Isaia 28 - Buki Tabu Lowaenei 1919

‘UPWA 28.

¹ Oioi Eparaima ‘ina tonuma didigaiao ‘idi gagasa ‘ana peaula ‘enaia, ta ‘ana ‘ita bobo‘ai‘ailina ‘ina senina medamedarina ‘enaia, tauna taudi si esilae oineega ‘idi sa‘ara iapaiapana debanaia ‘i miami!

² Wa ‘ita, ‘Inapwana ma‘ina iage waiwai ta pa‘ara; ‘atua ‘usana patuna wedilia ma‘ieana, iagila didiga ‘i unuunua, ‘atua murua waiwai maa‘apu‘apu wedilia ma‘ieana, ‘i da ulamwa‘uta bare‘uia nimanega.

³ Eparaima ‘ina tonuma didiga ‘idi gagasa ‘ana peaula si da ‘aiaina ‘aedi ‘ubunaia;

⁴ Ta ‘ana ‘ita bobo‘ai‘ailina ‘ina senina medamedarina, tauna sa‘ara iapaiapana debanaia ‘i miami, ‘i da nadigega bwainono gimimatuana nawarae iaiiai nuganinaia; tauna tuta ‘enega tauna i ‘ebesa i ‘itena, nimanaia ‘i miami tuga ta ‘i e‘egumwarena.

⁵ Asiata gote bodao ‘idi Ieoba ‘i da esaesa ‘ana peaula manuna, ‘ita bobo‘ana ‘ana peaula esaesa manuna, ‘ina tomota tupwadi ‘edia:

⁶ Ta etara iaruiaruana manuna tauna ‘i etaetara ‘enaia, ta pa‘ara manuna taudi saia si ‘ilena ‘ari ‘ina ‘eberugu ‘enaia.

⁷ Taudi gete wate si loegesi oineega, ta boasi pa‘arina ‘enega si tauia gesi; to taria ta paropita si loegesi boasi pa‘arina ‘enega, oineega si maa, si tauia gesi boasi pa‘arina ‘enega; si loegesi ‘ita‘ita ‘enega, si esetupedi etara ‘enega.

⁸ Tebeli iauiaudi si maa maiwega ta bi‘iega ta ‘enega, ta ‘enega nigea ‘e bweu esena i ‘esasena.

⁹ Sinasinapu ‘i da e‘ita iaita ‘enaia? ta ‘are ‘i da e‘ita iaita ‘enaia? Taudi nai susuiega si gagidi, ta susu matadiega si lisidi?

¹⁰ Gete tuga ‘ebe‘ita ‘ebe‘ita ‘enaia ta ‘enega, ‘ebe‘ita ‘ebe‘ita ‘enaia; raba raba enaia, raba raba ‘enaia; gete ‘ena gidarina, gote ‘ena gidarina.

¹¹ Nigea, ta tai sopadi to‘u‘umara ta ‘enadi dumadumana ‘ediega ‘i da ona tomota gete ‘edia:

¹² Taudi ‘edia ‘i gwae, Gete eiawai‘ata nina, tauna ‘i lo‘ame‘ame eiawai‘ata wa da ‘ebwaena; ta gete ‘ebebobo‘ana: ta nigea si da nono.

¹³ Ta ‘enega Ieoba ‘ina ona ‘i da ‘ebe‘ita ‘ebe‘ita ‘ena ‘edia, ‘ebe‘ita ‘ebe‘ita ‘ena: raba raba ‘ena, raba raba ‘ena; gete ‘ena gidarina, gote ‘ena gidarina; be ‘enega si da tauia, ta si da be‘u sana‘ila, ta si da weari, ta si da sikwedi, ta si da ‘ewedi.

