Isaia 32 - Buki Tabu Lowaenei 1919

‘UPWA 32.

¹ Wa ‘ita, king ‘e bweu ‘i da loina bubuna paruparuiega, ta ‘inapwanao si da loina etaraeiega.

² Ta tai ‘e bweu ‘i da na‘ieana ‘ebekwaia iagilega, ta ‘ebedena wediliega; nadigega boasi‐daudauiao esena iapasina ‘enaia, nadigega gurewa sinabwana iauiaukwana ‘asa ‘ebelo‘ame‘ame ‘enaia.

³ Ta taudi si lo‘ita matadi gea‘abo si da umauma, ta taudi si nono tenadi si da nono‘ai‘aila.

⁴ Ta to lomanini wate ‘atena sinasinapu ‘i da mwaratoni, ta meialidolidodi meiadi si da loli‘ami be si da ona‘ai‘aila.

⁵ Tai geiogeioi gea‘abo wate si da eesena tai bobo‘ana, nai to boruma si da gwae ‘aene ‘i to ‘ebwa‘ebwaea.

⁶ Tai geigeioi iage euwauwa ‘i da oneone, ta ‘atena bubuna bokobokona ‘i da guinuei, sabi bubu besobeso, ta sabi ‘inana loegesi Ieoba matanaia, be to botana iaruiaruana ‘i giekakaena, ta taudi tona‘adi ‘i iapasa ‘adi boasi ‘i loegumwarina.

⁷ To boruma ‘ina ‘ebeguinuao si to‘umali: wasegigi to‘umalidi ‘i wasegigi be gomabeso ‘i da giesaooridi ‘ona kabokabo ‘ediega, tuga ‘ena nanaewadi si onaona paruparu.

⁸ Ta to ‘ebwaea iage ‘egu‘eguiai ‘i nuedia; ta iage ‘egu‘eguiai ‘ediega ‘i da tooro.

⁹ Wa da tooro, ‘omi mewainemi wa mia daita, ta ‘enagu wa da nono; ‘omi natumao me wainemi gagasimi, ‘igu ona wa da enonotenasie.

¹⁰ Iakwara ‘e bweu ta asiatao ‘enega wa da loniu, omi waine gagasa: sesoi ‘i da to‘umali ta ‘enega, siwa anuaia gea‘abo ‘i da mai.

¹¹ Wa da dedera, omi mewainemi wa miamia daita; wa da loniu, omi gagasimi: wa da elolo, wa da mabubugewa, ta ‘oama ‘oausega wa da e‘otena tolobwami ‘enaia.

¹² Matasusudi si da sapi bagura ‘adi ‘ita bobo‘ana manudi, oine ualoebwaina manuna.

¹³ ‘Igu tomota ‘idi bwa‘a kaiwe mamatana ta kwakwakwara ‘ena si da tabwa; tamo, anua guausoara iauiaudi ‘asa eguaueguausoarina ‘enaia:

¹⁴ Anua esaesa si da e‘idi‘idia ta ‘enega; ‘asa tomoiauiau si da pilisinena; ‘oea ta anua ‘ebe‘ita‘i‘isi si da egaula ‘ataia, ‘ase bomitawa ‘idi ‘ebeguausoara, sipi iau ‘adi ‘ebe‘e‘ai;

¹⁵ Ga tuta nina iaruiarua ‘i da daudau ‘edaia ‘etanega, ta bagura ualoebwaina si da ‘inana ‘aene o‘ai.

¹⁶ Ga loina mitawaia ‘i da ‘mia baula, ta bubuna paruparu bagura ualoebwaina ‘ena ‘i da miami.

¹⁷ Ta bubuna paruparu ‘ina guinua guguia; ta bubuna paruparu uana miaemwa‘ule ta nuaiai ‘ataia.

¹⁸ Ta ‘igu tomota anua guguia ‘ena si da miami, ta anua pa‘ara ‘ai‘ailina ‘edia, ta ‘ebeeiawai‘ata mia‘enono ‘edia.

¹⁹ Ta ‘usana ‘i da patu, mitawa ‘ina be‘u ‘ena; ta ‘asa ‘i da ‘eno mwa‘uta ‘ai‘aila.

²⁰ ‘Omi boasi iauiauna deidia wa ‘aso‘aso wa bobo‘ana, ‘omi bulomakau ta ase ‘aedi wa etunediwa.