Isaia 23 - Buki Tabu Lowaenei 1919

‘UPWA 23.

¹ Turo ‘ana ona. Wa da bwau, omi waga Tasisa; ni‘atu ‘i bwa‘adaisinamo ta ‘enega, ta ‘enega anua nigea ‘e bweu, rugu nigea ‘e bweu: ‘asa Kitima ‘enega ‘i apwesama ‘edia.

² Wa da mia emwa‘ule, omi saru ‘ana tomi; ‘oio Sidona ‘ana to‐gimwaniao, orega si tautauia, si loemaeio.

³ Ta boasi sinabwadi ‘edia Siora ‘ina ‘atuna, Nile ‘ana sesoi, tauna ‘ina gwegwe; ta tauna ‘ebeloinao ‘idi anua‐‘ebegimwani.

⁴ Sidona ie, ‘u da omaiamaia: ora ni‘atu ‘i gwae ta ‘enega, ora ‘ina ‘ebepa‘ara, ‘i gwae, Nigea ia edaedadama, nai ia enatuna, nai tubuau ia amwamwedi, nai gomagweine ia amwamwedi.

⁵ ‘Ena simana ‘i memai Aigupito ‘ena, si da ‘ate‘uiauia Turo ‘ana simana manuna.

⁶ Tasisa ‘ena wa da tauiawa; wa da bwau, ‘omi saru ‘ana tomi.

⁷ Gete nai ‘imi ‘asa guausoarina, tauna ‘ina miami lowaenei gimi asiatao ‘adi tuta, tauna ‘aena si tauiena ‘edasoraia be si mia baula?

⁸ Iaita iage gete ‘i loinena Turo ‘enaia, ‘asa peaulaesaesa, tauna ‘ina togimwaniao si e‘inapwanao, tauna ‘ina to‐sa‘ugelasa gwegwe bare‘u i ‘amaiabedi?

⁹ Bodao ‘idi Ieoba ‘i loinena, be esaesa maibo‘ana ‘ina gagasa ‘i da gibesobeso, bare‘u ‘ama‘amaiabana iauiaudi ‘adi sinara ‘i da sa‘u.

¹⁰ Tasisa natuna mewainena ie, ‘imu ‘asa ‘u da rubwarena Nile ‘atua; nigea wate ‘e bweu ‘amu gadiwana.

¹¹ Nimana ni‘atu ‘i iasitoto ora debanaia, ‘ebeloinao ni‘atu ‘i giniuiedi: Ieoba ni‘atu ‘i loina Kanania manuna, be ‘ina anua ‘ebepa‘ara ‘i da giesaooridi.

¹² Ta ‘i gwae, ‘oio Sidona ‘ana gomagweine mia mwa‘uta, gea‘abo wate ‘u da guausoara; ‘u da tooro, Kitima ‘ena ‘u da taona; tuga gote ‘ena gea‘abo ‘imu eiawai‘ata.

¹³ Wa ‘ita, me Kaladea ‘idi ‘asa: tomota gete nigea wate ‘e bweu; goma Asiria i ‘aseiena mitawa ‘ina iobai manudi: ‘idi anua ‘etosoradi si gietoorodi, ‘ina anua esaesa si ‘auseparedi; ‘i giesawaridi.

¹⁴ Wa da bwau, ‘omi waga Tasisa: ‘imi anua ‘ebepa‘ara ni‘atu si lelewana ta ‘enega.

¹⁵ Ta gete ‘i da apwesa asiata gote, Turo si da nuapupurena ga ‘iakwara e sebeniti, na‘ieana king ‘e bweuna ‘ina asiatao: ni‘atu iakwara e sebeniti si da losaroni ga Turo ‘ena ‘i da apwesa na‘ieana sogara ‘ana wari:

¹⁶ Api ‘u da ‘ewena, ‘asa ‘ena ‘u da lopilidadana, ‘oio sogara si nuapupureio; wari dibidibi ‘u da bubui, wari iauna ‘u da wari, be ‘enega si da nua‘i‘isio.

¹⁷ Ta iakwara ‘e sebeniti si da gumwara ga gete ‘i da apwesa, Ieoba Turo ‘ena ‘i da apwesa, ta ‘ana ‘ebee‘isa ‘ena ‘i da ‘ila, ta ‘i da esogara gabura ‘ana ‘ebeloina iauiaudi bare‘u matanaia ma‘edi.

¹⁸ Ta ‘ina gwegwe ta ‘ina ‘ebee‘isa si da iaruiarua‐‘esasena Ieoba ‘enaia; gea‘abo si da egogona nai si da sa‘u kwaia; ‘ina gwegwe ‘i da taudi Ieoba matanaia si miami manudi, be ‘adi e‘ai ‘i da sawesawedia, ta ‘adi ‘oama mia ‘amana manuna.