Isaia 41 - Buki Tabu Lowaenei 1919

‘UPWA 41.

¹ Mataguia wa da enono, ‘Omi saru ie; ta tomotaiao ‘idi pa‘ara si da ‘ewa limena: si da mai deiguia; ga si da ona: ta da deriegogona etara deinaia.

² Iaita ‘e bweuna ‘i gietooro bomatuiega, tauna ‘i bwau bubuna paruparuiega ‘aenaia? ‘ebeloinao i ‘ebwaea matanaia, ta loina kiniao debadia ‘i sa‘u ‘enaia; i ‘ebwaedi kau ‘atua ‘ina sisi‐saia ‘ena, ‘atua sumwana losiesie ‘ana tupu ‘enaia.

³ ‘I pa‘idi, ta ‘i taona bobo‘ana; tuga ‘eda ‘enega nigea ‘enega ‘i tauia ‘aenega.

⁴ Iaita ‘i mwerurua ta ‘i guinuena, epatatomota ‘i bwauiedi nuganega? ‘Abo‘agu Ieoba, nuganigu, ta to muri ma‘ieana, ‘abo‘agu tauna.

⁵ Saru si ‘ita, ta si matauta; bare‘u ‘ana ‘ebelosaroniao si dedera: si doroma, ta si mai.

⁶ ‘E bweuna ‘e bweuna gosiana si lemena; ta ‘e bweuna ‘e bweuna tasina ‘ena ‘i gwae, Wa da ‘atepatu.

⁷ Ta ‘enega to‘abianua to bubugola ‘i lemei, ta tauna loperega ‘i gienonokwaikwaia tauna ‘i tutu ‘ebetutu ‘ena, ‘i gwae bwada kainumu manuna, ‘I bobo‘ana: ta neiliega i ‘e‘etoiaina, be gea‘abo ‘i da loniu.

⁸ Ta ‘oio, Iseraela, ‘igu ‘ari‘ei, Iakobo tauna ia ‘esinuena, Aberaamo gosiagu tubuna;

⁹ ‘Oio ia giiaimu bare‘u ‘ana ‘ebelosaroniao ‘ediega, ta ia bwauiemu tupitupinao ‘ediega, ta ia eonaio, ‘Oio ‘igu ari‘ei, ia ‘esinuemu ta nigea ia ‘ula iaulemu;

¹⁰ Gea‘abo ‘u matauta, ‘abo‘agu ma‘ieaio ta ‘enega; gea‘abo u ‘atesa‘ara, ‘Abo‘agu ‘imu Eaubada ta ‘enega: ‘imu pa‘ara ia da sa‘u; tamo, ia da lemeio; tamo, ia da gi‘eteio ‘igu bubuna paruparu nina ‘atainega.

¹¹ U ‘ita, iauiaudi nuadi ‘i to‘umali ‘emuia si da omaiamaia ta si da loniu: taudi wa e‘upwa ma‘ieaio si da nadigega nigea ‘e bweu, ta si da saoora.

¹² ‘U da ‘ebesedi, ta nigea ‘u da lobalobadi, tuga taudi wa e‘upwa ma‘ieaio: taudi si losaia ‘emuia si da na‘ieana nigea ‘e bweu, ta na‘ieana iage besobeso.

¹³ ‘Abo‘agu Ieoba ‘imu Eaubada ‘ataio ia da giiai ta ‘enega, ia da gwae ‘emuia, Gea‘abo ‘u matauta; ia da lemeio.

¹⁴ Gea‘abo wa matauta, ‘oio didimwana Iakobo, ta ‘omi tai Iseraela; ia da lemeio, Ieoba ‘i gwae, ta ‘imu to‐e‘isa‐limana tauna Iseraela ‘ina Tabu Tebweuna.

¹⁵ U ‘ita, ia da bubuio be u ‘ebetutu mamatana auauna masarana: ‘oea ‘u da sapidi, ta ‘u da tutudi matagidarina, ta ‘oea gidaridi ‘u da bubudi sumwana ‘stua.

