Isaia 10 - Buki Tabu Lowaenei 1919

‘UPWA 10.

¹ Oioi ‘edia taudi loina nigea paruparu si loinei, ta to ‘etoladi ‘edia taudi si ‘etoladi bokoboko;

² ‘Aene nanaewadi si da ‘iledi etara ‘enega, ta ‘aene ‘igu tomota ‘idi gomabeso ‘idi iage paruparu si da ‘ewa iaulei, be ‘enega kwaburao ‘idi ‘ebe‘oae, ta pesiedao si da bubudi be ‘idi ‘ebegiiaina.

³ Ta toase wa da guinua asiata ‘ebe‘ita ‘enega, ta waborebore ‘enega tauna ‘i da mai ‘edasorega? Iaita ‘ena wa da dena leme manuna? ta mane ‘ena ‘imi esaesa wa da sa‘u?

⁴ Si da ‘opu‘opumo ioniionidi ‘agaraudia, ta si da be‘u to esilae ‘ubunidia. Ga iage maibo‘ana gete ‘i da apwesa ta ‘ina gamwasoara nigea i ‘ilawa, ta nimana ‘i iasitoto ‘ataena.

⁵ Oioi me Asiria, ‘igu gamwasoara ‘ina keweliwelili, guna nina tauna nimanaia ‘igu egamwagamwagu ‘i miami!

⁶ ‘Ebeloina ona besobeso ‘ena ia da etunena, ta ‘igu gamwasoara ‘ina tomota manudi ia da ba‘ena, be gwegwe ‘i da ‘ewa, ta ‘ebe‘oae ‘i da ‘ewa, ta ‘i da ‘aiaidi ‘edaiao sepwaridi ‘atua.

⁷ Ta nigea ‘i nuena nadigega, nai ‘atena nadigega ‘i nuanua; ta ‘atenaia ‘aene ‘i da giesaoora, ta ‘aene ‘ebeloina nigea pu‘epu‘edi ‘i da ‘upwa iauledi.

⁸ ‘I gwae ta ‘enega, ‘Igu ‘inapwanao iauiaudi nigea nai kiniao?

⁹ Kalena nigea nai na‘ieana Kaakemisa? Amata nigea nai na‘ieana Aripada, Samaria nigea nai na‘ieana Damaseko?

¹⁰ Nadigega nimagu tokwarui ‘idi ‘ebeloinao ni‘atu ‘i lobedi, taudi ‘idi goamamea daiadaiagidi si sinabwa sinedi me Ierusalema ta me Samaria;

¹¹ ‘Abo‘agu, nadigega ia guinua ni‘atu Samaria ‘ena ta ‘ina tokwarui ‘edia, gea‘abo nai ia da guinua Ierusalema ‘ena ta ‘ina tokwarui ‘edia?

¹² Ta ‘enega gete ‘i da apwesa, ‘ena ‘Inapwana ni‘atu ‘ina guinua maibo‘ana ‘i bubuna ‘oea Siona ‘ena ta Ierusalema ‘ena, ga Asiria ‘ana king ‘ina ‘ate patuna uana ia da ununa, ta ‘ina gagasa ‘ina esaesa.

¹³ ‘I gwae ta ‘enega, Nimagu ‘ina waiwaiega ni‘atu ia guinuena, ta ‘igu sinasinapuiega; ‘abo‘agu nuanuasabwarenigu ta ‘enega: ta tomotaiao ‘idi rabao ni‘atu ia sa‘u dumedumedi, ta ‘idi oesi ia ‘oaedi, ta taudi ‘ebemi esaesa ‘edia si miamiatoa ia ‘ewamwa‘utedi tai waiwai na‘ieana:

¹⁴ Ta nimagu tomotaiao ‘idi gwegwe ‘i lobena newa ‘atua; ta nadigega ‘e bweu pou si pilisinedi ‘i egogonedi, bare‘u maibo‘ana ia egogonena; ta nigea ‘e bweu papena ‘i giniuiena, nai ‘awa ‘i gibari, nai ‘i gwane.

¹⁵ ‘Ila ‘i da ona gagasa nai tauna ‘enega ‘i tara kaiwe ‘enaia? Daba ‘i da ‘awa sinabwa‘ena tauna ‘i gidederina ‘enaia? ‘atua keweliwelili taudi si gilagasina ‘i da giniuiedi, nai ‘atua guna tauna nigea kaiwe ‘i da gilagasina.

¹⁶ Ta ‘enega ‘Inapwana, bodao ‘idi ‘Inapwana, ‘ebewakaka ‘i da etunena ‘ina iapaiapadi ‘edia; ta ‘ina esaesa ‘ubunaia ‘arata nadigega ‘awe ‘ina ‘ara‘arata si da loe‘abia.

