Isaia 24 - Buki Tabu Lowaenei 1919

‘UPWA 24.

¹ Wa ‘ita, Ieoba bare‘u ‘i giekakaena, ta ‘i giewaboreboreiena, ta ‘i gibunina, ta ‘ana tomi ‘i lelewana dadanedi.

² Ta ‘i da apwesa, na‘ieana tomota ‘edia, na‘ieana to taria ‘enaia; na‘ieana to‐guinua ‘ena, na‘ieana ‘ina ‘inapwana ‘ena; na‘ieana gomagweine ‘ena, na‘ieana ‘ina ilemwaia ‘enaia; na‘ieana to gimwani ‘ena, na‘ieana toni gwegwe ‘enaia; na‘ieana to ‘ebwaea gwegwe ‘ena, na‘ieana to iotura ‘enaia; na‘ieana to‐‘ewa‘eposeana ‘ena, na‘ieana to‐‘ebwaea‐‘eposeana ‘enaia.

³ Bare‘u ‘i da kakae ‘ai‘aila, ta ‘i da gumwara ‘ai‘aila ‘oaeega; Ieoba ni‘atu ona gete ‘i oneone ta ‘enega.

⁴ Bare‘u ‘i dedo ta ‘i sawasawara, gabura ‘i eneneta ta ‘i sawasawara, bare‘u ‘ina tomota gagasidi si eneneta.

⁵ Bare‘u wate ‘i baila ‘ana tomi ‘ubunidia: loina si li‘oedi ta ‘enega, loina tomwana si gibunina, ona‐‘upa‘upa mia‘ataia si li‘oena.

⁶ Ta ‘enega ‘elia bare‘u i ‘enina, ta taudi ‘ena si miami si ‘awato‘umaliedi: ta ‘enega bare‘u ‘ana tomi si ‘arasidi, ta tai pu‘epu‘edi si tupwa.

⁷ Oine auauna ‘i dedoi, oine ‘arena ‘i eneneta, to ‘ate ‘eguausoara iauiaudi si eiawasilagalaga.

⁸ Sinaa ‘adi guausoara ‘i gumwara, taudi to guausoara ‘enadi ‘i losaroni, api ‘ana uiawana ‘i gumwara.

⁹ Gea‘abo si da numa oine wariega; boasi pa‘ara ‘i da darere taudi si numena ‘edia.

¹⁰ ‘Asa kakaena ‘i lasena: anua iauiauna si gibodedi, be ‘enega gea‘abo ‘e bweu ‘ena ‘i da ruguma.

¹¹ Bwaubwau ‘i apwesa ‘eda ‘edia oine manuna; uiawana maibo‘ana ‘i guguioi, ‘asa ‘ina guausoara ni‘atu ‘i tauiawa.

¹² ‘Asaia waborebore si pilisinena, ta ‘eberugu si ununa saoorega.

¹³ Gete nadigega ‘i da apwesa bare‘u gamwanaia tomota gamwagamwanidia ta ‘enega, na‘ieana kaiwe olibe si giniuiena, na‘ieana oine uana ‘ina tupwa ‘ena sesoi ‘i gumwara.

¹⁴ Taudi getedi ‘enadi si da tu‘eiei, si da bwau; Ieoba ‘ina waiwai esaesa manuna si bwau toila orega.

¹⁵ Ta ‘enega Ieoba wa da ‘awaeseesei bomatu ena, tuga Ieoba ‘ana esana, Iseraela ‘ina Eaubada, ora sarunao ‘edia.

¹⁶ Bare‘u ‘ana ‘ebelosaroniega ni‘atu wari ta nonodi, esaesa to paruparu ‘edia. Ta ia ona, Ia wakaka, ia wakaka, oioi ‘eguia! to bubu wasegigi si wasegigi; tamo, to bubu wasegigi si wasegigi sinabwana.

¹⁷ Matauta, siusiu be, sikwa be, ‘emuia si miami, ‘oio bare‘u ‘ana tomi.

¹⁸ Ta gete ‘i da apwesa, tauna matauta ‘enanega ‘i dena siusiu ‘ena ‘i da be‘u; ta tauna siusiu soranega ‘i tu‘ema sikwa ‘i da ionina: ‘auboda debanaia si egegedi ta ‘enega, ta bare‘u ‘ana ‘autuiao si loniu.

¹⁹ Bare‘u ‘i lasa ‘ai‘aili, bare‘u ‘i doga ‘ai‘aila, bare‘u ‘i loniu didiga.

²⁰ Bare‘u ‘i da gadogado tai numanumabolausina ‘atua, ta ‘i da loniu dadana ioeioe ‘atua; ta ‘ana li‘oaloina ‘i da mwau ‘enaia, ta ‘i da be‘u, ta gea‘abo ‘i da tooro limana.

²¹ Ta gete ‘i da apwesa asiata gote, Ieoba to mia tu‘e ‘etanaia si miami ‘i da unudi, wate bare‘u ‘ina kiniao bare‘u ‘enaia.

²² Ta si da egogonedi, ‘atua ioniionidi si egogona gaulaia, ta si da miabode anua‘ebeiona ‘enaia, ta asiata iauna si da gumwara ga ‘I da apwesa ‘edia.

²³ Ga nawarae ‘i da nua‘owana, ta sinara ‘i da omaiamaia; bodao ‘idi Ieoba ‘i da loiloina ‘oea Siona ‘enaia ta ‘enega, ta Ierusalema ‘ena, ta ‘ina ‘ina‘inapwanao matadia ma‘ina esaesa.