Isaia 48 - Buki Tabu Lowaenei 1919

‘UPWA 48.

¹ Iakobo ‘ina susu ie, gete wa da nono, taudi ‘adi esana Iseraela, ta Iuda ‘ina boasiao ‘ediega si apwesama; taudi si ona‘upa‘upa Ieoba ‘ana esanega, ta Iseraela ‘ina Eaubada si ‘inana, ta nigea ona ‘ai‘ailega, nai bubuna paruparuiega.

² Si ‘inanedi ta ‘enega ‘asa tabuiega, ta si tugadara Iseraela ‘ina Eaubada ‘enaia; ‘ana esana bodao ‘idi Eaubada.

³ Gimi iage ni‘atu ia simanedi lowaeneiega: tamo, ‘awaguiega si apwesawa, ta ia e‘itedi: manini ia guinuedi, ta si apwesa.

⁴ Ia mwaratoni oio guauio ‘i toiasa manuna, ta ‘otoio waro kainumu, ta ‘asuio barasa:

⁵ Ta ‘enega ia simanena ‘emuia lowaeneiega; nigea ‘i apwesa ta ia e‘itena ‘emuia: ‘abona nai ‘u da gwae, ‘Igu tokwarui ‘i guinuedi, ta ‘igu goamamea daiadaiagina, ta ‘igu goamamea e‘ue‘urenina, si loinedi.

⁶ ‘Oio ni‘atu ‘u nonona; iage iauiauna gete ‘u da ‘ita; ta ‘omi, gea‘abo wa simanena? Iage auaudi ia e‘ita ‘emuia ni‘atu tuta gete ‘enega, tuga iage si miakwaia, taudi nigea ‘u mwaratoni.

⁷ Gete ‘enega ia mweruruidi, ta nigea lowaeneiega; ta asiata gete nuganaia nigea ‘u nonodi; ‘abona nai ‘u da gwae, U ‘ita, ia mwaratonidi.

⁸ Tamo, nigea ‘u nono; tamo, nigea ‘u mwaratoni; tamo, lowaeneiega tenaio nigea ‘i egegena: ia mwaratoni ta ‘enega ‘u bubu to wasegigi sana, ta si eesemu to‐li‘oaloina gamwa ‘enega.

⁹ ‘Agu esana manuna ‘igu gamwasoara ia da lo‘ela‘elalawa, ta ‘agu tuputupu manuna ia da egagara manuio, be ‘enega gea‘abo ia da ‘upaiauleio.

¹⁰ U ‘ita, ni‘atu ‘aweiega ia gie‘esasemu, ta nigea sileba ‘atua; ni‘atu ia ‘esinuemu elo‘uia ‘ana ‘ebegabu ‘enaia.

¹¹ Taugu manugu, taugu manugu, ia da guinuena; mwa‘adega ‘agu esana si da gibesobeso ta ‘enega? Ta ‘agu esaesa gea‘abo ia da ‘ebwaea wate ‘e bweu ‘enaia.

¹² Iakobo ie, ‘eguia wa da nono, ta Iseraela ‘agu bwaubwauiao: abo‘agu Tauna: Abo‘agu to‐nugana, ‘abo‘agu wate to‐muria.

¹³ Tamo, nimagu bare‘u ‘ana ‘autui ‘i sa‘una, ta ‘ataigu garewa ‘i neasidi: ‘ena ia bwau ‘edia, si tooro rererea.

¹⁴ Iauiaumi, wa da egogona, ta wa da nono; iaita ‘edia iage getedi ‘i simanedi? Ieoba ‘i obobomena: ‘ina nuena ‘i da bubuna Babulonia ‘enaia, ta nimana me Kaladea ‘edia ‘i da miami.

¹⁵ ‘Abo‘agu, tuga ‘abo‘agu, ni‘atu ia onaona; tamo, ia bwauiena: ni‘atu ia ‘au‘ewenama, ta ‘ina ‘eda ‘i da gibubui be ‘i etologwegwe.

¹⁶ Serabeguia wa da mai, gete wa da nonona; nuganega nigea ia ona kwaia; tuta ‘i miami ‘enega, ‘ena ‘abo‘agu: ta gete ‘enega ‘Inapwana Eaubada ‘i etunegu, ta iaruiaruana.

¹⁷ Gete nadigega Ieoba ‘amu to‘ewalimana, Iseraela ‘ina Tabu Tebweuna ‘i gwae: ‘Abo‘agu Ieoba ‘imu Eaubada, tauna ‘i e‘iteio be ‘u loeposeana, tauna i ‘au‘ewemu ‘eda sawesawemuia ‘enega.

¹⁸ ‘Eguma ‘igu ona ni‘atu ‘u nonodi! ga ‘imu guguia ‘i da boasi‘awa ‘atua, ta ‘imu bubuna paruparu ora ‘ina lisuiao nadigega:

¹⁹ Tubumuao wate si da kaukau ‘atua, ta diaio uana nadigega kaukau matanao: ‘ana esana gea‘abo si da ‘upwa iaulei nai ‘i da saoora mataguiega.

²⁰ Babuloniega wa da tauiawa, me Kaledea ‘ediega wa da dena; wari ‘enanega wa da simana, gete wa da oneone, wa da ‘inana ga bare‘u ‘ina ‘ebelosaroni: wa da gwae, Ieoba ‘ina toguinua Iakobo ni‘atu i ‘ewa limena.

²¹ Ta tonaadi nigea si iapasa tuta ‘enega i ‘au‘ewedi kaukaudaisidimo ‘edia: boasi ‘i giedau gurewega manudi: gurewa wate ‘i wearina, ta boasi si dau.

²² Nigea ‘e bweu guguia, Ieoba ‘i gwae, to to‘umalina ‘edia.