Isaia 37 - Buki Tabu Lowaenei 1919

‘UPWA 37.

¹ Ta gete ‘i apwesa, ni‘atu king Esekia ‘i nonona, ga ‘ana ‘oama ‘i sabudi, ta ‘oama ‘oausa ‘enega ‘i e‘otena, ta Ieoba ‘ina anua ‘ena ‘i rugu.

² Ta Eliakima, tauna anua ‘ana to loina, ta Sebena to‐‘etoladi, ta to‐taria ‘ina‘inapwanidi, ‘oama ‘oausa si e‘otena, Isaia paropita Amosa natuna ‘ena ‘i etunedi.

³ Ta si eonena, Gete nadigega Esekia ‘i gwae, Asiata gete asiata loniu, ta asiata elia, ta asiata ‘ebesinara: gogama i ‘abe si tubua, ta nigea waiwai be si da enatunedi.

⁴ Nai Ieoba ‘imu Eaubada Rabasakei ‘ina ona ‘i da nonodi, tauna ‘ina ‘inapwana Asiria ‘ana king ni‘atu ‘i etunena be Eaubada maiawasina ‘i ba‘ena, ta ona nidi Ieoba ‘imu Eaubada ‘i nonodi ‘i da ba‘edi: ta ‘enega ‘imu sidasida ‘u da gitu‘e tupwana ‘i miami manuna.

⁵ Nadigega king Esekia ‘ina to‐guinuao si mai Isaia ‘ena.

⁶ Ta Isaia ‘i eonedi, Gete nadigega wa da ona ‘imi ‘inapwana ‘enaia, Gete nadigega Ieoba ‘i gwae, Ona nidi wa nonodi gea‘abo wa matauta manudi, taudi ona nidi ‘ediega Asiria ‘ana king ‘ina to‐guinuao si ona besobeso ‘eguia.

⁷ Wa ‘ita, iaruiarua ia da sa‘u rugu ‘enaia, ta ‘are ‘i da nonona, ta ‘ina ‘asa tauna ‘ena ‘i da ‘ila; ta ia da loina be sisisaiega ‘i da be‘u tauna ‘ina ‘asa ‘enaia.

⁸ Nadigega Rabasakei i ‘ila, ta Asiria ‘ana king ‘i loba ‘i losaia Libina matanaia: ‘i nonona ‘aene Lakisa ‘i pilisinena ta ‘enega.

⁹ Ta ona ‘i nonona Tiraka Aitiope ‘ana king manuna, Ni‘atu ‘i apwesama sabi saia ‘emuia. Ta ni‘atu ‘i nonona ga topiliiareiare ‘i etunedi Esekia ‘ena, ‘i gwae,

¹⁰ Gete nadigega wa da ona Esekia Iuda ‘ana king ‘ena, wa da gwae, Gea‘abo ‘imu Eaubada tauna ‘ena u ‘emisa ‘i da kaboemu, ‘i gwae, Ierusalema gea‘abo si da ‘ebwaea Asiria ‘ana king nimanaia.

¹¹ Wa ‘ita, ni‘atu ‘u nono iage Asiria ‘ana kiniao si guinua ‘asa iauiauna ‘edia, si giesaoora ‘ai‘ailidi: ta ‘oio si da ‘etoseeio?

¹² Ebeloinao ‘idi eaubadao si ‘etoseedi nai, taudi tamaguao si loegumwaridi, Gosana, Arana be, Resepa be, Edena natunao be taudi Telasara ‘ena si miami?

¹³ Amata ‘ana king mwa‘onai, Aripada ‘ana king be, ‘asa Sepabaima ‘ana king be, Iena ‘ana king be, Iba be?

¹⁴ Ta Esekia leta nina i ‘ewena topiliiareiare nimadiega, ta ‘i sawena: ta Esekia ‘i tu‘e Ieoba ‘ina anua ‘enaia, ta Ieoba matanaia ‘i neasina.

¹⁵ Ta Esekia ‘i sidasida Ieoba ‘enaia, ‘i gwae,

¹⁶ Bodao ‘idi Ieoba ie, Iseraela ‘ina Eaubada, ‘Oio ierubima ‘edia ‘u miatoa, ‘oio bare‘u ‘ina ‘ebeloina iauiauna ‘idi Eaubada, tuga tebweuio; ‘oio garewa ta bare‘u ‘u mweruruidi.

¹⁷ Ieoba ie, ‘u da enonotenasi, be ‘u da nono; Ieoba ie, mataio ‘u da ebari, be u ‘ita; ta Senakeriba ‘ina ona iauiauna ‘u da nonodi, tauna ‘i etune be Eaubada maiawasina ‘i da ba‘ena.

¹⁸ Ona ‘ai‘aila, Ieoba, Asiria ‘ana kiniao ni‘atu ‘asa iauiauna si mudaridi, ta ‘idi bwa‘a,

¹⁹ Ta ‘idi eaubadao si ‘uledi ‘awe ‘enaia; taudi nigea eaubadao ta ‘enega, ta tai nimadi ‘idi ‘ebeguinua, kaiwe ta gurewa; ta ‘enega si loegumwaridi.

