Isaia 43 - Buki Tabu Lowaenei 1919

‘UPWA 43.

¹ Ta gete ‘enega Ieoba, tauna ‘i mweruruiio, Iakobo ie, ta tauna ‘i bubuio, Iseraela ie, gete nadigega ‘i gwae: Gea‘abo ‘u matauta, ni‘atu ia ‘ewalimemu ta ‘enega; ni‘atu ia bwauiemu ‘amu esanega, ‘oio ‘igu iage.

² ‘Ena boasi u da rubwaredi, ‘Abo‘agu ma‘ieaio; ta boasidaudau ‘u rubwaredi, gea‘abo si da siwabodeio: ‘ena ‘awe ‘u tauia bwarena, gea‘abo ‘i da ‘ara‘arasiio; nai ‘awe meiana ‘i da sabelulu ‘emuia.

³ ‘Abo‘agu Ieoba ‘imu Eaubada, Iseraela ‘ina Tabu Tebweuna, ‘amu to‐‘eto‐seana; Aigupito ia ‘ebwaea ‘amu e‘isa, Aitiope ta Seba manuio.

⁴ ‘Oio bobo‘ai‘ailiio mataguia, ta ‘ama‘amaiabaio, ta ‘enega ia obobomeio; ta ‘enega tai ia da ‘ebwaea‘edi manuio, ta tomotaiao iawasiio manuna.

⁵ Gea‘abo ‘u matauta; ‘abo‘agu ma‘ieaio ta ‘enega: tubumuao ia da me‘edi bomatuiega, ta ia da egogoneio ‘ebwagega;

⁶ Iaarata ‘ena ia da ona, ‘U da tagwara; ta iarasi ‘ena, Gea‘abo ‘u egagara; natuguao me‘olotodi ‘edasorega wa da me‘edi, ta natuguao me wainedi bare‘u ‘ana ‘ebelosaroniega;

⁷ ‘E bweuna ‘e bweuna si bwauiedi ‘agu esanega, ta tauna ia mweruruina ‘igu esaesa manuna; ni‘atu ia bubuna; tamo, ia mweruruina.

⁸ To matakebokebo mamatadi, ta to tenatui matenadi, wa da ‘au‘ewedima.

⁹ ‘Ebeloinao iauiaudi si da egogona rererea, ta tomota si da deriegogona: iaita ‘edia ‘i ewaiwai be gete ‘i da simana, ta gimi iageao ‘i da e‘ita ‘edaia? ‘adi to ‘itao si da me‘edi, be ‘enega si da eparuparu; nai si da nono, ta si da gwae, Tauna ona‘ai‘aila.

¹⁰ ‘Omi ‘igu to‐‘itao, Ieoba ‘i gwae, ta ‘igu to‐guinua tauna ia ‘esinua; be ‘enega wa da mwaratonigu ta wa da iaregu, ta wa da sinapuna ‘aene ‘Abo‘agu Tauna; nuganiguia nigea ‘e bweu Eaubada mwerumweruruina, ta gea‘abo ‘e bweu muriguia.

¹¹ ‘Abo‘agu, tuga ‘Abo‘agu, taugu Ieoba: ta ‘abo‘agu nigea, to‐‘etoseana nigea ‘e bweu.

¹² ‘Abo‘agu ni‘atu ia simana, ta ni‘atu ia ‘eto‘etoseana, ta ni‘atu ia e‘ita‘ita, ta nigea ‘e bweu eaubada dumadumana gamwagamwanimia: ta ‘enega ‘omi ‘igu to‐‘itao, Ieoba ‘i gwae, ta ‘abo‘agu Eaubada.

¹³ Tamo, asiata ‘i gimi apwesa ‘enega ‘Abo‘agu tauna; ta nigea ‘e bweu nimaguiega ‘i da ‘ewa‘ewa; ‘abo‘agu ia da guinua, ta iaita ‘i da ‘etobodena?

¹⁴ Ieoba, ‘imi to‐‘ewalimana, Iseraela ‘ina Tabu Tebweuna, gete nadigega ‘i gwae; Leleami Babulonia ‘ena ia etune, ta iauiaudi ia da ‘au‘ewa mwa‘utedi to denadena ‘atua, tuga me Kalidea, ‘idi guausoara ‘idi waga ‘edia.

¹⁵ ‘Abo‘agu Ieoba, ‘imi Tabu Tebweuna, Iseraela ‘ana To Mwerurua ‘imi King.

¹⁶ Gete nadigega Ieoba ‘i gwae, tauna ‘eda ‘i bubuna oraia, ta ‘eda gilelena boasi waiwai ‘edia;

¹⁷ Tauna saliote ta ose ‘i apwesedima, to losaia ta waiwai; si ‘eno‘eno rererea, gea‘abo si da tooro; si sawara, si kweu imo ‘atua:

¹⁸ Gimi iageao gea‘abo wa nua‘i‘isi, ta gea‘abo iage lowaeneiega wa da nuanua.

¹⁹ Wa ‘ita, iage auauna ia da guinua; gete ‘enega ‘i da apwesama: gea‘abo nai wa da mwaratonina? ‘Eda ia da bubu tuga mitawaia, ta boasi‐daudauiao kaukaudaisinamo ‘enaia.

²⁰ Mitawa ‘ina iobai si da ‘amaiabegu, warigoao be kasuweriao: boasiao ia sa‘u mitawaia manuna, ta boasi‐daudauiao kaukaudaisinamo ‘enaia, sabi enuma ‘igu tomota, ‘agu esi‘esinuao:

²¹ Tomota nidi ia bubudi manugu taugu, be ‘enega ‘agu tuputupu si da gieapwese.

²² Ta nigea ‘eguia ‘u bwau, Iakobo ie: ta ‘oio ‘u olilisanegu, Iseraela ie.

²³ ‘Imu ‘ebwaeadaita gabugabu ‘ina bulomakau me gidaridi nigea ‘u me‘ena ‘eguia; nai u ‘amaiabegu ‘imu tariao ‘ediega. Nigea ‘imu guinua ia sa‘u ‘ebwaeadaitao ‘ediega, nai ooio ia gienua mu‘anega.

²⁴ Tou nigea ‘u gimwani manugu maniega, nai ‘u loemaegu ‘imu tariao iapadiega: ta ‘oio ‘igu guinua ‘u sa‘u ‘imu loegesiao ‘ediega, oogu ‘u gienuena ‘imu bubuna bokobokodi ‘ediega.

²⁵ ‘Abo‘agu, tuga ‘abo‘agu, tauna ‘imu li‘oa‐loina ‘i kweudi manugu taugu; ta ‘imu loegesiao gea‘abo ia da nua‘i‘isidi.

²⁶ ‘U da gienua‘i‘isigu; ta da etara rererea; ‘imu iage ‘u da sa‘u apwesa, be ‘enega ‘u da paruparu.

²⁷ Gimi tamaio ‘i loegesi, ta ‘imu to‐gibuniona ‘eguia si li‘oa‐loina.

²⁸ Ta ‘enega anua tabu ‘ina ‘inapwanao ia da gibesobesodi, ta Iakobo ia da bubuna be i ‘e‘ebeelia, ta Iseraela ‘ebeba‘e.