Isaia 27 - Buki Tabu Lowaenei 1919

‘UPWA 27.

¹ Asiata gote ‘enega Ieoba sisisaia elo‘uia ta sinabwana ta pa‘arina ‘enega lebiatana moata pilimaninina ‘i da ununa, ta lebiatana moata bokobokona; ta moata nina oraia ‘i miami ‘i da loemwawasi.

² Asiata gote ‘enega: Oine bagurina, ‘ena wa da wari.

³ ‘Abo‘agu Ieoba ia ‘ita‘i‘isina; tuta tomwana iauna ‘ena ia da giepwasena: nai ‘e bweu ‘i ununa, ia da ‘ita‘i‘isina boiboi be asiata.

⁴ Gamwasoara didiga nigea ‘eguia: eguma kaiwe taritarina ta kwakwakwara si tooro ‘eguia saia ‘ena! Eguma ia da tauia ‘edia, ia da gabudi rererea.

⁵ Nai ‘igu pa‘ara ‘i da giiai, be ‘i da bubu guguia ma‘ieagu; tamo, ‘i da bubu guguia ma‘ieagu.

⁶ Asiata si meama ‘ediega Iakobo ramuna ‘i da sa‘u; Iseraela ‘i da tupwa ta ‘i da senina: ta gabura matana si da loemaa kaiwe uanega.

⁷ Ni‘atu nai ‘i ununa nadigega taudi si ununa ‘i unudi? nai ‘i esilae na‘ieana ‘adi umumwawasa taudi si esilae ‘enega?

⁸ Gete tugai, ‘ena ‘u etunenawa, ‘u losaia ma‘ieana; ni‘atu ‘i tauiena ‘ina iagila dakadaka ‘enega bomatu ‘ina asiata ‘enega.

⁹ Ta ‘enega gete ‘enega Iakobo ‘ina bubuna bokobokona ‘i da gumwara, ta gete ‘ina loegesi ‘ana ‘ewaiaula uana maibo‘ana; ‘ena ‘ebetaria ‘ina gurewa iauiaudi ‘i bubudi gurewa buraburadi si sapi rueruedi nadigega, be ‘enega Aserima ta tokwarui‐sinara gea‘abo wate si da tooro.

¹⁰ ‘Asa si ‘ari‐sakowasiena ni‘atu ‘i waborebore ta ‘enega, ‘ebemia si pilisinena ta si e‘idi‘idiena, nadigega mitawa: ‘ena bulomakau menonoiana ‘i da ‘e‘ai, ta ‘ena ‘i da ‘eno, ta narinao ‘i da loegumwaridi.

¹¹ Ni‘atu narinao si ‘oaperu, ga si da elasa iaulei; ‘ena si da mai ta si da loe‘abia: taudi tomota nigea ‘e bweu ‘idi mwaratoni ta ‘enega; ta ‘enega tauna ‘i mweruruidi gea‘abo ‘i da ‘atenua‘ole‘oleiedi, ta tauna ‘i bubudi gea‘abo ‘i da obobomedi.

¹² Ta gete ‘i da apwesa asiata gote ‘enega, Ieoba uana ‘i da sapi iaulei, Boasi‘awa muruinega ga Aigupito boasina, ta si da egogonemi ‘e bweuna ‘e bweuna, ‘Omi Iseraela natunao.

¹³ Ta gete ‘i da apwesa asiata gote, ioguli sinabwana si da mu‘e; ta taudi ‘i abe si saoora ‘asa Asiria ‘enaia, ta taudi si mia apwesa ‘asa Aigupito ‘enaia, si da mai; ta Ieoba ‘ena si da bwagobwago Ierusalema ‘ina ‘oea tabu ‘enaia.