Isaia 42 - Buki Tabu Lowaenei 1919

‘UPWA 42.

¹ ‘Igu ‘ari‘e wa da ‘ita, tauna a gi‘ete; ‘agu ‘esi‘esinua, tauna ‘ena iaruiaruagu ‘i guausoara: iaruiaruagu ia sa‘u ‘enaia; etara ‘i da me‘ena ‘Asa‐apwesa ‘edia.

² Gea‘abo ‘i da bwau, nai ‘i da gilagata, nai ‘enana ‘i da bubu be si da nonona ‘edaia.

³ Kigweruru lasalasana gea‘abo ‘i da pisarina, ta imo ‘asu‘asuna gea‘abo ‘i da kweuna: ‘etara ‘i da me‘ena ona ‘ai‘ailega.

⁴ Gea‘abo ‘i tabataba nai ‘i da ‘atesa‘ara, ga etara ‘i sa‘u bemi bare‘uia; ta saru ‘ina loina si da iamwaiamwai.

⁵ Gete nadigega Eaubada Ieoba ‘i gwae, tauna garewa ‘i mweruruidi, ta ‘i lisineasidi; tauna bare‘u ta iage ‘enega ‘i apwesa ‘i neasidi bababadi; tauna tomota ‘ena si miami iawasidi ‘i sa‘u, ta taudi ‘ena si lopilidadana iaruiaruadi i ‘ebwaedi:

⁶ ‘Abo‘agu Ieoba ni‘atu ia bwauiemu bubuna paruparuiega, ta nimaio ia da giiai, ta ia da ‘ita‘i‘isio, ta ia da ‘ebwaea‘eio tomota ‘idi ona‘upa‘upa manuna, ‘Asa‐apwesa ‘idi ma‘edana manuna;

⁷ Be mata kebokebodi ‘i da gigege, ioniionidi ‘i da me‘edi gogorega, ta taudi si miatoa guguioi ‘ena anua ‘ebeionega.

⁸ ‘Abo‘agu Ieoba; gote ‘agu esana: ta ‘igu esaesa gea‘abo wate ‘e bweu ‘ena ia da ‘ebwaea, nai ‘agu tuputupu tokwarui daiadaiagidi ‘edia.

⁹ Wa ‘ita, gimi iage ni‘atu si apwesa, ta iage auaudi ia simana: ‘idi apwesama nuganinaia ia simanedi ‘emia.

¹⁰ Wari auauna wa da wariei Ieoba ‘enaia, ta ‘ana tuputupu bare‘u ‘ana ‘ebelosaroniega; ‘omi wa mwa‘uta oraia, ta iage iauiauna ‘ena si miami, saruiao, ta ‘ana tomi.

¹¹ Mitawa ta ‘ina ‘asa ‘enadi si da gitu‘e, ‘asa gidaridi taudi Kedara ‘edia ‘i miami; Sela ‘ina tomi si da wari, si da bwau ‘oea debadia.

¹² Ieoba si da ‘awaeseesei, ta ‘ana tuputupu si da simana saru ‘edia.

¹³ Ieoba ‘i da apwesa tai waiwai ‘atua, e‘ipi‘ipi ‘i da giniuiei nadigega tai losaia; ‘i da bwau, tamo, ‘i da bwau toila, ‘i da guinua waiwai ‘ana tarauwarao ‘edia.

¹⁴ Tuta dudurana ia enono; ia emwa‘ule, ta ia ‘etobodegu: gete ‘enega ia da bwau waine edaedamina ‘atua; iawasigu ‘i da e‘upa ta ia da eiawasilagalaga rererea.

¹⁵ ‘Oea sinabwadi ta ‘oea gidaridi ia da loegumwaridi, ta ‘idi pwatura iauiauna ia da gie ‘oaperuiedi; ta boasi‐daudau ia da bubudi be si ‘esaruiao, ta sewasewa ia da gieiapasidi.

¹⁶ Ta matakebokebodi ia da me‘edi ‘eda nigea si mwaratoni ‘enega; ‘edao nigea si mwaratoni ‘edia ia da ‘au‘ewedi: guguioi ia da bubuna be ‘i ma‘edana matadia, ta esena bokobokodi be si paruparu. Iage getedi ia da guinua, ta gea‘abo ia da e‘idi‘idiedi.

¹⁷ Si da ‘iledi, si da omaiamaia sinabwana, taudi tokwarui daiadaiagidi edia si ‘emisa, taudi si gwae tokwarui ‘e‘urenidi ‘edia, ‘Omi ‘ima eaubadao.

¹⁸ ‘Omi tenatuituimi, wa da nono; ta ‘omi matakebokebomi, wa da dune, be ‘enega wa da ‘ita.

¹⁹ ‘Iaita wate ‘i matakebokebo, ‘igu toguinua tugai? nai ‘i tenatui, na‘ieana ‘igu topiliiareiare tauna ia etunena? Iaita ‘i matakebokebo nadigega tauna ‘i mia guguia ma‘ieagu, ta iaita ‘i matakebokebo na‘ieana Ieoba ‘ina to‐guinua?

²⁰ Iage iauiauna ‘u duneiedi, ta nigea u ‘itedi; tenana egegedi, ta nigea ‘i nono.

²¹ Ieoba ‘ena ‘i bobo‘ana ‘ina bubuna paruparu manuna, be loina i ‘awasinabwa‘ena, ta ‘ana ‘amaiaba ‘i sa‘u.

²² Ta gete tomota ‘ipwa‘ipwaridi ta ‘oae‘oaedi; iauiaudi si sikwedi gaula ‘edia, ta si miakwaia ‘anua ‘ebeiona ‘edia; taudi ‘ebe‘oae manuna, ta nigea ‘e bweu i ‘etoseedi; taudi ‘ebe‘ewa manuna, ta nigea ‘e bweu ‘i ona, ‘Ebwaea limana.

²³ Iaita ‘emia gete ‘i da nonona? tauna ‘i da enonotenasi ta ‘i da nono tuta ‘i mema manuna?

²⁴ Iaita Iakobo i ‘ebwaea ‘ebe‘oae manuna, ta Iseraela to‘ipwara ‘edia? nigea Ieoba nai? Tauna ‘ena ni‘atu ta loegesi, ta tauna ‘ina ‘edao nigea ‘edia si da tauia, nai ‘ina e‘ita ‘ena si ematamatana.

²⁵ Ta ‘enega ‘ina gamwasoara ‘ana iaiiai, ta saia ‘ana pa‘ara ‘i siwa ‘enaia; ta ‘i loe‘abi sakowasiena, ta nigea ‘i sinapuna: ta i ‘arasina, ta nigea ‘i sa‘u ‘atenaia.