Isaia 44 - Buki Tabu Lowaenei 1919

‘UPWA 44.

¹ Ta gete tuga ‘u da nono, Iakobo ie ‘igu to‐guinua; ta Iseraela, tauna ia ‘esinuena:

² Gete nadigega Ieoba ‘i gwae tauna ‘i mweruruiio, ta ‘i bubuio gamwa ‘enega, tauna ‘i da lemeio: Gea‘abo ‘u matauta, Iakobo ie ‘igu toguinua: ta ‘oio, Iesuruna, tauna ia ‘esinuena.

³ Tauna tonaana ‘i iapasa boasi ‘ena ia da siwa, ta boasi‐dauiaiowao bwa‘a iadaiada ‘enaia; iaruiaruagu ia da siwa tubumuao ‘edia, ta ‘igu onaoboboma natumuao ‘edia:

⁴ Ta si da tabwa tu‘e nedu gamwagamwanaia, ‘atua wilou boasi ‘ina ‘ebedau deidia.

⁵ ‘E bweu ‘i da gwae, ‘Abo‘agu Ieoba ‘ina tai; ta wate ‘e bweu ‘i da eesena tauna Iakobo ‘ana esanega; ta wate ‘e bweu ‘i da ‘etoladi nimanega Ieoba ‘enaia, ta ‘i da eesena tauna Iseraela esanega.

⁶ Gete nadigega Ieoba ‘i gwae, Iseraela ‘ana King, ta ‘ina to‘ewa‘limana bodao ‘idi Ieoba: ‘Abo‘agu nugana nina, ta muria nina; ta nigea ‘e bweu Eaubada ‘abo ‘abo‘agu nigea.

⁷ Ta iaita, na‘ieana ‘abo‘agu, ‘i da bwau, ta ‘i da simanena, ta ‘i da sa‘u ‘ai‘aila manugu, ‘abo‘agu tomota lowaenei ia ‘aseiedi ‘enega? ta iage ‘i abe si mai, ta taudi si da apwesama, si da simana.

⁸ Gea‘abo wa matauta, nai wa da ‘atesa‘ara: nigea nai ia simana ‘emuia lowaeneiega, ta ia e‘ita‘ena? ta ‘omi ‘igu to‐‘itao. Wate ‘e bweu Eaubada ‘i miami ‘agu erua? tamo, nigea ‘e bweu Gurewa Sinabwana; nigea ‘e bweu ia mwaratoni.

⁹ Taudi tokwarui daiagi si bubuna iauiaudi iage besobeso; ta ‘idi iage bobo‘ai‘ailidi gea‘abo si da loeposeana: ta taudi ‘idi to‘itao nigea si ‘ita, nai si mwaratoni; be ‘enega si da omaiamaia.

¹⁰ Iaita eaubada ‘i bubuna, nai tokwarui daiadaiagina i ‘e‘urena ta ‘ana loeposeana nigea ‘e bweu?

¹¹ Wa ‘ita, ‘ana ‘arauna iauiaudi si da omaiamaia: ta to‐guinua nidi, taudi tai ‘ediega: iauiaudi si da egogonedi rererea, si da tooro; si da matauta, si da omaiamaia rererea.

¹² Tobubukainumu ‘ila ‘i bubuna, ta kebwanigita ‘edia ‘i guinua, ta ‘i iagena loperao ‘ediega, ta ‘i guinuena nimana waiwaiega; tamo, ‘i botana, ta ‘ina waiwai ‘i sawara: boasi nigea ‘i numa, ga oona ‘i taba.

¹³ Tobubu‐kaiwe marakwa ‘i lisina; mena‘arega i ‘etopwapwena; ‘ila ‘ediega ‘i bubuna, ta kamipasa ‘ediega i ‘etopwapwena, ta tai ‘ana ma‘ama‘aiau nadigega ‘i bubuna, na‘ieana tai ‘ana ‘ita bobo‘ana, be anua ‘ena ‘i miami.

¹⁴ Maruanao ‘ena ‘i tara mwa‘utedi, ta kaiwe kwakwamo be keigwana i ‘ewedi, ta mitawa ‘ina kaiwe gamwagamwanidiega ‘e bweuna ‘i giepa‘ara tauna manuna; keigwana ‘i aso, ta ‘usana ‘i giebobo‘anena.

¹⁵ Ga ‘i da kaiwe be tai ‘i gabuna; ta ‘enega i ‘ewa, ta ‘i si‘asi‘ata; tamo, ‘i loe‘abia, ta palaua ‘i gabu: tamo, eaubada ‘e bweu ‘i mweruruina, ta ‘ena ‘i bwagobwago; ‘i mweruruina be i ‘e tokwarui daiagi, ta ‘ena ‘i be‘u mwa‘uta.

