Isaia 34 - Buki Tabu Lowaenei 1919

‘UPWA 34.

¹ ‘Omi ‘ebeloinao, wa da mai serabenaia, be wa da nono; ‘omi tomota, wa da nono‘i‘isi: bare‘u ‘i da nono, ta ‘ana maa; gabura, ta iage iauiauna ‘enega si mai.

² Ieoba ma‘ina gamwasoara ‘ebeloina iauiaudi ‘edia ta ‘enega, ta egamwagamwagu ‘idi boda maibo‘ana ‘edia: ni‘atu ‘i giesaoora ‘aiailidi, unuunu ‘ena ‘i tagwaredi.

³ ‘Idi to esilae wate si da ‘ula apwesedi, ta ‘idi kokoa ‘idi mwa‘ulu ‘i da tu‘ema, ta ‘oeao si da doga raradiega.

⁴ Ta garewa ‘ina boda maibo‘ana ‘i da sawara, ta garewa ‘i da lonunumina pwepwa‐‘etoladi ‘atua: ta ‘idi boda maibo‘ana ‘i da medara iaule, ‘atua iawana ‘i medarina kaiweoineiega, ta ‘atua iawana medamedarina kaiwe‐bwainonoega.

⁵ ‘Igu sisi‐saia ‘i numa ga ‘i maa garewa ‘ena ta ‘enega: wa ‘ita, Edoma ‘ena ‘i da mwa‘utama, ta ‘igu tabu ‘ina tomota ‘edia, sabi etara.

⁶ Ieoba ‘ina sisisaia ‘i maa rarega, ‘i eiapa iapega, lamiao ta gotao raradiega, sipi me‘olotodi ‘idi nuakwaiao ‘ediega: Ieoba ma‘ina taria Bosira ‘ena ta ‘enega, ta esilae sinabwana ‘asa Edoma ‘ena.

⁷ Ta bulomakau bomitawa si da mwa‘utama ma‘edi, ta bulomakau bosasa bulomakau me‘olotodi ma‘ediao; ta ‘idi bwa‘a ‘i da laulausi rarega, ta ‘idi kau ‘i da eiapa iapega.

⁸ Gete Ieoba ‘ina e‘isa ‘ina asiata ta ‘enega, e‘isa ‘ana iakwara Siona ‘ina e‘upwa ‘enaia.

⁹ Ta ‘ana boasi‐daudau si da ebuni ga si ebwada, ta ‘ina kau ga ‘i mepulupulua, ta ‘ina bwa‘a ‘i da ebwada ‘ara‘arata.

¹⁰ Gea‘abo ‘i da kweu boiboi nai asiata; ‘ina ‘asu ‘i da tu‘e ‘ataia: epata‐tomota ga epata tomota ‘i da waborebore; gea‘abo ‘e bweu ‘i da rubwarena ga tuta ‘ataia.

¹¹ Ta boe ta bawedakadaka si da ‘ewena; ta golu ta kaokao ‘ena si da miami: ta loniu ‘ina marakwa ta kakae ‘ina ‘ebemwau debanaia ‘i da lisidi.

¹² ‘Ina to esaesa si da bwauiedi ‘ebeloina ‘enaia, ta gea‘abo ‘e bweu ‘ena ‘i da miami; ta ‘ina inapwanao si da iage besobeso.

¹³ Ta ‘ina anua esaesa ‘edia kwakwakwara si da tabwa, dibi ta pwatura ‘ina anua‘ebesaia ‘edia: ta ‘i da ekedewamitawa ‘idi ‘ebemia, ‘atamana kasuweri manudi.

¹⁴ Ta ‘asa kaukaudaisinamo ‘ina bomitawa si da elobaloba kedewa bwaubwau ma‘edi, ta gota‐me‘olotona ‘ana ‘arauna ‘ena ‘i da bwau; tamo, iobaididiga ‘ena ‘i da mia ‘ataia, ta ‘ina ‘ebeeiawai‘ata ‘i da lobena manuna.

¹⁵ Moata‐magitana ‘i da ‘abinewa, ta ‘i da ‘eno, ta pou ‘i da pisari, ta ‘ana iauiaukwa ‘agaraunaia ‘i da ‘egogone: tamo, meewaewa ‘ena si da egogona, ‘e bweuna ‘e bweuna mwanena ma‘ieana.

¹⁶ Ieoba ‘ina buki ‘enega wa da ‘ebesa, ta wa da sawa: nigea ‘e bweu getedi ‘ediega nigea ‘i da miami, nigea ‘e bweu mwanena ‘i da ‘ebesa ioge: ‘awagu ‘i ona ta ‘enega, ta iaruiaruana ‘i egogonedi.

¹⁷ Ta i ‘ula‐‘esinua manudi, ta nimana i ‘eguiai ‘edia rabega: si da ‘ewa ‘ataiena, ‘epata‐tomota ga ‘epata‐tomota ‘ena si da miami.