Isaia 22 - Buki Tabu Lowaenei 1919

‘UPWA 22.

¹ Madawara sa‘arina ‘ana ona. To‘ase ‘i apwesa ‘emuia gete ‘enega, ga ‘u tu‘e maibo‘ana anua debadia?

² ‘Oio ‘u maa bwaubwau ‘ediega, ‘asa toitoila, ‘asa guausoara; ‘imu to esilae nigea si esilae sisisaiega, nai si mwawasa saia ‘ena.

³ ‘Imu to loina iauiaudi si denawa rererea, to tupu si ionidi: iauiaudi ‘emuiega si lobedi si ionidi rererea, si dena ‘edasoraia.

⁴ Ta ‘enega ia gwae, ‘Eguiega wa da ‘ita nao, ia da dedoi didiga; gea‘abo wa too be wa gieguausoarigu, ‘igu tomota natuna mewainena ana esilae manuna.

⁵ Gete esilae ‘ina asiata ta ‘enega, ta ‘aiaina ‘ana asiata, ta nua‘owana ‘ana asiata ‘Inapwana ‘enega, bodao ‘idi Ieoba, madawara sa‘arina ‘enaia; ‘ari‐gurewa ‘adi ‘ausepara mwa‘uta, ta bwaubwau ‘oea ‘edia.

⁶ Ta Elama gita mabwagilina i ‘a‘arina, saliote mataidi ta to‐geruose ma‘edi; ta Kira lawa ‘ana ‘auboda i ‘ewena.

⁷ Ta gete ‘i apwesa, ‘imu sa‘ara bobo‘ai‘ailidi si maa saliote ‘ediega, ta to‐geruose si mia leleni ‘eberugu ‘enaia.

⁸ Ta Iuda ‘ana lobodaboda ‘i ‘ewena; ta asiata gote ‘ebesaia o‘ai ‘ana anua ‘enaia u ‘emisena.

⁹ Ta ‘asa Dabida ‘ana weaweara u ‘itedi, si iauiau: ta sewasewa lo‘ubuna ‘ina boasi wa egogonedi.

¹⁰ Ta Ierusalema ‘ana anua wa sawedi, ta anua wa so‘o iauledi sabi giepa‘ara ‘ari‐gurewa.

¹¹ Wate ‘ebeegogona wa bubuna ‘ari‐gurewa ‘e rua mwatuidi sewasewa kadekaderina boasina manuna: ta ‘ana tomwerurua nigea ‘ena wa ‘emisa, nai tauna ‘i bubuna lowaenei wa ‘amaiabena.

¹² Ta asiata gote ‘Inapwana, bodao ‘idi Ieoba, ‘i bwauiemi dedoi ‘ena, ‘ewabamu ‘ena be, debadebana ‘ena be, gadiwana ‘oama ‘oausega be:

¹³ Ta wa ‘ita, guausoara ta uiawana, ‘unua bulomakau ta ‘unua sipi, e‘ai esio ta numanuma oine: ta da ‘e‘ai be ta da numa, gibua‘i ta mwawasa ta ‘enega.

¹⁴ Ta bodao ‘idi Ieoba ‘i e‘ita‘ena tauna tenagu ‘edia, Ona ‘ai‘aila bubuna bokobokona gete gea‘abo ‘i da ‘ewaiaule ‘emiega ga wa mwawasa, ‘Inapwana ‘i gwae, bodao ‘idi Ieoba.

¹⁵ Gete nadigega ‘Inapwana ‘i gwae, bodao ‘idi Ieoba, ‘U da tauia, to‐‘ita‘i‘isi‐mani gete ‘ena ‘u da nao, tuga Sebina ‘ena, tauna anua ‘ana to‘ita‘i‘isi, ta ‘u da gwae,

¹⁶ To‘ase ‘u guinua gete? ta iaita gete ma‘ieaio, ta ‘enega ‘emuia ‘ari‘arigaula ‘u tai? ‘ari‘ari‐gaula ‘i taitai debanaia, ‘ebemi taunamo manuna ‘i daiagina gurewa ena!

¹⁷ U ‘ita, Ieoba ‘i da ulatoilemu ‘atua tai waiwai; tamo, ‘i da giiai‘i‘isio.

¹⁸ Ona ‘ai‘aila ‘i da giesakowasiemu ta ‘i da ‘ulatu‘eiemu anebadi ‘atua esena sinabwana ‘enaia; ‘ena ‘u da mwawasa, ta ‘ena ‘imu esaesa ‘ina saliote si da miami, ‘oio ‘ima ‘inapwana ‘ina anua ‘ana omaiamaia.

¹⁹ Ta ‘imu ‘ebeguinuega ia da paiio, ta ‘imu ‘ebemiega ‘i da lisi mwa‘uteio.

²⁰ Ta gete ‘i da apwesa asiata gote ‘enega, ‘igu toguinua Eliakima Ilikia natuna ia da bwauiena:

²¹ Ta ‘amu tara‘apwarega ia da e‘otena, ta ‘amu gadiwanega ia da giepa‘arina, ta ‘imu loina ia da sa‘u nimanaia: ta tauna ‘i da to‐mia Ierusalema tamadi ‘atua, ta Iuda ‘ina susu tamadi ‘atua.

²² Ta Dabida ‘ina anua ‘ana ki ia da sa‘u ‘aranaia: ta tauna ‘i da gigege, ta gea‘abo ‘e bweu ‘i da gibode; ta ‘i da gibode, ta gea‘abo ‘e bweu ‘i da gigege.

²³ Ta ia da ‘etoiaina ‘atua neili esena pa‘ara ‘ai‘aila ‘enaia; ta tauna ‘i da esaesa ‘ina ‘ebemi manuna tamana ‘ina anua ‘enaia.

²⁴ Ta tamana ‘ina anua ‘ina esaesa maibo‘ana ‘ena si da loesane, natunao ta tubunao, keiga gidarina iauna, ‘ebenuma ‘ana keigao ga ‘ebego ‘ana keiga iauiaudi.

²⁵ Asiata gote, bodao ‘idi Ieoba ‘i gwae, neili nina si ‘etoiaina esena pa‘ara ‘ai‘aila ‘enaia ‘i da ‘iwa iaule; ta si da tara mwa‘uta, ta ‘i da be‘u, ta bwagila ‘ena ‘i miami si da ‘upwa iaule; Ieoba ni‘atu ‘i onena ta ‘enega.