Isaia 35 - Buki Tabu Lowaenei 1919

‘UPWA 35.

¹ Mitawa ta esena waborebore si da ‘uiawana; ta kaukaudaita ‘i da guausoara ta ‘i da senina rose ‘atua.

² ‘I da senina sinabwana, ta ‘i da ‘uiawana, tamo, guausoarega ta wariega; Lebanona ‘ina esaesa ‘ena si da ‘ebwaea, Kaamela ta Sarona ‘idi bobo‘ai‘ailina: Ieoba ‘ina esaesa si da ‘itena, ‘ida Eaubada ‘ina bobo‘ai‘ailina.

³ Nima tabataba ‘wa da gi‘epa‘aridi, ta ‘aetubwe dededera wa da gi‘etedi.

⁴ To ‘atesa‘ara wa da eonedi, Wa da ewaiwai, gea‘abo wa ‘atesa‘ara: wa ‘ita, ‘imi Eaubada ‘i da mai e‘isega, Eaubada ‘ina tamapuiega; ‘I da mai ta ‘i da ‘etoseemi.

⁵ Ga to matakebokebo matadi si da ebari, ta to tenatui tenadi ‘ana ‘auboda si da ‘ewai.

⁶ Ga to lopegoi ‘i da losuiasuia kerei ‘atua, ta to euwauwa meiana ‘i da wari: mitawaia boasi si da pwaila ta ‘enega, ta boasi daudau kaukaudaisinamo ‘enaia.

⁷ Ta kaukau ‘ara‘arasina ‘i da esewasewa, ta bwa‘a iapaiapasina wewerupwao; kedewa‐mitawa ‘idi ‘ebemia, ‘ena si ‘eno, nedu ‘i da miami kigweruru ta sita ma‘enao.

⁸ Ta ‘eda sinabwana ‘ena ‘i da miami, ta ‘eda, ta si da eesena, Iaruiarua esasena ‘ana ‘eda; Baibailidi gea‘abo ‘ena si da etaona; ta tauna taudi manudi: tai to tauia gesi, tamo uwauwadi, gea‘abo ‘ena si da loegesi.

⁹ Nigea ‘e bweu laione ‘ena ‘i da miami, nai ‘e bweu iobai bosasa ‘ena ‘i da tu‘e, gea‘abo ‘ena si da lobedi; ta taudi si ‘ewalimedi ‘ena si da tauia:

¹⁰ Ta Ieoba ‘ina lagwalagwadi si da ‘ilama, ta Siona ‘ena si da mai wariega; ta guausoara mia ‘ataia debadi, ‘edia ‘i da miami: ‘uiawana ta guausoara si da ‘ewa, ta dedoi be eiawasilagalaga si da denawa.