Isaia 15 - Buki Tabu Lowaenei 1919

‘UPWA 15.

¹ Moabe ‘ana ona. Boiboi ‘e bweuna ‘enega Moaba ‘ina Ara ‘i kakaena, ta si bubuna ga nigea ‘e bweu ta ‘enega; boiboi ‘e bweuna ‘enega Moaba ‘ina Kira ‘i kakaena, ta si bubuna ga nigea ‘e bweu ta ‘enega.

² Ni‘atu ‘i tu‘e Baiita ‘ena, ta Dibona ‘ena, esenaiao lo‘etanidi ‘edia, sabi dedo: Moaba ‘i dedoi toila Nebo manuna, ta Medeba manuna: debadi iauiaudi ‘edia debadebana ‘i miami, ‘umi iauiauna si ‘upwa‐iaulei.

³ ‘Idi ‘edega ‘oama ‘oausega si paimidi taudi: ‘idi anuao debadia, ta ‘idi esena bababadi ‘edia, iauiaudi si do toila, si dedoi sinabwana.

⁴ Ta Esibona ‘i bwau, ta Elealei; ‘enadi si nonona ga Iaasa ‘enaia: ta ‘enega Moaba ‘ina tai ma‘idi ‘ebesaia si bwau toila; iawasina ‘i dedera soranaia.

⁵ ‘Ategu ‘i bwau Moaba manuna; ‘ina to‐esaesaiao si dena Soara ‘enaia, Egalata‐selisiia ‘enaia: Luita ‘ana ‘ebetu‘e ‘enega si tu‘e dedoiega ta ‘enega; Oronaima ‘ina ‘eda ‘ena saoora ‘ina bwau si iagena ta ‘enega.

⁶ Nimarima ‘ina boasi si da waborebore ta ‘enega: nedu i ‘oaperu ta ‘enega, nedu nuana ‘i tabataba, nigea ‘e bweu iage karakarawina.

⁷ Ta ‘enega iage sinabwana ni‘atu si ‘ewai, ta tauna si sa‘u egogona, si da ‘aridi kaiwe‐wilou ‘ina boasi ‘enaia.

⁸ Bwau nina ni‘atu Moaba ‘ana rabao ‘i sakowasiedi ta ‘enega; ‘ina bwau toila Egalaima ‘ena, ta ‘ina bwau toila Beerelima ‘enaia.

⁹ Dimona ‘ina boasi si maa rarega ta ‘enega: iage sinabwawawasae ia da me‘ena Dimona ‘enaia ta ‘enega, laione tauna goma Moaba ‘i dena ‘enaia, ta ‘asa tupwana ‘enaia.