Isaia 33 - Buki Tabu Lowaenei 1919

‘UPWA 33.

¹ ‘Oioi ‘emuia ‘u to e‘oae‘oae, ta nigea si ‘oaeio; ta ‘u bubu geiogeioi, ta nigea si bubuna geiogeioi ‘emuia! Ni‘atu e‘oae‘oae ‘u sa‘una, ga si da ‘oaeio; ta ni‘atu bubuna geiogeioi ‘u sa‘una, ga si da bubuna geiogeioi ‘emuia.

² ‘Ieoba ie, ‘emaia ‘u da nua‘ole‘ole; ni‘atu ‘a iamwaiamwa manuio: ‘oio ‘u da nimadi gonagona iauna, ‘ima ‘etoseana wate tuta loniu ‘enega.

³ Egogona toila ‘ana dududu ‘enega tomota si denadena; ‘imu tooro ‘ai‘aila tauio ‘enega ‘ebeloinao si lelewana.

⁴ Ta ‘imu iage ‘oae si da sa‘uegogona na‘ieana pwapwalewa ‘i sa‘u egogona: na‘ieana bilolo si losuiasuia‘edi na‘ieana ‘ena si da losuia‘edi.

⁵ Ieoba ‘i miatu‘e; ‘etanaia ‘i miami ta ‘enega: Siona ‘i loemaa loina ta bubuna paruparu ‘ediega.

⁶ Ta ‘imu tutao ‘ediega miaiaina ‘i da miami, ‘etoseana iauiauna, sinasinapu ta mwaramwaratoni: Ieoba ‘ana matauta tauna ‘ina gwegwe.

⁷ Wa ‘ita, ‘idi toewaiwai si bwaubwau apwesaia: guguia ‘ina topiliiareiare si dedoi toila.

⁸ ‘Eda loetana si ‘eno waborebore, tai lopilidadana ‘i gumwara: ona ‘upa‘upa ‘i li‘oena, ‘asa ‘i sinaridi, tai nigea i ‘amaiabena.

⁹ Bwa‘a i ‘ewabamu ta ‘i egumwarena: Lebanona ‘i omaiamaia ta ‘i medarina; Sarona ‘asa kaukaudaisinamo nadigega; ta Basana ta Kaamela iawadi si dededera iaulei.

¹⁰ Gete ‘enega ia da tooro, Ieoba ‘i gwae; gete ‘enega ia da tooro ‘ai‘aila; gete ‘enega ia da mia ‘etanaia.

¹¹ Sumwana wa da ‘euwana, ta witi arena wa da ‘au‘ewedima: iawasimi ‘awe sabelulu ‘i da ‘enimi.

¹² Ta tomota si da ‘atua iaguma ‘ana gabu: ‘atua kwakwakwara si tara mwa‘uta, taudi si ‘arasidi ‘awe sabelulu ‘enaia.

¹³ Wa da nono, ‘omi to mia ‘edasora, iage ni‘atu ia guinuena; ta, ‘omi tomia deinaia, ‘igu waiwai wa da ‘inana.

¹⁴ To to‘umalidi Siona ‘ena si matauta; taudi nigea si tapwaroro dedera ‘i unudi. Iaita nai gamwagamwanidaia ‘i da miami ‘awe ‘e‘enina ma‘ieana? Iaita gamwagamwanidaia ‘i da miami ‘awe ‘ara‘arata ‘ataia ma‘edi?

¹⁵ Tauna ‘i tautauia paruparu, ta ‘i ona ‘ai‘aila; tauna ‘oae ‘ana ‘ewa ‘i sinarina, tauna tamapu kwaia ‘ana giiai ‘enega nimanao ‘i giniuiedi, tauna tenana ‘i gibode rara ‘ana nono ‘enega, ta matana ‘i gibodedi ‘ita to‘umali ‘ena ‘enega;

¹⁶ Tauna ‘i da mia ‘etanaia: ‘ina ‘ebedena ‘i da gurewao ‘idi anua pa‘ara: ‘ana masura si da ‘ebwaena; ‘ana boasi ‘i da mia ‘ai‘aila.

¹⁷ Mataio king si da ‘ita ‘ana ‘ita bobo‘ana ‘enega: ‘asa ‘edasoraia si da ‘itai.

¹⁸ ‘Ateio ‘i da nuanua didiga manuna: tauna ‘i sawa mane, tauna i ‘etokuge mane? Tauna anua ‘etosoradi ‘i sawedi mane?

¹⁹ Tomota gamwasoara didiga gea‘abo ‘u da ‘ita, tomota ‘enadi ni‘u nigea kapekapeana ‘u da sinapuna; meiadi dumadumana nigea kapekapeana ‘u da pana‘ita.

²⁰ Siona ena ‘u da ‘ita, sagari sa‘usa‘u ‘ai‘ailidi ‘idi ‘asa: mataio Ierusalema si da ‘ita ebemia mia‘emwa‘ule, anua‐kaleko gea‘abo si da ‘ewena, ‘ina kaiwe gea‘abo si da ‘iwadi, ta nigea ‘e bweu ‘ina barae ‘i da ‘e‘upena.

²¹ Ta ‘ena Ieoba ma‘eda ‘ina esaesa ‘enega, boasi‘awana bababadi ta boasi daudauna ‘idi esena; ‘ena gea‘abo ‘e bweu waga ma‘ina nea ‘i da tauia, nai waga esaesa ‘i da taona ‘enega.

²² Ieoba ‘ida to loina ta ‘enega, Ieoba ‘ida to ‘ebwae‐loina, Ieoba ‘ida king; ‘i da ‘etoseeda.

²³ ‘Imu baraeao ‘ebepa‘ara si loli‘ami; nigea kapekapeana ‘idi ariana ‘arena si da giepa‘ara, naia nigea kapekapeana si da lisi: ga ‘ebe‘oae sinabwana ‘ina gwegwe si ‘eguiai; to lopegoi gwegwe‐‘oae si ‘ewa.

²⁴ Ta to‐mia gea‘abo si da gwae, Ia le‘oasa: tomota ‘ena si miami ‘idi bubuna bokobokona gea‘abo ‘ana e‘isa.