Isaia 12 - Buki Tabu Lowaenei 1919

‘UPWA 12.

¹ Ta asiata gote ‘enega ‘u da ona, Ieoba ie, ‘emuia ia da lokagutoki; lowa ‘u gamwasoara ‘eguia, ga ‘imu gamwasoara i ‘ilawa, ta ‘igu mia bobo‘ana ‘u sa‘una ta ‘enega.

² Wa ‘ita, Eaubada ‘agu ‘etoseana; ia da ‘emisa, ta gea‘abo ia da ‘atesa‘ara; Eaubada Ieoba tauna ‘igu waiwai ta ‘igu wariwari ta ‘enega; ta tauna ni‘atu ‘agu ‘etoseana.

³ Ta ‘enega guausoarega boasi wa da goni ‘etoseana ‘ina wewerupwao ‘ediega.

⁴ Ta asiata gote ‘enega wa da gwae, Ieoba ‘ena wa da ‘awabobo‘ana, ‘ana esana ‘ena wa da bwau, ‘ina guinuao wa da simanedi tomota gamwagamwanidia, wa da ‘inana ‘aene ‘ana esana ‘i miatu‘e.

⁵ Ieoba ‘ena wa da wari; iage bobo‘ai‘ailidi ni‘atu ‘i guinuedi ta ‘enega: iage gete wa da gieapwesa bare‘u maibo‘ana ‘enaia.

⁶ Wa da ona toila ta wa da bwau, ‘oio Siona ‘ana tomi: Iseraela ‘ina Tabu Tebweuna ‘i sinabwa gamwagamwaniio ta ‘enega.