Isaia 14 - Buki Tabu Lowaenei 1919

‘UPWA 14.

¹ Ieoba ‘i da ‘atenua‘ole‘ole Iakobo ‘enaia ta ‘enega, ta Iseraela ‘i da ‘esinuei, ta ‘idi ‘asa taudi ‘ena ‘i da sa‘udi: ta to‘u‘umara ‘i da mai sabi mia ma‘edi, ta Iakobo ‘ina susu ‘ena si da miaiai.

² Ta tomota si da ‘ewedi, ta si da me‘edi ‘idi esena ‘enaia: ta Iseraela ‘ina susu ‘i da giiaidi Ieoba ‘ina ‘asa ‘ena to‐guinua me‘olotodi ta to guinua mewainedi manudi: ta taudi lowa ioniionidi ‘edia, taudi si da ionidi; taudi lowa si unudi ‘edia si da loina.

³ Ta asiata ‘enega Ieoba ‘i da gieiawai‘ateio ‘imu dedoi ‘enega, ta ‘imu ate‘uiauia ‘enega, ta guinua pa‘ara ‘enega, tauna ‘enega si loineio be ‘u guinua, gete ‘i da apwesa,

⁴ Onasemalimali gete ‘u da ‘ewena Babulonia ‘ana king manuna, ta ‘u da gwae, Wa ‘ita to unua ni‘atu ‘i sa‘una! ‘Asa gola ni‘atu ‘i sa‘una!

⁵ Ieoba to to‘umalidi ‘idi keweliwelili, to nuganao ‘idi guna esaesa ni‘atu ‘i lasedi;

⁶ Tauna tomota ‘i unudi gamwasoarega unuunu ‘ataia ‘enega, tauna ‘ebeloinao ‘i loinedi gamwasoarega, gieelo‘uia nigea ‘e bweu i ‘etobodena ‘enega.

⁷ Bare‘u maibo‘ana i ‘eiawai‘ata, ta i ‘arainono: si alalagata ta si wariwari.

⁸ Tamo, kaiwe keigwana si guausoara manuio, ta Lebanona maruanina, si gwae, Ni‘atu ‘oio ‘u ‘eno mwa‘uta, nigea ‘e bweu to ‘upwa ‘i tu‘etu‘ema manuma.

⁹ Seola ‘ubunega ‘i loniu manuio sabi lobaio ‘imu memai ‘enaia: to mwawasa ‘i giniuiedi manuio, tuga bare‘u ‘ina sinabwao iauiaudi; ni‘atu ‘ebeloinao ‘idi kiniao iauiaudi ‘i gietoorodi ‘idi ‘ebemiesaesa ‘ediega.

¹⁰ Iauiaudi gotedi si da ona limana ta ‘emuia si da gwae, ‘Oio wate ni‘atu ‘u tabataba ‘abo‘ama nadigega? ‘Oio ni‘atu ‘abo‘ama nadigega nai?

¹¹ ‘Imu gagasa ni‘atu ‘i mwa‘uta Seola ‘ena, ta ‘imu binobinooiao ‘enadi: didimwana ‘i miaeso ‘ubunimuia, ta didimwanao si bodemu.

¹² U ‘ita ‘imu be‘u garewega, ‘Ubwana ie, gonagona natuna! Si ‘upwa mwa‘utemu bwa‘a ‘enaia, tauio lowa ‘ebeloinao ‘u e‘enoidi!

¹³ Ta ‘atemuia ‘u gwae, Ia da tu‘e garewaia, ‘gu ‘ebemi‐esaesa ia da sa‘u tu‘e Eaubada ‘ina kwadimao ‘etanidia; ta ia da miatoa deriegogona ‘ina ‘oea ‘enaia, iaarata ‘ina esena ‘ebelosaroniao ‘edia:

¹⁴ Ia da tu‘e poana ‘idi kesora debanaia; ‘abo‘agu ia da To‐lo‘etana Sana nadigega.

¹⁵ Ta gete ‘u da mwa‘utawa Seola ‘ena, gaula nina ‘ina esenao ‘ebelosaroni ‘edia.