¹⁶ ‘E bweu esena ‘i gabuna awe ‘ena; ‘e bweu esenega esio i ‘e‘ani; ai gabu ‘i gabuna, ta sawesawenaia: tamo, ‘i si‘asi‘ata, ta ‘i gwae, A! A! Ia iaiiai, ni‘atu awe ia ‘itena:

¹⁷ Ta tupwana ‘i mweruruina be ‘i eaubada ‘e bweu, tuga ‘ina tokwarui daiagi: ‘ena ‘i be‘u mwa‘uta ta ‘i bwagobwago, ta ‘ena ‘i sidasida, ta ‘i gwae, ‘U da ‘etoseegu; ‘oio igu eaubada ta ‘enega.

¹⁸ Nigea si mwaratoni, nai si nuanua: tauna matadiao ‘i gibodedi ta ‘enega, be ‘enega gea‘abo si ‘ita; ta ‘atediao, be ‘enega gea‘abo si sinapu.

¹⁹ Ta nigea ‘e bweu ‘i enua‘i‘isi, nai mwaratoni nai sinapu ‘i miami be si gwae, Ni‘atu ‘e bweu sena ia gabuna ‘awe ‘enaia; tamo, wate palaua ia gabu kebwanigisinao ‘edia; esio ia gabu ta ia ‘enina: ta tupwana ia da giegadiluluiei? Kaiwe ‘arena ‘ena ia da be‘u mwa‘uta nai?

²⁰ Karikau ‘enega i ‘e‘ai: ‘ate kabokaboena ‘i gibuni dumedumena, be ‘enega iaruiaruana gea‘abo ‘i da ‘etoseena, nai ‘i gwae, Nigea nai kabo ‘ataigu ‘enaia?

²¹ Iage getedi wa da nua‘i‘isi, Iakobo ie; ta Iseraela, ‘oio ‘igu toguinua ta ‘enega: ‘Abo‘agu ia mweruruimu; ‘oio ‘igu to guinua: Iseraela ie, gea‘abo ia da nuapupureio.

²² ‘Imu li‘oa‐loinao ni‘atu ia kweuiedi, na‘ieana poana badona, ta ‘imu loegesiao, na‘ieana poana: ‘eguia ‘u da ‘ilama: ‘abo‘agu ia ‘ewalimemu ta ‘enega.

²³ Wa da wari, ‘omi garewao ie, Ieoba ni‘atu ‘i guinuena ta ‘enega; wa da bwau, ‘omi bare‘u ‘ina esenanao lo‘ubuna; ‘Omi ‘oeao, mitawa ie, ta kaiwe iauna ‘ena, wa da pwaila wari ‘enega: Ieoba ni‘atu Iakobo i ‘ewa‐limena ta ‘enega, ta tauna esaesa ‘i da sa‘u Iseraela ‘ena.

²⁴ Ieoba, ‘amu To‘ewalimana, ta tauna gamwega ‘i mweruruimu, gete nadigega ‘i gwae: ‘Abo‘agu Ieoba, tauna iage iauiauna ‘i mweruruidi; tauna tebweuna garewao ‘i lisidi: tauna bare‘u ‘i neasina; iaita ma‘ieagu?

²⁵ Tauna toonakabokabo ‘adi we‘iwe‘i‘iaia i ‘etobodedi, ta to‐obaoba ‘adi euwauwa ‘i sa‘u; tauna tai sinasinapu ‘i giesana‘iledi, ta ‘idi mwaratoni ‘i gieuwauwa:

²⁶ Tauna ‘ina toguinua ‘ina ona ‘i giepa‘ara, ta ‘ina topiliiareiare ‘idi nuena ‘i guinuena; tauna ‘i gwae Ierusalema manuna, ‘I da maa tomota ‘ediega; ta Iuda ‘ina ‘asa manudi, Si da ‘abidi, ta ‘ina esena kakaedi ia da gietooro;

²⁷ Tauna ni‘u ‘ena ‘i ona, ‘U da iapasa, ta ‘imu boasi‘awa ia da gieiapasedi;

²⁸ Tauna ‘i gwae Koresa manuna, Tauna ‘igu to‐‘ita‘i‘isi‐sipi, ta ‘igu nuena iauiauna ‘i da guinua: tuga Ierusalema manuna ‘i gwae, si da ‘abina; ta anuatabu ‘ena, ‘Imu ‘autui si da sa‘u.