¹⁶ ‘U da louweuwenunudi, ta iagila ‘i da ‘ewa iauledi, ta bwawabwawa ‘i da lelewanedi: ta ‘u da guausoara Ieoba ‘ena, ‘u da lotuputupu Iseraela ‘ina Tabu Tebweuna ‘enaia.

¹⁷ Gomabeso ta nanaewadi boasi si ‘ebesa ta nigea ‘e bweu ‘i miami, ta meiadi ‘i taba tonaadi ‘i iapasa manuna; ‘Abo‘agu Ieoba ‘edia ia da ona limana, ‘abo‘agu Iseraela ‘ina Eaubada nigea ia da e‘idi‘idiedi.

¹⁸ ‘Oea daisidimo ‘edia boasi‐daudauna ia da gigege, ta wewerupwao sa‘ara gamwagamwanidia: mitawa ia da bubuna be ‘i sewasewa boasi, ta bwa‘a iadaiadana wewerupwa‐boasi.

¹⁹ Maruana be, kaiwe akasia be, matele be, kaiwe olibe be, ia da ‘asodi mitawaia; ta kaukaudaisinamo ‘ena keigwana be, damanu be, saiperesa be, ia da ‘asodi rererea;

²⁰ Be ‘enega si da ‘ita, ta si da mwaratoni, ta si da nuanua, ta si da sinapuna rererea, ‘aene Ieoba nimana iage gete ‘i guinua, ta Iseraela ‘ina Tabu Tebweuna ‘i mweruruina.

²¹ ‘Imi ona ‘arena wa da giapwesenama, Ieoba ‘i gwae; ‘imi ona pa‘ara ‘aredi wa da ‘ewedima, Iakobo ‘ina King ‘i gwae.

²² Si da ‘au‘ewedima, ta ‘emaia si da simana to‘ase ‘i da apwesa: gimi iage wa da simana ‘emaia, to‘ase taudi, be ‘a da nuedi, ta ‘idi ‘ebelosaroni ‘a da mwaratoni; nai ‘emaia wa da e‘ita iage si da mai.

²³ Iage si da mai murinaia wa da simanedi, be ‘enega ‘a da mwaratoni ‘omi eaubadao: tamo, iage bobo‘ana wa da guinua, nai iage to‘umalina wa da guinua, be ‘enega ‘a da ‘atesa‘ara, ta ‘a da ‘itena rererea.

²⁴ Wa ‘ita, ‘omi nigea ‘e bweu, ta ‘imu guinua nigea ‘e bweu: tauna i ‘esinuemi ‘i gadilulu.

²⁵ ‘E bweu ia gietooro iaaratega, ta ni‘atu ‘i mai; sinara ‘ina sae ‘e bweu tauna ‘agu esana i ‘inana: ta to‐loinao ‘edia ‘i da mai na‘ieana bwada ‘enaia, ta na‘ieana tobubu‐‘urena bwa‘a i ‘aiaina.

²⁶ Iaita ‘i simanena nuganega, be ‘enega ‘a da mwaratoni? Ta gimi tutega, be ‘enega ‘a da gwae, Tauna ‘i paruparu? tamo, nigea ‘e bweu ‘i simana, tamo, nigea ‘e bweu ‘i e‘ita, tamo, nigea ‘e bweu ‘imi ona ‘i nonodi.

²⁷ Nugana ia da ona Siona ‘ena, Wa ‘ita, wa ‘itedi; ta ‘e bweu tetera bobo‘ana ‘i me‘ena Ierusalema ‘ena ia da ‘ebwaea.

²⁸ Ta ni‘atu ia ‘ita, ta nigea ‘e bweu tai; tuga gamwagamwanidia nigea ‘e bweu to‐onaleme, be ‘enega ‘ena ia eonedi, ona ‘e bweu ‘i da ona‐limena.

²⁹ Wa ‘ita, iauiaudi, ‘idi guinua iage besobeso ta nigea ‘e bweu; ‘idi tokwarui ‘eurenidi si ‘e iagila ta ‘ebeloniu.