Isaia 47 - Buki Tabu Lowaenei 1919

‘UPWA 47.

¹ ‘U da mwa‘utama, ta kau ‘ena ‘u da miatoa, ‘Oio Babulonia natuna gomagweine nina: bare‘u ‘ena nigea ma‘imu ‘ebemi esaesa ‘ena ‘u da miatoa, ‘Oio me Kaledea natudi me wainena: gea‘abo wate si da eeseio nuaio ta mewaineio.

² Gurewa ‘ebedai wa da ‘ewedi, ta palaua ‘u da dai: maniniio ‘ana lobodaboda ‘u da ‘ewa, ‘amu ‘oama iauiauna ‘u da lolo iaulei, ‘ae ‘ana lobodoboda ‘u da ‘ewa, boasi‘awa ‘u da rubwaredi.

³ ‘Imu mabubugewa ‘i da apwesa, tamo, ‘imu omaiamaia si da ‘ita: ia da e‘isa, ta gea‘abo ‘e bweu tai ia da loba.

⁴ ‘Ida to‐‘ewalimana, bodao ‘idi Ieoba ‘ana esana, Iseraela ‘ina Tabu Tebweuna.

⁵ ‘U da mia ‘emwa‘ule, ta guguioi ‘ena ‘u da tauia, ‘Oio me Kalidea natudi mewainena: gea‘abo wate ‘amu esana ‘Ebeloinao ‘idi ilemwaia ta ‘enega.

⁶ ‘Igu tomota ‘edia ia gamwasoara, ‘igu ‘egu‘eguia ia gibesobeso, ta ia tagwaredi nimamuia: nigea u ‘atenua‘ole‘oleiedi; kaikaiiaredi ‘edia ‘imu ‘a‘ara ‘u sa‘u tomwausana.

⁷ Ta ‘u ona, Ia da ilemwaia ‘ataia: ta nadigega iage getedi nigea ‘u sa‘u ‘atemuia, nai ‘ina ‘ebelosaroni ‘u nuena.

⁸ Ta ‘enega gete tuga ‘u da nono, ‘oio guausoara ‘areio, ‘oio to mia besobeso, ‘atemuia ‘u gwae, ‘abo‘agu, ta nigea wate ‘e bweu ‘agu e rua; gea‘abo ia da miatoa kwabura ‘atua, nai gogama ‘idi mwawasa ia da mwaratoni:

⁹ Ta iage e rua getedi si da apwesa ‘emuia tuta mata ‘e bweunega asiata ‘e bweuna ‘enaia, gogama ‘idi mwawasa, ta kwabura: ‘idi maamaanega si da mai ‘emuia, ‘imu barau ‘adi iau, ta ‘imu obaoba ‘adi sinabwa wawasae gamwagamwanidia.

¹⁰ ‘Imu bubuna to‘umali ‘ena u ‘emisa ta ‘enega: ‘u gwae, Nigea ‘e bweu i ‘itegu; ‘imu sinasinapu ta ‘imu mwaramwaratoni, tauna ‘i gieboko‘emu: ta ‘atemuia ‘u gwae, ‘Abo‘agu taugu, ta nigea wate ‘agu eruamo.

¹¹ Ta ‘enega iage to‘umalina ‘emuia ‘i da mai; ‘ina gimi apwesama nigea ‘u da mwaratoni: ta wasegigi ‘i da be‘u emuia; gea‘abo ‘u da ewaiwai be ‘u da ‘ewaiaulena: ta waborebore ‘i da apwesa maninima ‘emuia, tauna nigea ‘u mwaratonina.

¹² ‘Imu obaoba ‘ediega ‘u da tooro, ta ‘imu barau ‘adi iau ‘ediega, taudi ‘ediega ‘u guinua ‘imu gomagweineega; ‘abona nai ‘u ewaiwai be ‘u eposeana, ‘abona nai ‘u da edidiga.

¹³ ‘Imu onaleme ‘adi iau ‘enega ‘u lo‘ame‘ame: gete tuga garewa ‘ina to‐wearaiao, to‐dunekwadimaiao, to‐paropisai nawarae iauna, si da tooro, be iage si da mai ‘emuia ‘enega si da ‘etoseemu.

¹⁴ U ‘ita, si da ‘e witi ‘aredi ‘atua; ‘awe ‘i da ‘arasidi; gea‘abo si da ‘etoseedi awe‐sabelulu ‘ina waiwaiega: gea‘abo ‘i da ‘e kebwanigita ‘ebesi‘asi‘ata, nai ‘awe ‘ebemiatoa matanaia.

¹⁵ Gote nadigega iage ‘enega ‘u guinua si da miami: taudi ma‘ieaio wa ‘egimwagimwani ‘imu tuta gomagweineega si da tauia ‘e bweuna ‘e bweuna ‘ina esena ‘enaia; gea‘abo ‘e bweu ‘i da ‘etoseeio.