Isaia 26 - Buki Tabu Lowaenei 1919

‘UPWA 26.

¹ Asiata gote ‘enega wari gete si da wariei ‘asa Iuda ‘enaia: ‘Ida ‘asa ‘asa pa‘arina; ‘etoseana ‘i da aseiena ‘ari‐gurewa manudi ta ‘aripa‘ara manudi.

² ‘Eberugu wa da gigegedi, be ‘enega ‘ebeloina paruparu tauna ona ‘ai‘aila i ita‘i‘isina ‘ena ‘i da rugu.

³ Tauna ‘ina nuena ‘emuia i ‘emisa, tauna ‘u da ‘ita‘i‘isina guguia ‘ai‘aila ‘enega: i ‘emiseio ta ‘enega.

⁴ Ieoba ‘ena ‘u da ‘emisa ‘ataia: Ia Ieoba ‘ena gurewa mia‘ataia ‘i miami ta ‘enega.

⁵ Taudi si miatu‘e ni‘atu i ‘ewa‐mwa‘utedi ta ‘enega, ‘asa mi‘atu‘e; ‘i e‘enoina, ‘i e‘enoina ga bare‘uia; ‘i me‘ena kau ‘enaia.

⁶ ‘Ae ‘i da ‘aiaina; tuga gomabeso ‘aedi, ta nanaewadi ‘idi sa‘ulaga.

⁷ To bubu ‘ai‘aila ‘idi ‘eda ‘i paruparu: ‘oio to paruparu to bubuna ‘ai‘aila ‘idi ‘eda ‘u sa‘u ‘ai‘ailina.

⁸ Tamo, Ieoba ie, ‘imu loinao ‘idi ‘eda ‘ena ‘a iamwaiamwa manuio; iaruiaruama ‘ina nuanua ‘amu esana ‘ena ta ‘amu ‘ebenua‘i‘isi ‘ena.

⁹ Iaruiaruagu ‘enega ‘oio ia nuanuana boiboi; tamo, iaruiaruagu soraguia ‘enega ia da ‘ebesa maniniemu: ‘ena ‘imu loina bare‘uia si miami ta ‘enega, gabura ‘ana tomi bubuna paruparu si nonona.

¹⁰ ‘Abo nua‘ole‘ole ‘u e‘ita to‐toumalina ‘enaia, gea‘abo bubuna paruparu ‘i da nono; ‘asa bubuna paruparu ‘ena ‘i da bubu geiogeioi, ta gea‘abo Ieoba ‘ina esaesa ‘ena ‘i da ‘ita.

¹¹ Ieoba, nimaio ‘i tooro, ta nigea si ‘ita‘ita: ta ‘imu waiwai tomota manudi si da ‘itena, ta si da omaiamaia; tamo, awesabelulu ‘amu tarauwarao ‘i da ‘enidi.

¹² Ieoba, guguia ‘u da loinei manuma: ‘oio ‘imu guinua iauiauna wate ni‘atu ‘u bubudi manuma.

¹³ Ieoba ie ‘ima Eaubada, mari ‘inapwanao ta ‘oio nigea, ni‘atu si loina ‘emaia; ta tebweuio ‘emuiega ‘amu esana ‘a da ‘inana.

¹⁴ Si mwawasa, gea‘abo si da bobo‘ana; si kwaia, gea‘abo si da tooro; ta ‘enega ni‘atu ‘edia ‘u apwesa ta ‘u giesaooridi, ta ‘adi ‘ebenua‘i‘isi ni‘atu ‘u giesaoorina maibo‘ana.

¹⁵ Ieoba ie, ‘ebeloina ni‘atu ‘u giesinabwa, ‘ebeloina ni‘atu ‘u giesinabwa; ‘oio ma‘imu esaesa: ‘asa ‘ina raba iauiauna ni‘atu ‘u giesinabwa.

¹⁶ Ieoba, ‘ebeloniu ‘enega si iamwaiamwaio, sidasida si siwa ‘ena ‘imu ‘ebesapi ‘i apwesa ‘edia.

¹⁷ Nadigega waine i ‘euwana, ta ‘ina enatuna ‘ana tuta ‘i abe, ga ‘i elo‘uia ta ‘i bwau ‘ina edadamega; nagigega ‘abo‘ama ni‘atu ‘a miami matamuia, Ieoba ie.

¹⁸ A ‘euwana, ‘a elo‘uia, ‘atua iagila ‘a enatunena; nigea ‘e bweu ‘etoseana ‘a bubuna bare‘uia; wate gabura ‘ana tomi nigea si be‘u.

¹⁹ ‘Imu to mwawasa si da bobo‘ana; ‘igu kokoaiao si da tooro. Wa da tooro be wa da wari, ‘omi kau ‘ena wa miami: ‘imu gaguna ‘atua pwatura gagunidi ta ‘enega, ta bare‘u to kwaia ‘i da ‘ula apwesedi.

²⁰ ‘Igu tomota, wa da mai, ‘imu anuao ‘edia ‘u da rugu, ta ‘imu ‘auboda ‘u da gibodedi deimuia: ‘u da ‘akwaiemu ga tuta tomwana gidarina, be gamwasoara ‘i da gumwara bemi.

²¹ Wa ‘ita, ta ‘enega, Ieoba ‘ina esenega ‘i apwesama be to mia bare‘u ‘i da unudi ‘idi bubuna bokobokona manuna: bare‘u wate ‘ina rara ‘i da giapwesei, ta gea‘abo wate ‘ina toesilae ‘i da bodedi.