Isaia 40 - Buki Tabu Lowaenei 1919

‘UPWA 40.

¹ Wa da gienuabobo‘anedi, ‘igu tomota wa da gienuabobo‘anedi, ‘imi Eaubada ‘i gwae.

² Ierusalema ‘atena ‘ena wa da ona, ta ‘ena wa da bwau, ‘ana tuta saia ni‘atu ‘i gumwara, ‘ina bubuna bokobokona ni‘atu ‘i kweu; ni‘atu Ieoba nimanega ‘e rua si ‘ewena ‘ina loegesi iauiauna manudi.

³ ‘E bweu ‘i bwaubwau ‘enana, Mitawaia Ieoba ‘ana ‘eda wa da kakari, kaukaudaisinamo ‘ena ‘eda sinabwana wa da gienonokwaikwaia ‘ida Eaubada manuna.

⁴ Sa‘ara ‘e bweuna ‘e bweuna ‘i da elomiatu‘e, ta ‘oea sinabwadi ta ‘oea gidaridi ‘e bweuna ‘e bweuna ‘i da ‘elomwa‘uta: ta bokoboko ‘i da eparuparu, ta esena dakadaka si da enonokwaikwaina:

⁵ Ta Ieoba ‘ina esaesa ‘i da apwesa, ta esio iauiauna si da ‘itena rererea: Ieoba ‘awana ‘i onena ta ‘enega.

⁶ ‘E bweu ‘i gwaegwae ‘enana, Wa da bwau. Ta ‘e bweu ‘i gwae, To‘ase ia da bwau? Esio iauiauna nedu, ta ‘ina bobo‘ana maibo‘ana na‘ieana bagura ‘ina senina:

⁷ Nedu i ‘oape‘oaperu, senina ‘i medamedari; Ieoba uweuwenununa ‘ena ‘i toa ta ‘enega: ona ‘ai‘aila tomota nedu.

⁸ Nedu i ‘oape‘opaeru, senina ‘i medamedari: ta ‘ida Eaubada ‘ina ona ‘i da tooro ‘ataia.

⁹ ‘Oio tetera bobo‘ana ‘u etetera Siona ‘ena, ‘u da tu‘e ‘oea kesora ‘enaia; ‘Oio tetera bobo‘ana ‘u etetera Ierusalema ‘ena, ‘enaio ‘u da gitu‘eiei waiwaiega; ‘u da gitu‘eiei, gea‘abo ‘u matauta; Iuda ‘ina ‘asa ‘edia ‘u da gwae, Wa ‘ita, ‘imi Eaubada!

¹⁰ Wa ‘ita, ‘Inapwana Eaubada ‘i da mai to ewaiwai na‘ieana, ta nimana ‘i da loina tauna manuna; wa ‘ita, ‘ina tamapu ma‘ieana; ta ‘ina e‘isa matanaia.

¹¹ ‘Ina sipiao ‘i da e‘enidi to‐‘ita‘i‘isi‐sipi ‘atua, ‘ina lamiao ‘i da egogona nimana ‘enaia, ta lumalumana ‘ena ‘i da ‘a‘aridi, ta taudi si giesusu ‘i da ‘au‘ewa manua‘edi.

¹² Iaita boasi i ‘etopwapwa nima gomwagomwana ‘enaia, ta garewa i ‘etopwapwa nimanega, ta bare‘u ‘ina kau ‘i mwaratonina keiga ‘ena, ta ‘oea ‘i kugedi ‘ebekuge ‘edia, ta ‘oea gidaridi ‘ebemwau ‘edia?

¹³ Iaita Ieoba iaruiaruana i ‘eguiai, nai ‘ina to‐onaona be ‘i e‘itena?

¹⁴ Iaita ma‘ieana si onaona, ta iaita ‘i e‘itena, ta loina ‘ina ‘eda ‘ena ‘i e‘itena, ta mwaratoni ‘i e‘itena, ta sinasinapu ‘ina ‘eda ‘i e‘itena?

¹⁵ Wa ‘ita, ‘ebeloinao ‘atua baketa ‘ina pesu, ta si sawedi ‘atua ‘ebekuge ‘ina kau gidarina: wa ‘ita, saru ‘i gilagasidi na‘ieana iage togidarasana.