²⁰ Ta ‘enega, Ieoba ie ‘ima Eaubada, gete ‘enega ‘u da ‘etoseema nimanega, be ‘enega bare‘u ‘ina ‘ebeloina iauiauna si da mwaratoni ‘aene ‘oio Ieoba, tuga tebweumumo.

²¹ Ga Isaia Amosa natuna Esekia ‘ena ‘i etune, ‘i gwae, Ieoba gete nadigega ‘i gwae, Iseraela ‘ina Eaubada, ‘U sida ‘eguia Senakeriba Asiria ‘ana king manuna,

²² Ta ‘enega gete ona nina tauna Ieoba ‘i gwae leleana: Siona natuna mewainena nuaebora ‘i sinariio ta ‘i edagiemu sabi tuiea; Ierusalema natuna me wainena ‘i lonepanepa ‘emuia.

²³ Iaita ‘u ba‘ena ta ‘u ona besobeso‘ena? Ta iaita manuna ‘enaio ‘u gitu‘eiei ta matamuiega u ‘ita tu‘e tabwanaia? tuga Iseraela ‘ina Tabu Tebweuna ‘enaia.

²⁴ ‘Imu to‐guinuao ‘ediega ‘Inapwana ‘u ba‘ena, ta ‘u ona, ‘Igu salioteao ‘adi iau ‘enega ia tu‘ema ‘oeao ‘idi kesora ‘enaia, Lebanona ‘ina esenao si mia soranaia; ta maruanina duduradi ia da tara mwa‘uta, ta kaiwena keigwana bobo‘ai‘ailidi: ta ‘ana kesora sana ‘ena ia da rugu, bagurina ualoebwaina o‘enina.

²⁵ Ia sala ta ia numa boasi, ta ‘aeiapaiapagu ‘enega Aigupito boasina daudauna iauiauna ia da gieiapasa.

²⁶ Nigea na ‘u nonona lowaenei ia guinuena, ta gimi tutao ‘ediega ia mweruruina? gete ‘enega ia gieapwesena, be ‘oio ‘u miami be ‘asa ma‘adi ‘arigurewa ‘u giesawaridi ga si esa‘u epopo mudamudaridi.

²⁷ Ta ‘enega ‘idi tomia si ewaiwai gidarina, si ‘atesa‘ara ta si nuaowana; taudi nadigega bagura neduna, ta nadigega pwatura karakarawina, nadigega nedu anua debadia, ta nadigega bagura‐witi nigea ‘i tabwa tu‘e.

²⁸ Ta ‘imu miatoa ia mwaratonina, ta ‘imu apwesa, ta ‘imu ruguma, ta ‘imu egamwagamwagu ‘eguia.

²⁹ ‘Imu egamwagamwagu ‘eguia leleana, ta ‘imu gagasa tenagu ‘edia ‘i tu‘ema manuna, ta ‘enega ‘igu dilu ubusuio ‘ena ia da sa‘u, ta ‘igu ‘ebe‘etobode sopaio ‘edia, ta ia da giesana‘ileio ‘eda ‘enega ‘u mai.

³⁰ Ta gete ‘i da we‘iwei‘iaia ‘emuia; iakwara gete iage tauna ‘i tabwa ‘u da ‘e‘ai, ta iakwara ‘e ruena iage tauna ‘enega ‘i tabwa; ta iakwara ‘e tonina ‘enega wa da lelewana, ta wa da sesoi, ta baguraoine wa da ‘aso, ta uanega wa da ‘e‘ai.

³¹ Ta tupwana Iuda ‘ina susu taudi si dena ramudi si da sa‘u limana, ta si da uaua tu‘e.

³² Ierusalemega tupwana ‘i da apwesa ta enega, ta ‘oea Sionega taudi si da dena; bodao ‘idi Ieoba ‘ina waiwai iage gete ‘i da bubuna.

³³ Ta ‘enega gete nadigega Ieoba ‘i ona Asiria ‘ana king manuna, Gea‘abo ‘asa gete ‘ena ‘i da mai, nai gita ‘i da tupu ‘enaia, nai matanaia ‘i da mai lawa ‘enega, nai ‘oea ‘i da siwa matanaia.

³⁴ ‘Edega ‘i mai, nadigega ‘enega ‘i da ‘ila, ta ‘asa gete gea‘abo ‘ena ‘i da mai, Ieoba ‘i gwae.

³⁵ ‘Asa gete ia da lemena ta ‘enega be ia da ‘etoseena, taugu manuna, ta ‘igu to‐guinua Dabida manuna.

³⁶ Ta Ieoba ‘ina anelose ‘i apwesawa, ta me Asiria ‘idi ‘ebe‘eno ‘ena ‘i unudi wan anaredi ta eti paibe tausana: ta ni‘atu tai si tooro manini gonagonaia, ga wa ‘ita, iauiaudi kokoa mwawamwawasidi.

³⁷ Nadigega Senakeriba Asiria ‘ana king ‘i tauia ta i ‘ila, ta Ninebe ‘ena i miami.

³⁸ Ta gete ‘i apwesa, ‘i bwagobwago Nisiroka ‘ina eaubada ‘ina anua ‘enaia, ga natunao me‘olotodi Adarameleka ta Saresera si ununa sisisaiega: ta ‘asa Ararata ‘ena si dena. Ta natuna Esaradona ‘i loina ‘ana lopa‘eru.