¹⁷ Ta Iseraela ‘ina ma‘edana ‘i da e‘awe manuna, ta ‘ina Tabu Tebweuna sabelulu manuna: ta ‘ina kaiwe taritaridiao ta ‘ina kwakwakwarao ‘i da ‘arasina ta ‘i da loegumwarina asiata ‘e bweuna ‘enega.

¹⁸ Ta ‘ina o‘ai ‘ina esaesa, ta ‘ina bagura ua loebwaina ‘ina esaesa, ‘i da ‘arasidi, iaruiaruana ta oona ruarua: ta ‘i da nadigega tuta ‘enega to ‘a‘ara doe ‘i mwawamwawasa.

¹⁹ Ta ‘ina o‘a ‘ina kaiwe si da pu‘epu‘e, be ‘enega goama ‘i da ‘etoladidi.

²⁰ Ta gete ‘i da apwesa asiata gote ‘enega, ‘aene Iseraela tupwana, ta taudi susu Iakobo si denadena, gea‘abo wate tauna ‘i unuunudi ‘ena si da ‘emisa; ta Ieoba, Iseraela ‘ina Tabu Tebweuna, tauna ‘ena si da ‘emisa ‘ai‘aila.

²¹ Tupwana si da ‘ilama, tuga Iakobo tupwana, Eaubada waiwai ‘enaia.

²² ‘Abo ‘imu tomota Iseraela si eora kaukauna na‘ieana ta ‘enega, ‘ediega tupwana tuga si da ‘ilama: loegumwara ‘i da apwesa ‘ai‘aila, ‘i da maa‘apu‘apu bubuna paruparuiega:

²³ Losaroni, ta tauna ‘i loina pa‘arina, ‘Inapwana, bodao ‘idi Ieoba, ‘i da bubuna ta ‘enega bare‘u maibo‘ana gamwagamwanaia.

²⁴ Ta ‘enega gete nadigega ‘Inapwana ‘i gwae, bodao ‘idi Ieoba, ‘Igu tomota ie, Siona ‘ena wa miami, gea‘abo goma Asiria nina wa da matautena: ‘abo keweliweliliega ‘i unuio, ta ‘ina guna ‘i gilagasi matamuia, Aigupito ‘ina bubuna ‘atua.

²⁵ Tuta gidarina tuga ta ‘enega, ta egamwagamwagu ‘i da apwesa ai‘aila, ta ‘igu gamwasoara, ‘idi saoora ‘enega.

²⁶ Ta bodao ‘idi Ieoba ‘ebesapi ‘i da giniuie matanaia, nadigega Midiana ‘ana unua nina ‘enega gurewa Oreba ‘enaia; ta ‘ina keweliwelili ‘i da eora debanaia, ta ‘i da gilagasina Aigupito ‘ina bubuna ‘atua.

²⁷ Ta gete ‘i da apwesa asiata gote ‘enega, ‘ina bwagila ‘aramuiega ‘i da tauia, ta ‘ina ‘ebe‘a‘ara ‘otomuiega, ta ‘ebe‘a‘ara nina ‘i da saoora bunama manuna.

²⁸ Ni‘atu ‘i mai Aiata ‘enaia, ni‘atu Migarona ‘i rubwarena; Mikamasa ‘ena ‘ina bwagila ‘i sa‘ui:

²⁹ ‘Eda gilelena ni‘atu si taonina; Geba ‘ena si miami: Rama ‘i dededera; Saula ‘ina Gibea ni‘atu ‘i dena.

³⁰ Galima natuna me wainena ie, ‘Enamuiega ‘u da bwau toila! Lasisia ie! ‘u da nono! ‘Oio Anatota gomabeso ie!

³¹ Madamena i ‘e to dena: Ta to mia Gebima si egogonedi be si dedena.

³² Asiata gete tuga ‘i da miakabo Noba ‘ena; nimana ‘i giniuiena Siona natuna me wainena ‘ina ‘oea ‘enaia, Ierusalema ‘ina ‘oea.

³³ Wa ‘ita, ‘Inapwana, bodao ‘idi Ieoba, kaiwe narina garudi ‘i da ‘upwa iauledi didigega: ta taudi ‘adi ketosora ‘i lo‘etana ‘i da tara mwa‘utedi, ta to mia tu‘e si da mia mwa‘uta.

³⁴ Ta mitawa o‘eninao ‘i da tara mwa‘ute kainumuiega, ta Lebanona ‘i da be‘u to ewaiwai ‘enega.