¹⁶ Taudi si ‘itemu si da duneduneieio, si da nuanua manuio, si da gwae, Gete tai nina bare‘u ‘i giedederina, tauna ‘ebeloinao ‘i giniuiedi;

¹⁷ Tauna bare‘u ‘i bubuna ioiodaita ‘atua, ta ‘ina ‘asa i ‘ausepara mwa‘utedi; tauna ‘ina ioniionidi nigea ‘i li‘amidi be si da tauia ‘idi anuaia?

¹⁸ ‘Ebeloinao ‘idi kiniao iauiaudi, iauiaudi gotedi, si ‘eno‘eno esaesa ‘enega, ‘e bweuna ‘e bweuna tauna ‘ina anua ‘enaia.

¹⁹ Ta ‘oio si ‘ula apweseio ‘amu ‘ari‘ariega nari gadilulu ‘atua, to esilae ‘adi ‘oama ‘atua, taudi si esasa‘aedi sisi‐saiega, taudi si mwa‘uta gaula gurewana ‘edia; kokoa si ‘aiaina ‘atua.

²⁰ Gea‘abo ‘u miami ma‘edi sa‘u ‘ari‘ari‘ena, ‘imu ‘asa ‘u giesaoorina ta ‘enega, ‘imu tomota ‘u loemwawasidi; toguinua‐to‘umalina tubudiao gea‘abo si da ‘inana ga tuta ‘ataia.

²¹ Loemwawasi wa da iagena ‘ina gogama manudi tamadiao ‘idi bubuna bokobokona manuna; be ‘enega gea‘abo si da tooro, ta bare‘u si ‘ewai, ta bare‘u matana si da loemaa ‘asao ‘ediega

²² Ta ia da tooro ‘edia, bodao ‘idi Ieoba ‘i gwae, ta Babuloniaega esana ta tupwana ia da ‘upwaiaulei, ta natuna me‘olotona ta natuna natuna, Ieoba ‘i gwae.

²³ Wate ia da bubuna be i ‘egu‘eguia pokupaine manuna, ta sewasewa boasi: ta ia da siaioa esaoori ‘ina ‘ebesiaioaega, bodao ‘idi Ieoba ‘i gwae.

²⁴ Bodao ‘idi Ieoba ni‘atu ‘i ona‘upa‘upa, ‘i gwae. Ona ‘ai‘aila nadigega ia nuanua, nadigega ‘i da apwesa; ta nadigega ia nuena, nadigega ‘i da tooro:

²⁵ Goma Asiria ia da weari ‘igu ‘asa ‘enaia, ta ‘igu ‘oea ‘edia ia da ‘aiaina: ga ‘ina ‘ebe‘ara ‘i da pilisinedi, ta ‘ana ‘a‘ara ‘aradiega ‘i da tauiawa.

²⁶ Gete loina nina ia loina bare‘u maibo‘ana ‘enaia: ta gete nima nina ia iasitoto ‘ebeloina iauiaudi ‘edia.

²⁷ Bodao ‘idi Ieoba ni‘atu ‘i loina ta ‘enega, ta iaita ‘i da li‘oena? ta nimana ‘i iasitoto, ta iaita ‘i da ‘ilenawa?

²⁸ Iakwara nina ‘enega Aasa king ‘i kwaia ona gete ‘i apwesa.

²⁹ Pilisitia ie, gea‘abo ‘u guausoara, maibo‘aio, keweliwelili ‘i unumu ‘i elasena manuna: moata ramunega moata darerena ‘i da apwesa ta ‘enega, ta uana ‘i da moata ‘ara‘arata taetae.

³⁰ Ta gomabeso ‘ina tomatua ‘i da ‘e‘ai, ta nanaewa ‘i da ‘eno bobo‘ana; ta ramuio ia da loemwawasi botanega, ta ‘imu tupwa ‘i da esilae.

³¹ ‘U da dedoi, ‘ebe rugu ie; ‘u da bwau, ‘asa ie; Pilisitia, ni‘atu ‘u doga, maibo‘aio; ‘asu ‘i apwesama iaaratega ta ‘enega, ta nigea ‘e bweu ‘i tooro tebweuna ‘ina tutao aseiadi ‘ediega.

³² Ga toase ‘e bweu ‘i da ona limana ‘ebeloina ‘ina etuetune ‘enaia? Ieoba Siona ‘ana ‘autui ‘i sa‘ui, ta ‘ena ‘ina tomota ‘elo‘uiadi si da denadena.