¹⁶ Ta Lebanona nigea sawesawenaia be i ‘arasi, nai ‘ina iobai sawesawedia ‘ebwaeadaita gabugabu manuna.

¹⁷ ‘Ebeloina iauiauna ‘atua nigea ‘e bweu matanaia; si sawedi ‘enaia iage nigea ‘e bweu ta iage besobeso.

¹⁸ ‘Enega iaita Eaubada wa da ‘awanadigega‘ena? Nai to ma‘ama‘aiau wa da ‘ita‘esi‘esinua ma‘ieana?

¹⁹ Tokwarui daiadaiagina, to guinua i ‘e‘urenina, ta tobubugola ‘i pomena golega, ta ‘aupa sileba ‘i bubudi manuna.

²⁰ Tauna ‘i gomabeso wawasae ‘ebwaeadaita nadigega manuna kaiwe nigea ‘i da bila i ‘esinuena; tauna ‘ena i ‘ebesa to guinua panapana‘isina be tokwarui daiadaiagina ‘i gietooro, tauna gea‘abo ‘i da loniu.

²¹ Nigea wa mwaratoni nai? Nigea wa nonona nai? nigea nai si simana ‘emia nuganega? Nigea nai wa sinapuna bare‘u ‘ina ‘autuiao ‘ediega?

²² Tauna ‘i miatoa bare‘u ‘ana mweii debanaia, ta ‘ana tomi nadigega gipawa; tauna garewa ‘i lisidi kaleko ‘atua, ta ‘i loneasidi ‘atua anuanaia ‘ena si miami:

²³ Tauna ‘inapwanao ‘i bubudi ga si nigea ‘e bweu, bare‘u ‘ana toloinao ‘i bubudi be si iage besobeso ‘atua.

²⁴ Tamo, nigea si ‘asodi; tamo, nigea si lolelewanedi; tamo, ‘aredi nigea ‘i ramuramu bare‘u ‘enaia: wate ‘edia ‘i mu‘eunu ta si ‘oaperu, ta bwawabwawa i ‘ewa‐iauledi sumwana ‘atua.

²⁵ ‘Enega iaita ‘ena wa da ‘awanadigega‘egu, be ia da erererea ma‘ieana? To Tabu Tebweuna ‘i gwae.

²⁶ Wa da ‘ita tu‘e tabwanaia, ta tauna getedi ‘i mweruruidi wa da ‘ita, tauna ‘idi boda i ‘ewa‐apwesa nigea ‘adi sawamo: iauiaudi ‘i bwauiedi ‘adi esanega; ‘ina waiwai ‘ana sinabwana ‘enega, ta ‘i pa‘ara ‘ina waiwaiega manuna, nigea ‘e bweu ‘i kakaena.

²⁷ Toase manuna ‘u ona, Iakobo ie, ta ‘u gwae, Iseraela ie, ‘Igu ‘eda ‘i mia kwaia Ieoba ‘enega, ta ‘igu etara ‘i sawara ‘igu Eaubada ‘enega?

²⁸ Nigea nai ‘u mwaratoni? Nigea nai ‘u nono? Eaubada miaataia, Ieoba, bare‘u ‘ana ‘ebelosaroniao ‘adi Tomwerurua, nigea ‘i tabataba, ta nigea ‘i lo‘ame‘ame; ‘ina sinasinapu nigea ‘e bweu i ‘ebesa.

²⁹ To tabataba waiwai i ‘ebwaedi; ta tauna nigea ‘e bweu ‘ina waiwai pa‘ara ‘i giesinabwa ‘enaia.

³⁰ Tubuau tuga oodi ‘i da taba ta si da lo‘ame‘ame, ta tai tubulagalaga si da be‘u ‘ai‘aila:

³¹ Ta taudi Ieoba ‘ena si iamwaiamwa taudi ‘idi pa‘ara si da ‘ewa limena; si da tu‘e pape ‘ediega ‘atua magisubu; si da pili, ta gea‘abo si da lo‘ame‘ame; si da tautauia, ta gea‘abo oodi ‘i da taba.