Isaia 16 - Buki Tabu Lowaenei 1919

‘UPWA 16.

¹ Lamiao wa da etunedi ‘asa ‘ina to loina manuna Selega tauna mitawa deinaia, Siona natuna me wainena ‘ina ‘oea ‘enaia.

² Gete ‘i da apwesa ta ‘enega, manua taetae dadanidi na‘ieadi, newa lelewanina na‘ieana, nadigega Moaba natunao me wainedi si da miami Arinona ‘ina ‘ebe‘abara ‘edia.

³ ‘U da onaona, etara ‘u da iagei; ‘imu iauiaukwa ‘u da bubuna na‘ieana boiboi asu‘ore‘ore gamwanaia; to dena apwesa ‘u da kwaiedi; to tauiadadana gea‘abo ‘u da simasimanei.

⁴ ‘Igu to dena apwesa ‘u da tagwara be si da miamia ma‘ieaio; ta Moaba manuna, ‘u da e‘ebedena ‘enaia to ‘oae matanega: to ‘oae ni‘atu ‘i mia besobeso ta ‘enega, ‘oae ni‘atu ‘i gumwara, to ‘aiaina ni‘atu si gumwara ‘asega.

⁵ Ta ‘ebemi‐esaesa ‘i da mia pa‘ara ‘atenua‘ole‘ole ‘enaia, ta ‘e bweu ‘ena ‘i da miatoa ona‘ai‘ailega, Dabida ‘ina anuanaia ‘enaia; ‘i loiloina, ta etara i ‘ebe‘ebesa, ta ‘i lomanini sabi guinua bubuna paruparu.

⁶ Moaba ‘ina gagasa manuna ‘a nonona, ‘aene ‘i gagasa sinabwana; tuga ‘ina bubuna tu‘e, ‘ina gagasa be, ‘ina gamwasoara be, manudi; ‘ina ona gagasa ni‘atu nigea ‘e bweu.

⁷ Ta ‘enega Moaba ‘i da bwau Moaba manuna, ‘e bweuna ‘e bweuna ‘i da bwau: Kirareseta ‘ina ‘autuiao manudi wa da ‘ewabamu, esilae ‘ai‘aila wawasae.

⁸ Esibona ‘ina bagurao si mwawamwawasa ta ‘enega, ta Sibimaa ‘ina oine; ‘ebeloinao ‘idi ‘inapwanao ‘ina kaiwe bobo‘ai‘ailidi si lasa mwa‘utedi; si apwesa ga Iasera ‘enaia, si lopilidadana ga mitawaia; narinao si tatagara, ora debanaia si tauia.

⁹ Ta ‘enega ia da dedo Iasera ‘ina dedoiega Sibimaa ‘ina oine manuna: Mataserugu ‘ediega ia da giepwaseio, Esibona ie, ta Elealei: ‘imu uanao nawarae iaiiai ‘edia ta ‘imu sesoi ‘enaia saia ‘ana bwau ‘i be‘u ta ‘enega.

¹⁰ Ta ‘uiawana si ‘ewa iaulena, ta guausoara bagura ualoebwaina ‘enega; ta bagura‐oine ‘edia gea‘abo ‘e bweu wariwari, nai ‘enana maguausoarina: gea‘abo ‘e bweu to‐‘aiaina oine ‘i da ‘aiaina ‘ebedai ‘edia: ni‘atu sesoioine ‘ana bwau ia loegumwarina.

¹¹ Ta ‘enega diagu ‘enana api nadigega Moaba manuna, ta soragu Kireresa manuna.

¹² Ta gete ‘i da apwesa, ‘ena Moaba ‘i gieapwesena tauna, ‘ena oona ‘i gielo‘ame‘ame ‘esena lo‘etana ‘enaia, ta ‘i da mai ‘ina anua tabu ‘enaia sabi sidasida, gea‘abo ‘i da ewaiwai.

¹³ Gete ona nina Ieoba ‘i oneone Moaba manuna tuta lowa ‘enega.

¹⁴ Ta gete ‘enega Ieoba ni‘atu ‘i onaona, ‘i gwaegwae, Iakwara ‘e toi nigea si da gumwara, nadigega to‐guinua e‘isa ‘ana iakwarao, ga Moaba ‘ina esaesa si da sinarina, ‘ina boda sinabwana iauiaudi ma‘enao; ta tupwana si da gidara ta nigea ‘e bweu ‘i da ‘amaiabena.