Isaia 11 - Buki Tabu Lowaenei 1919

‘UPWA 11.

¹ Ta Iese ‘arenega bwasila ‘e bweuna ‘i da apwesama, ta nari ‘e bweuna ramunega ‘i da uaua:

² Ta Ieoba iaruiaruana ‘ena ‘i da toa, sinasinapu ta pana‘ita iaruiaruadi, loina ta waiwai iaruiaruadi, mwaramwaratoni iaruiaruana ta Ieoba ‘ana matauta iaruiaruana;

³ Ta ‘ina guausoara ‘i da miami Ieoba ‘ana matauta ‘enaia: ta gea‘abo ‘i da loina matana ‘adi ‘ita ‘atua, nai ‘i da loina tenana ‘adi nono ‘atua:

⁴ Ta bubuna paruparuiega gomabeso ‘i da loinedi, ta bubuna ‘ai‘ailega ‘i da ba‘e ‘asa ‘ana to nuana manudi: ta ‘asa ‘i da ununa ‘awana ‘ina keweliweliliega, ta sopana iawasinega to to‘umalidi ‘i da loemwawasidi.

⁵ Ta bubuna paruparu ‘i da tolobwana ‘ana gadiwana, ta bubuna ‘ai‘aila gamwana ‘ana gadiwana.

⁶ Ta wolipa ‘i da miami lami ma‘ieana, ta lepadi ‘i da ‘eno‘eno gota menonoiana ma‘ieana; ta bulomakau menonoiana ta laione menonoiana ta iapaiapadi menonoiana rererea; ta goama gidarina ‘i da ‘au‘ewedi.

⁷ Ta bulomakau me wainena ta bea si da ‘e‘ai; menonoiadi si da ‘eno egogona: ta laione witi neduna ‘i da e‘ai bulomakau na‘ieana.

⁸ Ta goamasususuna ‘i da eesaesasara kabwakabwaku ‘ina gaula ‘enaia, ta goama gagigagina nimana ‘i da sa‘u moata‐darere ‘ina gaula ‘enaia.

⁹ Gea‘abo si da unuunu nai si da giesaoora ‘igu ‘oea tabu maibo‘ana ‘enaia: bare‘u ‘i da maa Ieoba ‘ina sinasinapu ‘enega, na‘ieana boasiao ora si bodena.

¹⁰ Ta gete ‘i da apwesa asiata gote, Iese ramuna, tauna ‘i tooro tomotaiao ‘adi doe manuna, ‘ebeloinao ‘ena si da ‘ebesa; ta ‘ina ‘ebe‘eiawai‘ata ‘i da esaesa.

¹¹ Ta gete ‘i da apwesa asiata gote, ‘Inapwana nimana ‘i da sa‘u limana ‘e ruena be ‘ina tomota tupwadi ‘i da ‘ewalimedi, taudi si da miami, Asiriega, Aigupitoega be, Patarosega be, Kusega be, Elamega be, Sinaega be, Amatega be, ora saruna ‘ediega be.

¹² Ta doe ‘i da sa‘u tu‘e ‘ebeloinao manudi, ta me Iseraela ‘ina to mia apwesa ‘i da egogonedi, ta me Iuda ‘ina to sawarao ‘i da egogonedi bare‘u tupitupina ‘e ata ‘ediega.

¹³ Eparaima ‘ana e‘ipi‘ipi wate ‘i da sawara, ta taudi Iuda si ‘eiabena si da ‘upwa iauledi: Eparaima gea‘abo ‘i da e‘ipi‘ipi Iuda manuna, ta Iuda gea‘abo Eparaima ‘i da ‘eiaba.

¹⁴ Ta si da taea mwa‘uta me Pilisitia ‘aradi ‘ena ‘ebwaga ‘enaia; rererea bomatu gogamadi si da ‘oaedi: nimadi si da sa‘u Edoma ta Moabe ‘edia; ta Amona natunao si da ematamatana ‘edia.

¹⁵ Ta Ieoba ora Aigupito meiana ‘i da giesaoori; ta iagila ‘ara‘arata ‘enega nimana ‘i da giniuiei Boasi‘awa debanaia, ta ‘i da ununa be ‘i boasidaudau ‘e sebeni, ta ‘i da loina be tai si da rubwarena ‘aedi iadaiadana.

¹⁶ Ta ‘eda sinabwana ‘i da miami ‘ina tomota tupwadi manudi, taudi si miami, Asiriega; nadigega lowa ‘i miami Iseraela manuna asiata ‘enega ‘i tu‘ema ‘asa Aigupitoega.