Isaia 13 - Buki Tabu Lowaenei 1919

‘UPWA 13.

¹ Babulonia ‘ana ona, tauna Isaia Amosa natuna i ‘itena.

² Doe wa da sa‘u tu‘e ‘oea daisinamo ‘enaia, ‘enami wa da ‘inana toila ‘edia, wa da lo‘uio, be ‘enega to esaesa ‘idi ‘awa ‘ena si da rugu.

³ ‘Igu tabutabudi ni‘atu ia onedi, tamo, ‘igu tai waiwai ni‘atu ia bwauiedi ‘igu gamwasoara manuna, tuga ‘igu to guausoara ‘igu waiwai manuna.

⁴ Pwaru ‘idi dududu ‘oeao ‘edia, nadigega tomota sinabwadi! ‘asa ‘adi ‘ebeloinao si egogona ‘idi toitoila ‘ana dududu! Bodao ‘idi Ieoba boda ‘i egogonena saia manuna.

⁵ ‘Asa ‘edasorega si mai, garewa esenana ‘ebelosaroniega, tuga Ieoba, ta ‘ina nuaiaiiai ‘ana ‘ebelosaiao, sabi giesaoora ‘asa maibo‘ana.

⁶ Wa da dedoi toila; Ieoba ‘ina asiata serabedaia ta ‘enega; na‘ieana saoora To Ewaiwai Sana ‘enega ‘i da mai.

⁷ Ta ‘enega nima iauiauna si da tabataba, ta tai ‘atena iauiauna ‘i da doga:

⁸ Ta si da nua‘owana; elo‘uia ta dedo si da giiaidi; si da elo‘uia ‘atua waine i ‘edaedadama: si da nua‘owana ‘e bweuna ‘e bweuna ‘enaia; maninidi si da awe sabelulu maninidi.

⁹ Wa ‘ita, Ieoba ‘ina asiata ‘i memai, gie‘elo‘uia, egamwagamwagu ta gamwasoara didiga ‘ediega; be ‘asa ‘ana waborebore ‘i da sa‘u, ta to to‘umalidi ‘i da gisawaridi ‘enega.

¹⁰ Garewa ‘ina kwadimao ta ‘ina ‘ebema‘edana gea‘abo ‘idi ma‘edana si da iageiage ta ‘enega; sinara ‘i da eguguioi ‘ina apwesa ‘enega, ta nawarae gea‘abo ‘ina ma‘edana ‘i da gisae.

¹¹ Ta gabura ia da ununa ‘idi to‘umalina manuna, ta to to‘umalidi ‘idi bubuna bokobokona manuna; ta to gagasa ‘idi esinasinara ia da loegumwarina, ta to didiga ‘idi gagasa ia da ulamwa‘uta.

¹² Tai ia da bubuna be ‘i bobo‘ana wawasae gola bobo‘ai‘ailina ‘enaia, tuga tai be ‘i bobo‘ana wawasae Opira ‘ina gola ‘esasena ‘enaia.

¹³ Ta ‘enega garewa ia da gidederi, ta bare‘u ‘i da loniu ‘ina esenega, bodao ‘idi Ieoba ‘ina gamwasoara ‘enega, ta ‘ina egamwagamwagu didiga ‘ina asiata ‘enega.

¹⁴ Ta gete ‘i da apwesa, ‘atua kerei si pa‘i, ta ‘atua sipi nigea ‘e bweu tai ‘i egogonena, nadigega si da ‘ila tai ‘e bweuna ‘e bweuna tauna ‘ina tomota ‘edia, ta si da dena tai ‘e bweuna ‘e bweuna ‘ina ‘asa tauna ‘enaia.

¹⁵ Tauna ‘e bweuna ‘e bweuna si lobena si da badi be ‘i da sasa‘a; ta tauna ‘e bweuna ‘e bweuna si ‘ewena i da be‘u sisi‐saiega.

¹⁶ ‘Idi gogama meameadi wate si da ‘ula mwa‘utedi be si da lolelewanedi matadia; ‘idi anua si da ‘oaedi, ta mwanenao si da gito‘umaliedi.

¹⁷ Wa ita, Me Medea ia da giniuiedi be si da tooro ‘edia, taudi sileba nigea si da nuena, ta gola manuna, gea‘abo ‘enega si da guausoara.

¹⁸ Ta ‘adi tupuiao si da eula lelewanedi; ta gamwa uana gea‘abo si da ‘ate‘atenua‘ole‘oleiena; matadi gea‘abo gogama si da lobobo‘anedi.

¹⁹ Ta Babulonia, ‘ebeloinao ‘idi esaesa, me Kalidea ‘idi ‘ebegagasa ‘ana ‘ita bobo‘ana, ‘i da nadigega ‘ena Eaubada Sodoma ta Gomora i ‘ulamwa‘utedi.

²⁰ Gea‘abo ‘e bweu ‘ena ‘i da ‘abi anua, nai epata tomota ga epata‐tomota ‘e bweu ‘ena ‘i da miami: nai goma Arabea ‘ina anua ‘ena ‘i da ‘abi; nai to‐ita‘i‘isi‐sipi ‘idi sipi iau si da e‘enoi ‘enaia.

²¹ Ta kaukaudaisinamo bosasana ‘ena si da ‘eno; ta ‘idi anua si da maa manua didiga ‘ediega; ta ositereti ‘ena si da miami, ta gota me‘olotodi ‘ena si da laulausa.

²² Ta wolipa si da bwau ‘idi anua pa‘ara ‘edia, ta kedewamitawa ‘idi anua esaesa ‘adi ‘ita bobo‘ana ‘edia: ta ‘ana tuta i ‘abe ‘i mema, ta ‘ina asiatao gea‘abo si da mia dudura!