¹⁴ Ta ‘enega Ieoba ‘ina ona wa da nono, ‘omi tai gagasa, ‘omi tomota gete Ierusalema ‘ena si miami wa loinedi:

¹⁵ Wa ona ta ‘enega, mwawasa ma‘ieana ‘a ona‘upa‘upa, ta Seola ma‘ieana ‘a egosigosiana: ‘ena ‘ebeunua maa‘apu‘apu ‘i rubwarena, gea‘abo ‘emaia ‘i da mai; onakabokabo ‘a bubudi ‘ima ‘ebedena ta ‘enega, ta onakabokabo ‘ubunaia ‘a kwaiema:

¹⁶ Ta ‘enega ‘Inapwana Eaubada gete nadigega ‘i gwae, Wa ‘ita, Siona ‘ena gurewa ia sa‘una ‘autu manuna, gurewa tootoona, ‘autui ‘ai‘aila gurewana tupitupina bobo‘ai‘ailina: tauna ‘i iareiare gea‘abo ‘i da lomanini.

¹⁷ Ta etara ia da bubuna ‘ebe‘etopwapwa‐loesanena manuna, ta bubuna paruparu aweata manuna: ta ‘usana patuna ‘ebedena onakabokabo nina ‘i da ‘ewaiaulei, ta boasi‐murua ‘ebe kwaia ‘i da loemaa‘apu‘apuie.

¹⁸ Ta ‘imi ona‘upa‘upa mwawasa ma‘ieana ‘i da ‘e‘upa, ta ‘imi egosigosiana Seola ma‘ieana gea‘abo ‘i da tooro; ‘ena ‘ebeunua maamaa ‘apu‘apu ‘i da ‘etobwarena, ga ‘i da ‘aiaimi.

¹⁹ Tuta iauna i ‘etobwarena, ‘i da ‘ewemi; gonagona ta gonagona ‘i da rubware ta ‘enega, asiatega ta boiboiega; ta gea‘abo wate ‘e bweu iage ta ‘ebedidiga tuga ‘i da apwesa be ona wa da sinapuna.

²⁰ ‘Ebe‘eno ‘i kukupa wawasae ta nigea kapekapeana tai ‘ena ‘i lisina tauna ta ‘enega; ta bwasa ‘i gilele wawasae be gea‘abo ‘ena ‘i da bwasena tauna.

²¹ Ieoba ‘i da tooro nadigega ‘oea Perisima ‘enaia ta ‘enega, ‘i da egamwagamwagu nadigega sa‘ara Gibeona ‘enaia; be ‘enega ‘ina guinua ‘i da iagena, ‘ina guinua dumadumana, ta ‘ina iage ‘i da gieapwesena, ‘ina iage dumadumana.

²² Ta ‘enega gea‘abo wa sinasinara, ‘abona nai ‘ami ‘ebepaima si da epa‘ara: ‘ebelosaroni ta ‘enega, tauna ‘i aseiena, ni‘atu ia nonona ‘Inapwana ‘enega, bodao ‘idi Ieoba, bare‘u maibo‘ana ‘enaia.

²³ Wa da enonotenasi, ta ‘enagu wa da nono; wa da nono, ta ‘igu ona wa da nono.

²⁴ To salalisi ‘i sala lisi ‘ataia sabi lelewana? ‘Ina bwa‘a pa‘arina i ‘upwaruena ta ‘i weara ‘ataedi?

²⁵ Ni‘atu matana ‘i gienonokwaikwaina, nigea nai kumina gaigaidi i ‘ula dadana, ta kumina ‘ai‘aila ‘i lelewanena, ta witi ‘i aso raba ‘edia ta baali ‘ina esena ‘ai‘aila ‘enaia ta rai tupitupina ‘enaia?

²⁶ ‘Ina Eaubada ‘i e‘ita ‘ai‘ailina ta ‘enega, ta ‘i e‘itaena.

²⁷ Kumina gaigaina nigea si sapidi ‘ebesapi mamatanega ta ‘enega, ta nigea wagalisilisi ‘aena si giesakowasi kumina ‘ai‘aila ‘enaia; ta kumina gaigaina si sapina gunega, ta kumina ‘ai‘aila keweliweliliega.

²⁸ Palaua ‘ana witi ‘i dai; nigea ‘i da sapisapi ‘ataena ta ‘enega, ta ‘abo ‘ina wagalisilisi ‘aena ta ‘ina oseao si lelewanena, nigea ‘i da daina.

²⁹ Gete wate ‘i apwesama bodao ‘idi Ieoba ‘enega, tauna ‘ina ona lemeega ‘i tosinabwasana, ta sinasinapuiega ‘i bobo‘ai‘ailina.