Isaia 31 - Buki Tabu Lowaenei 1919

‘UPWA 31.

¹ Oioi ‘edia si mwa‘uta Aigupito ‘ena leme manuna, ta ose ‘edia si tugadara; ta saliote ‘edia si ‘emisa, iauiaudi ta ‘enega, ta togeru ose ‘edia, to waiwai sadi ta ‘enega; ta nigea Iseraela ‘ina Tabu Tebweuna ‘ena si ‘ita, nai Ieoba si ‘ebesa!

² Ta tauna wate ‘i sinasinapu, ta to‘umalina ‘i da me‘ei, ta ‘ina ona gea‘abo ‘i da ‘ewalimedi: ta ‘i da tooro toumalina ‘ina toguinuao ‘idi anua ‘enaia, ta taudi bubuna bokobokona si guinua ‘idi leme ‘enaia.

³ Ta gete me Aigupito tai tugai, ta nigea Eaubada; ta ‘idi ose esio, ta nigea iaruiarua: ta ni‘atu eoba nimana ‘i da iasitoto, ga ruarua tauna ‘i leme ‘i da setupe, ta tauna ‘i lemena ‘i da be‘u, ta iauiaudi si da neneta rererea.

⁴ Ieoba gete nadigega ‘i gwae ‘eguia ta ‘enega, Nadigega ‘ena laione ‘i onamugimugi ta laione menonoiana ‘ina iage i ‘oae debanaia, ‘abo to‘ita‘i‘isi‐sipi iauiaudi si bwauiedi manuna, gea‘abo ‘i da ‘atesa‘ara ‘enadiega, nai ‘i da giemwa‘utena tauna ‘idi edududu manuna: nadigega bodao ‘idi Ieoba ‘i da mwa‘utama sabi saia ‘oea Siona ‘enaia, ta ‘ina ‘oea ‘enaia.

⁵ Na‘ieana manua si taetaea, nadigega bodao ‘idi Ieoba Ierusalema ‘i da didigena; ‘i da didigena ta ‘i da ‘etoseena, ‘i da taona ta ‘i da ‘ita‘i‘isina.

⁶ Iseraela natunao ie, Tauna ‘enega wa loguitoasa didiga ‘ena wa da sana‘ila.

⁷ Asiata gote ta ‘enega tai ‘e bweuna ‘e bweuna ‘ina tokwarui sileba, ta ‘ina tokwarui gola, si da ‘uledi, taudi nimami taumi si mweruruidi ‘emia loegesi manuna.

⁸ Ga goma Asiria nina ‘i da be‘u sisi‐saiega, nigea tai ‘ina sisisaiega; ta sisi‐saia nina, nigea tai ‘idi sisi‐saia, ‘i da loegumwarina: ta sisi‐saiega ‘i da dena, ta ‘ina tubuau si da etamapu.

⁹ Ta ‘ina gurewa ‘i da sawara ‘ebedidiga manuna, ta ‘ina ‘inapwanao si da ‘atesa‘ara doedoe ‘enaia, Ieoba ‘i gwae, tauna ‘ina awe ‘ara‘arata Siona ‘ena ‘i miami, ta ‘ina umura Ierusalema ‘enaia.