Isaia 18 - Buki Tabu Lowaenei 1919

‘UPWA 18.

¹ A, pape ‘idi saeasaea ‘ina ‘asa, tauna Aitiope ‘ina boasi ‘awanao mariesedia:

² Tauna etuetuneao ‘i etunedi orega, tuga waga papuro boasi ‘edia, ‘i gwae, Wa da tauia, omi etuetune lomaninimi, ‘ebeloina ‘etosorana ta nonokwaikwaina ‘enaia, tomota didiga ‘arediega ga muria ‘edia; ‘ebeloina tauna i ‘etopwapwena ta ‘i ‘aiaina, tauna ‘ina ‘asa boasi ‘awanao si ‘upwarua!

³ Iauiaumi gabura ‘ana tomi, ta ‘omi bare‘u ‘ana tomi, ‘ena doe si gilagasina ‘oeao ‘edia, wa da ‘ita; ta ‘ena ioguli si mu‘e, wa da nono.

⁴ Ieoba gete nadigega ‘eguia ‘i gwae ta ‘enega, Ia da enono, ta ‘igu ‘ebemia ‘ena ia da ‘ita; nadigega iaiiai ‘esasena ‘ena sinara ‘i sae, nadigega gaguna umaumana sesoi ‘ina iaiiai ‘enega.

⁵ Sesoi nuganinaia ta enega, ‘ena senina ni‘atu ‘i gumwara, ta senina ‘i ua ga ‘i matua, narina gidaridi ‘i da ‘upwedi ‘ebe‘upwa ‘ediega, ta narina sasailina ‘i da ‘ewa iaulei ta ‘i da ‘upwa mwa‘utedi.

⁶ Si da miami rererea ‘oeao ‘idi manua to ‘e‘ai didiga ‘edia, ta bare‘u bomitawana ‘edia: ta manua to ‘e‘ai didiga si da enawarae‐iaiiai ‘edia, ta bare‘u bomitawana iauiaudi si da enawarae‐gogai ‘edia.

⁷ Tuta gote ‘ebwaeadaita si da me‘ena bodao ‘idi Ieoba ‘enaia tomota duduradi ta nonokwaikwaidi ‘ediega, ta tomota didiga ‘adi nugana ga muria ‘ediega; ‘ebeloina i ‘etopwapwa ta i ‘aiaina, taudi ‘idi ‘asa boasi ‘awanao si ‘upwaruena, bodao ‘idi Ieoba ‘ana esana ‘ana esena ‘enaia, ‘oea Siona.