Isaia 29 - Buki Tabu Lowaenei 1919

‘UPWA 29.

¹ Ariela ie, Ariela, ‘asa nina ‘ena Dabida i ‘eno‘eno! iakwara wa da sa‘uegogona iakwara ‘enaia; sagari ‘adi tuta ‘i da apwesama:

² Ga Ariela ia da e‘atemutuiena, ta dedoi ta ‘ewabamu si da apwesa: ta ‘i da Ariela na‘ieana ‘eguia.

³ Ta anua ia da ‘abi sakowasi matamuia, ta anua‐‘ebesaiega ia da tara‘au ‘emuia, ta ‘ebetara‘au ia da gietooro matamuia.

⁴ Ta ‘u da mia mwa‘uta, ta bare‘uiega ‘u da onaona, ta ‘enaio ‘i da mia mwa‘uta kauiega; ta ‘enaio ‘i da nadigega to loiaruiarua besobeso ‘enana, bare‘uiega, ta ‘imu gwae ‘i da gwanegwane kauiega.

⁵ Ta ‘amu tarauwarao ‘adi iau si da kau matagidarina na‘ieana, ta to‐didigao ‘adi iau na‘ieana witibwarana ‘i sawasawara: tamo, ‘i da apwesama manini.

⁶ Bodao ‘idi Ieoba ‘ena ‘i da apwesa wepararega, ta mwani‘ini‘iega, ta ‘enana sinabwanega, bwawabwawa ta wedilia ‘ediega, ta awe ‘eni‘enina meianega.

⁷ Ta ‘ebeloinao iauiaudi ‘adi iau si losaia Ariela enaia, tuga iauiaudi si losaia matanaia ta ‘ina anua pa‘ara matanaia, ta si e‘atemutuiena, si da madawara ‘atua, boiboi, ‘ina ‘ita‐iage.

⁸ Ta ‘i da nadigega ‘ena tai botabotanina ‘i madawara, ta, wa ‘ita, i ‘e‘ai; ta ‘i tooro, ta iaruiaruana ‘i kakaena: nai nadigega tai tonaana ‘i iapasa ‘i madawara, ta, wa ‘ita, ‘i numanuma; ta ‘i tooro, ta, wa ‘ita, ‘i emwaromwaroa, ta iaruiaruana ‘aene ‘i da numa; nadigega ‘i da apwesa ‘ebeloina iauiauna ‘adi iau ‘edia, taudi si saia ‘oea Siona ‘enaia.

⁹ Wa da iamwaiamwa ta nuami ‘i da owana; ‘imi ‘ebeguausoara wa da ‘ewa, ta wa da matakebo: si elausi, ta nigea oineega; si gadogado, ta nigea boasi pa‘arega.

¹⁰ Ieoba ‘enomwataia ‘arena ni‘atu ‘i siwa ‘emia ta ‘enega, ta matami ‘i gibodedi, taudi paropitao; ta debami, taumi to‐‘itao, ni‘atu ‘i bwasedi.

¹¹ Ta ‘ita‘ita maibo‘ana ‘emia ‘i nadigega buki epa‘i ‘ina ona, tauna tai si ‘ebwaea to sinasinapu ‘enaia, si gwae, Gete ‘u da sawa, ia sideio: ta ‘i gwae, Nigea kapekapeana, ‘i miaepa‘i ta ‘enega:

¹² Ta buki si ‘ebwae to mwagemwage ‘enaia, si gwae, gete ‘u da sawa, ia sideio: ta ‘i gwae, Mwagemwagegu.

¹³ Ta ‘Inapwana ‘i gwae, Tomota gete deiguia si mai ta ‘enega, ta ‘awadiega ta sopadiega si ‘amaiabegu, ta ‘atedi ‘eguiega edasoraia si tauiena, ta ‘idi matautegu tai ‘idi ona tauna si e‘ita ‘edia:

¹⁴ Ta ‘enega, wa ‘ita, guinua ‘ebenuaowana ‘i abe ia guinua tomota gete gamwagamwanidia, tuga guinua ‘ebenuaowana ta iage sinabwana: ta ‘idi tai sinasinapu ‘idi sinapu ‘i da saoora, ta ‘idi tai panapana‘isidi ‘idi mwaratoni ‘i da mia kwaia.

¹⁵ Oioi ‘edia si ‘ebesa ni‘uni‘u be ‘idi nuena si da sa‘u kwaia Ieoba ‘enega, ta ‘idi guinuao guguioi ‘ena si miami, ta si gwae, Iaita i ‘itema? ta iaita ‘i mwaratonima?

¹⁶ ‘Omi iage iauna wa gibunibunidi! To bubu‘urena ta da nuena ‘aene bwa‘a ‘atua; be ‘enega iage mwerumweruruina tauna to mwerurua manuna ‘i da gwae, Nigea ‘i mweruruigu; nai iage ‘i bubuna to bubuna manuna ‘i da gwae, Nigea ma‘ina sinasinapu?

¹⁷ Nigea nai tuta gidarina, be Lebanona ‘i da ebuni be ‘i da bagura ua loebwaina, ta bagura ua loebwaina si da sawena ‘aene mitawa?

¹⁸ Ta asiata gote ‘enega to tenatui buki ‘ina ona si da nonodi, ta to mata kebo matadi si da ‘ita umeumega ta guguioiega.

¹⁹ Taudi si mia oonua wate ‘idi guausoara si da giesinabwa Ieoba ‘ena, ta gomabeso tomota ‘edia si da uiawana Iseraela ‘ina Tabu Tebweuna ‘enaia.

²⁰ To didiga ni‘atu si gibesobeso‘ena, ta to sinasinara ‘i sa‘u, ta iauiaudi si ‘ita‘i‘isi bubuna bokobokona manuna si da ‘upwaiauledi:

²¹ Taudi tai si bubuna ga ona‐lemeiega ‘i loegesi, ta sikwa si sa‘u tauna ‘eberugu ‘ena ‘i ba‘eba‘e manuna, ta to paruparu si gibuni dumedumedi iage besobeso ‘enega.

²² Ta ‘enega gete nadigega Ieoba ‘i gwae, tauna Aberaamo i ‘ewa limena, Iakobo ‘ina susu manuna: Iakobo gea‘abo gete ‘enega ‘i da omaiamaia, ta wate maninina gea‘abo gete ‘enega ‘i da eburabura.

²³ Ta ni‘atu natunao i ‘itedi, nimagu ‘idi guinua, gamwagamwanaia, ga ‘agu esana si da etabuna; tamo, Iakobo ‘ina Tabu Tebweuna si da etabuna, ta Iseraela ‘ina Eaubada si da matautena.

²⁴ Taudi wate si loegesi iaruiaruadi ‘enega sinasinapu si da mwaratoni, ta taudi si ona mugimugi e‘ita‘ita si da nonona.