Isaia 45 - Buki Tabu Lowaenei 1919

‘UPWA 45.

¹ Gete nadigega Ieoba ‘i gwae ‘ina orooroina ‘enaia, Koresa ‘ena, tauna ‘ataina ia giiaina, sabi didiga ‘ebeloinao matanaia, ta kiniao tolobwadi ia da li‘amidi; sabi gigege ‘awa matanaia, ta ‘eberugu gea‘abo si da gibodedi;

² Ia da tauia matamuia, ta esena dakadakadi ia da gienonokwaikwaiidi: ‘auboda barasa ia da wearidi, ta sa‘ubarabara kainumu ia da ‘upwa ruedi:

³ Guguioi ‘ina gwegweao, ta esena kwaia ‘idi oesi kwaia, ia da ‘ebwaemu, be ‘enega ‘u da mwaratoni ‘abo‘agu Ieoba, ‘amu esanega ia bwauiemu, tuga Iseraela ‘ina Eaubada.

⁴ Iakobo ‘igu to‐guinua manuna, ta Iseraela ‘igu ‘esi‘esinuena, ‘amu esanega ni‘atu ia bwauiemu: nigea ‘u mwaratonigu, ta ia eesemu.

⁵ ‘Abo‘agu Ieoba, ta nigea wate ‘e bweu; nigea ‘e bweu Eaubada ‘abo ‘abo‘agu nigea: nigea ‘u mwaratonigu, ta ia da paimiio tuga gadiwanega:

⁶ Be ‘enega si da mwaratoni sinara ‘ina sae ‘enega, ta ‘ebwagega, ‘aene nigea ‘e bweu ‘abo ‘abo‘agu nigea: ‘Abo‘agu Ieoba, ta nigea wate ‘e bweu.

⁷ Ma‘edana ia bubuna, ta guguioi ia mweruruina; guguia ia bubuna, ta to‘umalina ia mweruruina; ‘Abo‘agu Ieoba, tauna iage iauiauna getedi ‘i guinuedi.

⁸ ‘Omi garewao, wa da pesuma, ‘etanega, ta garewa bubuna paruparu ‘i da siwa mwa‘utena: bare‘u ‘i da egegena, be ‘enega ‘etoseana si da uaua, ta bubuna paruparu ‘i da gietabwa rererea; ‘Abo‘agu Ieoba ni‘atu ia mweruruina.

⁹ Tauna i ‘e‘upwa ‘ana Tomwerurua ma‘ieana oioi ‘enaia! keigaiga bare‘u ‘ina keigaiga gamwagamwanidia! Bwa‘a ‘i da ona tauna ‘i bubuna ‘ena, Toase ‘u mwerurua? nai ‘imu guinua, Nigea nimanamo?

¹⁰ ‘Oioi ‘enaia tauna ‘i gwae tamana ‘ena, To‘ase ‘u enatunena? nai waine ‘enaia, To‘ase ‘enega ‘u edaedadama?

¹¹ Gete nadigega Ieoba ‘i gwae, Iseraela ‘ina Tabu Tebweuna, ta ‘ana Tomwerurua: Iage si da mai manudi wa da eonegu; natuguao me‘olotodi manudi, ta nimaguao ‘idi guinua manuna, ‘eguia wa da loina.

¹² ‘Abo‘agu bare‘u ia mweruruina, ta tai ia mweruruina debanaia: ‘Abo‘agu, tuga nimaguao, garewa ia lisidi, ta ‘idi boda maibo‘ana ia loinei.

¹³ Ia gietoorona bubuna paruparuiega, ta ‘ina ‘eda iauiauna ia da gieparuparu: ‘igu ‘asa ‘i da ‘abina, ta ‘igu tomia to‘u‘umara ‘i da li‘amidi, nigea e‘isa nai tamapu manuna, bodao ‘idi Ieoba ‘i gwae.

¹⁴ Ieoba gete nadigega ‘i gwae, Aigupito ‘ina guinua, ta Aitiope ‘ina gwegwe, ta me Sabea, tai sinabwadi, si da lagama ‘emuia, ta si da ‘imu iage; si da muriemu; ioniionidi ‘aupega si da lagama: si da be‘u mwa‘uta ‘emuia, si da ‘awanoi ‘emuia, si da gwae, Ona ‘ai‘aila Eaubada ‘emuia; ta nigea wate ‘e bweu, nigea ‘e bweu Eaubada.

¹⁵ Ona ‘ai‘aila ‘oio Eaubada ‘u kwaiemu, Iseraela ‘ina Eaubada ie, To ‘Etoseana.

¹⁶ Si da omaiamaia, tamo, si da loniu, iauiaudi: taudi to bubu tokwarui loniu ‘ena si da tauia rererea.

¹⁷ Iseraela Ieoba ‘i da ‘etoseena ‘etoseana mia‘ataia ‘enega: gea‘abo wa da omaiamaia nai wa da loniu ga bare‘u ‘ana ‘ebelosaroni.

¹⁸ Gete nadigega Ieoba tauna garewao ‘i mweruruidi ‘i gwae; tauna Eaubada; tauna bare‘u ‘i gibubuna ta ‘i mweruruina; ‘i sa‘u ‘ai‘ailina, ‘i mweruruina nigea iagedaisinamo, ‘i gibubuna be iauna ‘ana tomi: ‘Abo‘agu Ieoba; ta nigea wate ‘e bweu.

¹⁹ Nigea ia ona kwaia, guguioi ‘ina ‘asa ‘ina esena ‘enaia; nigea ia ona Iakobo tubunao ‘edia, Wa da ‘ebesa iogenegu; ‘Abo‘agu Ieoba bubuna paruparu ia oneone, iage si paruparu ia simana.

²⁰ Wa da egogonemi ta wa da mai; wa da egogona serabenaia, ‘omi ‘ebeloinao ‘idi to denadena: taudi ‘idi tokwarui daiagi ‘ina kaiwe si ‘a‘ara nigea ‘e bweu ‘idi ‘ebesinapu, ta si sida eaubada nigea kapekapeana ‘i da ‘etoseedi ‘enaia.

²¹ Wa da simana, ta wa da apwesenama; tamo, si da onaona rererea: ‘iaita gete ‘i e‘ita tuta lowaeneiega? Iaita ‘i simana lowaeneiega? nigea nai ‘Abo‘agu Ieoba? ta nigea wate ‘e bweu Eaubada tebweugumo; Eaubada loina ‘ai‘ailina ta to‐‘etoseana: nigea wate ‘e bweu tebweugumo:

²² Wa da ‘ita ‘eguia, ta wa da bobo‘ana, bare‘u ‘ina ‘ebelosaroniao iauiaumi: ‘abo‘agu Eaubada ta ‘enega, ta nigea wate ‘e bweu.

²³ Tebweugu ‘enega ia ona‘upa‘upa, ona ni‘atu ‘awaguiega ‘i apwesa bubuna paruparunega, ta gea‘abo ‘i da ‘ila, ‘aene ‘eguia ‘ae iauiauna si da tulasena, meia iauna si da ona‘upa‘upa.

²⁴ Ieoba ‘ena tebweuna, ‘e bweu ‘i da gwae ‘eguia, bubuna paruparu ta pa‘ara ‘ena ‘i miami: tuga tauna ‘ena tai si da mai, ta iauiaudi si gamwasoara ‘enaia si da omaiamaia.

²⁵ Ieoba ‘ena Iseraela tubunao si da paruparu, ta si da tuputupu.