ‘ila ‘eguiega be ia da miami.

²¹ Ga ‘oio ‘u da ona ‘atemuia, Iaita getedi ‘i enatunedi ‘eguia, natuguao si ‘ewedi ta ‘enega, ta ‘abo‘agu ia mia tebweugu, ia mia apwesa, ta ia lopilidadana? ta iaita getedi ‘i ‘amwamwedi? Wa ‘ita, si pilisinegu ga tebweugu; getedi, mwa‘o si miami?

²² ‘Inapwana Eaubada gete nadigega ‘i gwae, Wa ‘ita, nimagu ia da gilagasi ‘ebeloinao ‘edia, ta ‘agu doe ia sa‘u etooro tomota ‘edia: ta natumuao me‘olotodi si da me‘edi lumalumadiega, ta natumuao me wainedi si da ‘a‘aridi.

²³ Ta kiniao si da tamamuao to amwamwa, ta ‘idi kuiniao sinamuao to amwamwa: si da bwagobwago sana mwa‘uta bare‘uia ‘emuia, ta ‘aeio ‘ina kau si da loiamosi: ta ‘u da mwaratoni ‘abo‘agu Ieoba, ta taudi si iamwaiamwa manugu gea‘abo si da omaiamaia.

²⁴ Iage ‘oae si da ‘ewa nai toewaiwai ‘ediega, nai to paruparu ‘idi ioniionidi si da ‘etoseedi?

²⁵ Ta gete nadigega Ieoba ‘i gwae, Tuga to ewaiwai ‘idi ioniionidi si da ‘ewedi, ta to didiga ‘idi iage oae si da ‘etoseedi: ‘abo‘agu ia da e‘upwa tauna ‘i e‘upwa ma‘ieaio ma‘ieana, ta natumuao ia da ‘etoseedi.

²⁶ Ta taudi si giemwa‘utemi ia da ‘e‘enidi taudi esiodi ‘enega: ta si da elolaulausi taudi raradiega, ‘atua oine dibidibiega: ta esio maibo‘ana ‘i da mwaratoni ‘aene ‘abo‘agu Ieoba ‘imu to‐‘etoseana, ta ‘amu to ‘ewa limana, Iakobo ‘ina Waiwai Tebweuna.