Isaia 39 - Buki Tabu Lowaenei 1919

‘UPWA 39.

¹ Tuta gote Merodakabaladana tauna Baladana natuna, tauna Babulonia ‘ana king, leta ta ‘ebwaeadaita ‘i etunedi Esekia ‘ena: ‘i nono ‘aene ‘i le‘oasa, ta ‘i bobo‘ana limana ta ‘enega.

² Ta Esekia ‘i guausoara manudi, ta ‘ina iage bobo‘ai‘ailidi ‘idi anua ‘i e‘ita ‘edia, sileba be, gola be, mu‘ana be, bunama bobo‘ai‘ailina be, ‘ina ‘ebesaia ‘ana anua maibo‘ana be, iage iauiauna si miami ‘ina gwegwe ‘edia be; nigea ‘e bweu iage ‘i miamia ‘ina anuaia, nai ‘ina ‘ebeloina maibo‘ana ‘enaia, Esekia nigea ‘i e‘ita ‘edia.

³ Ga Isaia paropita king Esekia ‘ena ‘i mai, ta ‘ena ‘i ona, To‘ase tai getedi si gwae? ta mwa‘adega si mai ‘emuia? Ta Esekia ‘i gwae, ‘Asa ‘edasorega si mai ‘eguia, tuga Babuloniega.

⁴ Ga ‘i ona, To‘ase si ‘ita ‘imu anua ‘enaia? Ta Esekia ‘i ona limana, Iage iauiauna ‘igu anua ‘enaia ni‘atu si ‘ita: nigea ‘e bweu iage ‘igu gwegwe gamwagamwanidia nigea ia e‘ita ‘edia.

⁵ Ga Isaia ‘i gwae Esekia ‘ena, Bodao ‘idi Ieoba ‘ina ona ‘u da nono.

⁶ U ‘ita, asiata si memai, ga iage iauiauna ‘imu anuaia, ta tauna tubumuao si sa‘u egogona ga batua, si da ‘a‘aridi Babulonia ‘enaia: gea‘abo ‘e bweu iage ‘i da tupwa, Ieoba ‘i gwae.

⁷ Ta natumuao me‘olotodi taudi ‘emuiega si da apwesa, taudi ‘u da enatunedi, si da ‘ewa iauledi; ta si da eunukao Babulonia ‘ana king ‘ina anua esaesa ‘enaia.

⁸ Ga Esekia ‘i ona Isaia ‘ena, Ieoba ‘ina ona ni‘atu ‘u onena ‘i bobo‘ana. Wate ‘i gwae, Guguia ta ona‘ai‘aila si da miami ‘igu asiatao.