Isaia 38 - Buki Tabu Lowaenei 1919

‘UPWA 38.

¹ Asiata gotedi Esekia ‘i le‘oasa i ‘abe ‘i mwawasa. Ta Isaia paropita Amosa natuna ‘ena ‘i mai, ta ‘ena ‘i ona, Ieoba gete nadigega ‘i gwae, ‘Imu anua ‘u da sa‘u ‘ai‘aili; ‘u da mwawasa ta ‘enega, ta gea‘abo ‘u da bobo‘ana.

² Ga Esekia maninina ‘i sana‘ila pita ‘enaia, ta Ieoba ‘ena i ‘awanoi,

³ Ta ‘i gwae, Ieoba ie, ia sideio, gete ‘enega ‘u da nua‘i‘isi, matamuia ia tauia ona‘ai‘ailega ta ‘ate bobo‘ai‘ailinega, ta iage ‘i bobo‘ana matamuia ia guinuena. Ta Esekia ‘i dedoi didiga.

⁴ Ga Ieoba ‘ina ona ‘i mai Isaia ‘ena, ‘i gwae,

⁵ ‘U da tauia, ta Esekia ‘ena ‘u da ona, Ieoba tamaio Dabida ‘ina Eaubada, gete nadigega ‘i gwae, ‘Imu ‘awanoi ni‘atu ia nonona, ‘imu mataseru ni‘atu ia ‘itedi: u ‘ita, ‘imu asiata ‘edia ia da loeposeana iakwara e pipitini.

⁶ Ta ‘oio ta ‘asa gete ia da ‘etoseemi Asiria ‘ana king nimanega: ta ‘asa gete ia da didigena.

⁷ Ta gete ‘i da we‘iwe‘iiaia ‘emuia Ieoba ‘enega, be ‘enega Ieoba iage gete ni‘atu ‘i ona ‘i da guinuena:

⁸ U ‘ita, Iauiaukwa ‘ebemwera ‘edia, tauna ‘i mwa‘uta sinara ma‘ieana Aasa ‘ina ‘etopwapwa ‘enaia, ia da bubuna be ‘i da ‘ilawa ‘ebemwera sanau. Ga nadigega sinara i ‘ilawa ‘ebemwera sanau ‘etopwapwa nina ‘ena ‘i mwa‘uta ‘enaia.

⁹ Esekia Iuda ‘ana king ‘ina ‘etoladi, ‘ena ‘i le‘oasa, ta ‘ina le‘oasega ‘i bobo‘ana.

¹⁰ Ia ona, ‘Igu asiata ‘adi asu‘ore‘ore ‘enega ‘ari‘ari ‘ana ‘eberugu ‘edia ia da rugu; ‘Agu iakwara tupwadi ia loseedi.

¹¹ Ia ona, Ieoba gea‘abo ia da ‘itena, tuga Ieoba maiawasidi ‘idi ‘asa ‘enaia: Gea‘abo wate tai ia da ‘itena gabura ‘ana tomi ma‘edi.

¹² ‘Agu tuta ni‘atu ‘i tauia, ta ‘eguiega si tauiena ‘atua to‐‘ita‘i‘isi‐sipi ‘ina ‘etoioburu; Iawasigu ia nunumina towasiwasi nadigega; ‘ebewasiwasiega ‘i da ‘upwaiaulegu; Asiata ‘enega ga boiboi ‘u da loegumwariguia.

¹³ Ia mia‐‘emwa‘ule ga gonagonaia; ‘atua laione, nadigega luluguao iauiauna ‘i lasedi: Asiata ‘enega ga boiboi ‘u da loegumwariguia.

¹⁴ Nadigega didibeabea nai boe, nadigega ia gwanegwane: Ia ‘ewabamu bunetutu ‘atua: matagu si taba ‘ita tu‘e ‘enega: Ieoba ie, ia mia mwa‘uta, ‘oio ‘u da ‘igu ‘ebebobo‘ana.

¹⁵ To‘ase ia da gwae? Ni‘atu ‘i ona ‘eguia, ta ni‘atu tauna ‘i guinuena ruarua; Ia da tauia manuaegu ‘igu iakwara iauiauna iaruiaruagu ‘ina darere manuna.

¹⁶ ‘Inapwana ie, iage getedi ‘ediega tai si bobo‘ana, Ta maibo‘ana ‘ena iaruiaruagu iawasina ‘ena ‘i miami: Ta ‘enega ‘u da giebobo‘ana limegu, ta iawasigu ‘u da sa‘u.

¹⁷ U ‘ita, darere sinabwana ia ‘ewena miaenono manuna: Ta oboboma iaruiaruagu ‘ena ‘enega ‘u ‘etoseena mwa‘ulu ‘ina gaulega; ‘Igu loegesi iauiaudi ni‘atu u ‘uledi guaumuia ta ‘enega.

¹⁸ ‘Ari‘ari gea‘abo ‘i da tupuio ta ‘enega, mwawasa gea‘abo ‘i da ‘awabobo‘aneio: Taudi gaula ‘ena si mwa‘uta gea‘abo si da nuaiai ‘imu ona‘ai‘aila manuna.

¹⁹ Maiawasina, maiawasina, tauna ‘i da tupuio, na‘ieana ‘abo‘agu batua: Tamadi natunao ‘edia ‘imu ona‘ai‘aila ‘i da e‘ita.

²⁰ Ieoba ‘i abe ‘i da ‘etoseegu: Ta ‘enega ‘igu wari ta da wari ‘ebebinobinoo mamarakwadi ‘edia Iawasida ‘ana asiata iauiauna Ieoba ‘ina anua ‘enaia.

²¹ Ta Isaia gete ‘i gwae, Bwainono mapulina si da ‘ewa, ta si da sa‘u be ‘i bwada lalawaa ‘ena, ta ‘i da bobo‘ana limana.

²² Esekia wate ‘i gwae, To‘ase we‘iwe‘iiaia be ‘enega ia da tu‘e Ieoba ‘ina anua ‘enaia?