Isaia 25 - Buki Tabu Lowaenei 1919

‘UPWA 25.

¹ Ieoba ie, ‘oio ‘igu Eaubada; ia da sa‘u tu‘eieio, ‘amu esana ia da tupuna; iage to sinabwasidi ‘u guinuedi ta ‘enega, nuanua lowaeneiega, bubuna ‘ai‘aila ta ona ‘ai‘aila ‘ediega.

² ‘Asa ‘u bubuna ga sa‘usa‘u epopona ta ‘enega; ‘asa ma‘ana ‘ari ga ‘asa weawearina; to‘u‘u‘mara ‘idi anua esaesa ga asa nigea ‘e bweu; gea‘abo si da ‘abina.

³ Ta ‘enega tomota waiwaidi si da ‘awaeseeseio, ‘ebeloinao didiga ‘idi ‘asa si da matauteio.

⁴ ‘Oio ‘ebepa‘ara gomabeso ‘edia ta ‘enega, ‘ebepa‘ara nanaewa ‘enaia ‘ina ‘atesa‘ara ‘enega, ‘ebedena wediliega, iauiaukwa iaiiaiega, ‘ena to didiga ‘idi apwesama nadigega wedilia ‘arigurewa ‘enaia.

⁵ ‘Atua iaiiai esena iadaiada ‘ena to‘u‘umara ‘idi dududu ‘u da ‘ewa mwautenama; ‘atua iaiiai poana iauiaukwana ‘enega, to didiga ‘idi wari ‘i da mwa‘uta.

⁶ Ta ‘oea gete ‘ena bodao ‘idi Ieoba tomota iauiauna ‘edia sagari ‘i da bubuna, iapaiapadi sagarina, sagari oine ‘arena ‘enega, iapaiapadi si maa lulu soranega ‘ediega, oine ‘arena si gi‘esasena ‘ai‘aila ‘enega.

⁷ Ta ‘oea gete ‘ena ‘ebeboda si sa‘u tomota iauiauna ‘edia ‘i da gisawarina, wate ‘ebeboda nina ‘ebeloinao iauiauna ‘i bodedi.

⁸ Mwawasa ni‘atu ‘i tonena ‘ataia; ta ‘Inapwana Eaubada mataseru ‘i da lo‘i‘ili iaulei iauiaudi maninidiega; ta ‘ina tomota ‘adi ‘ebesinasinara ‘i da ‘ewa bare‘u maibo‘anega: Ieoba ni‘atu ‘i oneonena ta ‘enega.

⁹ Ta asiata gote ‘enega si da gwae, Wa ‘ita, gete ‘ida Eaubada; manuna ta iamwaiamwa, ta ‘i da ‘etoseeda; gete Ieoba; manuna ta iamwaiamwa, ta da uiawana be ta da guausoara ‘ina ‘etoseana ‘enega.

¹⁰ ‘Oea gete ‘ena Ieoba nimana ‘i da toa ta ‘enega, ta Moaba si da ‘aiaina ‘ina esena ‘enaia, nadigega witi sumwanina si ‘aiaina sumwana ‘ana boasi ‘enaia.

¹¹ Ta gamwagamwanaia nimanao ‘i da iasitoto, ‘atua tauna ‘i tutube nimanao ‘i iasitoto sabi tube: ta ‘ina gagasa ‘i da sa‘u mwa‘utena nimanao ‘idi pana‘ita rererea ma‘ieana.

¹² Ta ‘imu ‘arigurewa ‘idi anua saia ‘etosorana ‘ina anua‐‘ebe‘ita‘i‘isi ni‘atu ‘i ‘ewamwa‘utena, ‘i sa‘u mwa‘utena, ta ‘i me‘ena bare‘uia, tuga kau ‘enaia.