Isaia 21 - Buki Tabu Lowaenei 1919

‘UPWA 21.

¹ Ora ‘ina waborebore ‘ana ona. Nadigega bwawabwawa Iarasi ‘ena si toa bwarena, ‘i mai waboreboreiega, ‘asa didiga ‘enega,

² Madawara mwau n‘iatu ‘i apwesama ‘eguia; to bubu wasegigi ‘i bubu wasegigi, ta to‘oae i ‘oae‘oae. Elama ie, ‘u da tu‘e; Media ie, ‘u da tara‘au; ‘ina eiawasilagalaga ni‘atu ia loegumwarina.

³ Ta ‘enega tolobwagu ‘i maa ‘elo‘uia‘ega: ‘elo‘uiao si giiaigu, ‘atua waine ‘ina elo‘uiao edadamega: ia ‘opu‘opu ta ‘enega nigea ia nonono; ia ‘atesa‘ara ta ‘enega nigea ia ‘ita‘ita.

⁴ ‘Ategu ‘i loniudadana, didiga ‘i giematausigu: aiinana ia nuanuana ‘i gibuni be ‘i dededera ‘eguia.

⁵ Tebeli si ‘eso‘eso, si ‘ita‘i‘isi, si ‘e‘ai, si numanuma: ‘omi ‘inapwanao, wa da tooro, lawa wa da bunamina.

⁶ Gete nadigega Ieoba ‘i gwae ‘eguia, ‘U da tauia, to‘ita‘i‘isi ‘u da sa‘u; iage i ‘itena ‘i da simana:

⁷ Ta ‘enega boda i ‘ita, to‐geruose maruadi, ‘ase mabodana, kameli mabodana, ‘i da nono‘i‘isi nono sinabwanega.

⁸ Ta ‘i bwau laione ‘atua: ‘Inapwana ie, Anua‐‘ebe‘ita‘i‘isi ‘ena ia tooro ‘ataia asiataia, ta boiboi maibo‘adi ‘igu ‘ita‘i‘isi ‘ena ia miami:

⁹ Ta, u ‘ita, gete ‘ena tai mabodana ‘i mai, togeruose ruaruadi. Ta ‘i ona limana ta ‘i gwae, Babulonia ‘i be‘u, ‘i be‘u; ta ‘ina eaubadao ‘idi goamamea daiadaiagidi iauiaudi si ‘episaridi ga bare‘uia.

¹⁰ ‘Oio ‘igu sapisapi, ta ‘igu sea ‘ina witi: iage nina ia nonona bodao ‘idi Ieoba ‘enega, Iseraela ‘ina Eaubada, ni‘atu ia simana ‘emia.

¹¹ Duma ‘ana ona. ‘E bweu ‘i bwau ‘eguia Seirega, To‐‘ita‘i‘isi, boiboi mwa‘adega? To‐‘ita‘i‘isi, boiboi mwa‘adega?

¹² To ‘ita‘i‘isi ‘i gwae, Gonagona ‘i memai, ta boiboi wate: ‘abo nuami wa da eona, wa da eona: wa da sana‘ilama, wa da mai.

¹³ Ona nina Arabia ‘enaia. O‘a ‘ena Arabia ‘ena wa da miami, ‘Omi me Dedana bodao lopilidadana.

¹⁴ Tauna tonaana ‘i iapasa ‘ena boasi si me‘ena; ‘Asa Tema ‘ina tomi to denadena si lobedi ma‘adi palaua.

¹⁵ Sisi‐saia ‘ediega si denawa ta ‘enega, sisi‐saia lisilisi‐lolona ‘enega, to tupu giegielisina ‘enega, ta saia ‘ina mwaumwau ‘enega.

¹⁶ Gete nadigega ‘Inapwana ni‘atu ‘i ona ‘eguia, Iakwara ‘e bweu gea‘abo ‘i gumwara, nadigega to guinua ‘ei‘eisana ‘ana iakwarao, ta Kedara ‘ina esaesa maibo‘ana ‘i da gumwara:

¹⁷ Ta to‐tupu ‘adi iau tupwana, Kedara natunao ‘idi tai waiwai, si da pu‘epu‘e: Ieoba, Iseraela ‘ina Eaubada, ni‘atu ‘i onena.