Isaia 17 - Buki Tabu Lowaenei 1919

‘UPWA 17.

¹ Damaseko ‘ana ona. Wa ‘ita, Damaseko si ‘ewena be gea‘abo ‘i da ‘asa, ta ‘i da siwa ‘epopo geiogeioi.

² Aroera ‘ina ‘asa ni‘atu si pilisinedi: si da sipi iau manudi, taudi si da ‘eno, ta gea‘abo ‘e bweu ‘i da giematautedi.

³ Anua‐pa‘ara wate ‘i da gumwara Eparaimega, ta ‘ebeloina Damasekoega, ta Siria tupwana; si da nadigega Iseraela tubunao ‘idi esaesa, bodao ‘idi Ieoba ‘i gwae.

⁴ Ta gete ‘i da apwesa asiata gote, Iakobo ‘ina esaesa ‘i da e dedeia, ta esiona iapana ‘i da ewakaka.

⁵ Ta ‘i da nadigega ‘ena to sesoi witi tootoorona ‘i egogonena, ta nimana witi soluna i ‘upwa; tamo, ‘i da nadigega ‘ena ‘e bweu witi soluna i ‘ewedi Repaima ‘ina gamaube ‘enaia.

⁶ Ta ‘ena si da miami tuga tupwana, na‘ieana kaiwe olibe ‘i dedera, uana ‘e rua nai ‘e toi narina lo‘etana garunaia, ‘e ata nai ‘e nima kaiwe ualoebwaina narinao ‘edasora ‘edia, Ieoba ‘i gwae, Iseraela ‘ina Eaubada.

⁷ Asiata gote tai ‘ina To Mwerurua ‘ena ‘i da ‘ita, ta matana Iseraela ‘ina Tabu Tebweuna si da ‘amaiabena.

⁸ Ta gea‘abo ‘ebetariao ‘edia ‘i da ‘ita, nimana ‘idi guinua, nai iage nina matagigina si guinua ‘i da ‘amaiabena, nai Aserima, nai tokwarui‐sinaraiao.

⁹ Asiata gote ‘ina ‘asa pa‘aridi si da nadigega esena si pilisinedi mitawaia ta ‘oea debanaia, taudi si pilisinedi Iseraela natunao matadiega: ta ‘i da waborebore.

¹⁰ ‘Amu ‘etoseana ‘ina Eaubada ‘u nuapupurena ta ‘enega, ta ‘imu waiwai ‘ina gurewa nigea ‘u nuena; ta ‘enega kaiwe ‘adi ‘ita bobo‘ana u ‘asodi, ta ‘u badina kaiwe ‘upwa‘upwadi dumadumadi ‘ediega:

¹¹ ‘Amu ‘aso‘aso ‘ina asiata ‘enega u ‘arisakowasiena, ta gonagonaia ‘imu atuna ‘u bubuna be ‘i senina: ta sesoi ‘i denawa dedoi ta ‘ate‘uia‘uia didiga ‘adi asiata ‘enega.

¹² A! tomota iauiaudi ‘idi bwau toila, taudi si dududu nadigega lisuiao ‘idi dududu; ta ‘ebeloinao ‘idi pili didiga, si pilipili nadigega boasi waiwaidi ‘idi daudau murua!

¹³ ‘Ebeloinao si da pili nadigega boasi iauiauna ‘idi daudau murua: ta ‘i da ba‘edi, ta si da dena ‘edasora, ta si da pa‘idi ‘atua ‘oeao sumwanidi iagila matanaia, ta nadigega kau ‘i bwawabwawa wedilia matanaia.

¹⁴ Asunuanua wa ‘ita ‘ebedidiga; ta gonagona nuganinaia nigea si miami. Gete taudi si ‘oaeda ‘idi iage, ta taudi si ‘ipwarida ‘idi ‘egu‘eguiai.