Isaia 20 - Buki Tabu Lowaenei 1919

‘UPWA 20.

¹ Iakwara gote ‘enega Tatana ‘i mai Asadoda ‘enaia, tuta ‘enega Sagona Asiria ‘ana king ‘i etunena, ta ‘i saia Asadoda ‘enaia ta i ‘ewena;

² Tuta gote Ieoba ‘i ona Isaia Amosa natuna ‘enega, ‘i gwae, ‘U da tauia, ‘oama ‘oausa ‘u da lolo tolobwamuiega, ta ‘amu ‘aeiapaiapa ‘u da gimoni ‘aemuiega. Ta ‘i guinua nadigega, ‘i tautauia bwaradaisinamo ta ‘aedaisinamo.

³ Ta Ieoba ‘i gwae, Nadigega ‘igu to‐guinua Isaia ‘i tautauia bwaradaisinega ta ‘aedaisinega iakwara ‘e toi we‘iwe‘iiaia manuna ta ‘ebenuaowana manuna Aigupito ‘enaia ta Aitiope ‘enaia;

⁴ Nadigega Asiria ‘ana king me Aigupito ioniionidi, ta me Aitiope ‘idi to mia to‘u‘umara, ‘i da ‘au‘ewedi, me goamadi ta me sinabwadi, bwaradaisidi ta ‘aedaisidi, ta siabe‘ube‘udi nigea ‘aubodedimo, Aigupito ‘ana omaiamaia.

⁵ Ta si da ‘atesa‘ara ta omaiamaia, Aitiope ‘idi ‘ebenuaiai manuna, ta Aigupito ‘ina esaesa manuna.

⁶ Ta le‘awa gete ‘ana tomi si da ona asiata gote ‘enega, Wa ‘ita, gote nadigega ‘ida ‘ebemiaiai tauna, ‘ena ta dena leme manuna be si da ‘etoseeda Asiria ‘ana king ‘enega: ta ‘abo‘ada, mwa‘adega ta da dena?