Isaia 36 - Buki Tabu Lowaenei 1919

‘UPWA 36.

¹ King Esekia ‘ina iakwara ‘e potini nina gete ‘i apwesa, Senakeriba Asiria ‘ina king ‘i tu‘ema Iuda ‘ana ‘asa iauiauna ma‘idi ‘ari matadia, ta i ‘ewedi.

² Ta Asiria ‘ana king Rabasakei ‘i etunena Lakisega Ierusalema ‘ena king Esekia ‘ena boda‐saia sinabwana ma‘ieana. Ta ‘i tooro sewasewa lo‘etana ‘ina ‘ebedau deinaia to lo‘utu ‘ina esena ‘ina ‘eda sinabwana ‘enaia.

³ Ga si apwesama ‘enaia Eliakima Ilikia natuna, tauna anua ‘ana to‐loina, Sebena to‐‘etoladi be, Ioaa Asapa natuna to‐‘etoladi‐tetera be.

⁴ Ta Rabasakei ‘i eonedi, Gete ‘enega wa da ona Esekia ‘ena, Gete nadigega king sinabwana, Asiria ‘ana king, ‘i gwae, To nuaiai gete ‘ena u ‘emisa?

⁵ ‘Abo‘agu ia ona, ‘imu nuanua ta ‘imu pa‘ara saia manuna si e ona besobesodimo: gete ‘enega iaita ‘ena u ‘emisa, ta ‘enega ‘eguia ‘u loguitoasa?

⁶ ‘U ‘ita, guna kigweruru ewearina gete ‘ena u ‘emisa, tuga Aigupito ‘enaia; tauna ‘abo tai ‘ena ‘i tugadara, nimana ‘ena ‘i da rugu, ta ‘i da badibwarena: nadigega Parao Aigupito ‘ana king iauiaudi si ‘emisena ‘enaia.

⁷ Ta ‘abo ‘u ona ‘eguia, Ieoba ‘ima Eaubada ‘ena a ‘emisa: nigea nai tauna, ‘ina esena kesorana ta ‘ina ‘ebetariao Esekia ‘i ‘ewa iauledi, ta Iuda ‘ena ta Ierusalema ‘ena ‘i gwae, Wa da bwagobwago ‘ebetaria gete matanaia?

⁸ Gete ‘enega ia sideio ta ‘enega, ‘u da ona‘upa‘upa ‘igu ‘inapwana Asiria ‘ana king ‘enaia, ta ose ‘e tu tausana ia da ‘ebwaemu, ‘abo ‘oio ‘u ewaiwai tauio be to‐geruiao ‘edia ‘u da sa‘udi.

⁹ Ga mwa‘adega ‘igu ‘inapwana ‘ina to‐guinua me gidarina ‘ina kapeteni ‘e bweuna maninina ‘u da gisana‘ile, ta ‘imu ‘emisa ‘u sa‘u Aigupito ‘ena saliote manudi ta to‐geruose manudi?

¹⁰ Ta ‘abo‘agu ni‘atu nai ia tu‘ema ta nigea Ieoba ma‘ieagu ‘asa gete matanaia sabi giesaoorina? Ieoba ‘eguia ‘i gwae, ‘Asa gete ‘ena ‘u da tauia, ta ‘u da giesaoorina.

¹¹ Ga Eliakima ta Sebena ta Ioaa si ona Rabasakei ‘enaia, ‘U da ona, Ia sideio, ‘imu to‐guinuao ‘edia ‘u da ona ‘ena Siriega; ‘a mwaramwaratonina ta ‘enega; ta gea‘abo ‘emaia ‘u da ona me Iudea ‘enadiega, tomota ‘ari‐gurewa ‘ena si miami tenadia.

¹² Ta Rabasakei ‘i gwae, ‘Igu ‘inapwana ‘i etunegu nai ‘imu ‘inapwana ‘ena, ta ‘emuia, sabi gwae ona getedi? Nigea nai ‘i etunegu tai si miatoa ‘ari‐gurewa ‘enaia, be taudi ‘idi sumwana si da ‘e‘ani, ta taudi ‘idi boasi si da numa ma‘emi?

¹³ Ga Rabasakei ‘i tooro, ta ‘enana sinabwanega ‘i bwaubwau me Iudea ‘enadiega, ta ‘i gwae, King sinabwana, Asiria ‘ana king, ‘ina ona wa da nonodi.

¹⁴ Gete nadigega king ‘i gwae, Esekia gea‘abo ‘i da kaboemi; nigea ‘i ewaiwai be ‘i da ‘etoseemi ta ‘enega.

¹⁵ Wate gea‘abo Esekia ‘i da bubumi be Ieoba ‘ena wa da ‘emisa, ‘i gwae, Ieoba ‘i da ‘etosee‘ai‘ailimi; ‘asa gete gea‘abo si da ‘ebwaea Asiria ‘ana king nimanaia.

¹⁶ Gea‘abo Esekia wa da nonona: Asiria ‘ana king gete nadigega ‘i gwae ta ‘enega, Ma‘ieagu wa da guguia, ta ‘eguia wa da apwesama; ta wa da ‘e‘ai ‘e bweuna ‘e bweuna ‘ina kaiwe‐oineega, ta ‘e bweuna ‘e bweuna ‘ina bwainonoega, ta ‘e bweuna ‘e bweuna wa da numa ‘ina boasi tauna ‘enega:

¹⁷ Ga ia da mai ta ia da ‘au‘ewemi ‘asa ‘imi ‘asa taumi nadigega, witi ta oine ‘idi ‘asa, palaua ta baguraoine ‘idi ‘asa.

¹⁸ Wa da ‘ita‘i‘isi nai Esekia i ‘i‘imimi, ‘i gwae, Ieoba ‘i da ‘etoseeda. ‘Ebeloinao ‘idi Eaubada ‘e bweuna ‘ina ‘asa i ‘etoseena nai Asiria ‘ana king nimanega?

¹⁹ Amata ta Aripada ‘idi eaubadao mane? Separibaima ‘ina caubadao mane? Ta Samaria si ‘etoseena nai nimaguiega?

²⁰ ‘Asa getedi ‘idi eaubadao iauiaudi iaisigei, ‘ediega ‘idi ‘asa si ‘etoseena nimaguiega, be ‘enega Ieoba Ierusalema ‘i da ‘etoseena nimaguiega?

²¹ Ta si enono, ta nigea ‘e bweu ona ‘ena si ona limena: king ‘ina ona ta ‘enega, ‘i gwae, Gea‘abo ‘ena wa da ona limana.

²² Ga Eliakima Ilikia natuna tauna anua ‘ana to‐loina, ta Sebena to‐‘etoladi, ta Ioaa Asapa to ‘etoladi‐tetera natuna, Esekia ‘ena si mai ma‘adi ‘oama sabusabudi, ta Rabasakei ‘ina ona ‘ena si simana.