Isaia 46 - Buki Tabu Lowaenei 1919

‘UPWA 46.

¹ Belu ‘i bwagobwago, Nebo i ‘opu‘opu; ‘idi tokwaruiao iobai debadia si miami, ta bulomakau debadia: iage wa ‘a‘aradadana si e‘a‘ara, iage mwau iobai oona ‘i nua ‘enaia.

² Si ‘opu‘opu, si bwagobwago rererea; nigea kapekapeaua ‘a‘ara si da li‘ami, ta taudi si tauia ‘ebeionaiona ‘enaia.

³ ‘Eguia wa da nono, Iakobo ‘ina anua ie, ta Iseraela ‘ina anua tupwana maibo‘ana, taudi gamwaguiega ia ‘a‘aridi, taudi si ‘a‘aridi gamwa ‘enega:

⁴ Ta ‘abo‘agu tauna tuga tuta dudurana ‘ena, ta sikaa tuga ‘ena ia da ‘a‘arimi: ‘abo‘agu ia mweruruina, ta ia da ‘a‘ara; tamo, ia da ‘a‘ara, ta ia da li‘amina.

⁵ Iaita nai wa da ‘awanadigega‘egu, ta wa da ona ia erererea ma‘ieana, ta wa da sa‘ugu ma‘ieana, be ‘a nadigega?

⁶ Taudi gola si siwa toila tanega, ta sileba si ‘etopwapwa kuge ‘ena, taudi tobubugola si e‘isa, ta ‘i mweruruina be ‘i eaubada; si be‘u mwa‘uta, tamo, si bwagobwago.

⁷ ‘A‘aradiega si ‘a‘arina, si ‘a‘arina, ta ‘ina esena ‘ena si sa‘una, ta ‘i tooro; ‘ina esenega gea‘abo ‘i da tauia; tamo, ‘e bweu ‘ena ‘i da bwau, ta nigea kapekapeana ‘i da ona limana, nai ‘ina mia to‘umalina ‘enega ‘i da ‘etoseena.

⁸ Gete wa da nua‘i‘isi, ta wa da e‘ita‘emi tai: wa da nua‘i‘isi limana, omi to‐li‘oa loinaiao.

⁹ Gimi iage lowaeneiega wa da nua‘i‘isi: ‘abo‘agu Eaubada ta ‘enega, ta nigea wate ‘e bweu; ‘abo‘agu Eaubada, ta nigea ‘e bweu ‘abo‘agu nadigega;

¹⁰ ‘Ebelosaroni ia simana nuganega, ta gimi tutao ‘ediega iage nigea si apwesa gete; ia onaona, ‘Igu nuanua ‘i da tooro, ta ‘igu nuena maibo‘ana ia da guinua:

¹¹ Manua bosasa ia bwauiena bomatuiega, ‘igu nuena ‘ina tai ‘asa ‘edasorega; tamo, ni‘atu ia ona, wate ia da gieapwesenama; ni‘atu ia loinena, ta wate ia da bubuna.

¹² Omi to‘atepatu, bubuna paruparuiega wa mia ‘edasora, ‘eguia wa da nono:

¹³ ‘Igu bubuna paruparu ia me‘ena serabenaia, gea‘abo ‘i da mia ‘edasora, ta ‘igu ‘etoseana gea‘abo ‘i da iamwaiamwa; ta ‘etoseana ia da sa‘u Siona ‘ena Iseraela ‘igu esaesa manuna.