Iona 4 - Buki Tabu Lowaenei 1919

‘UPWA 4.

¹ Ta Iona nuana ‘i to‘umali sinabwana manuna, ta ‘i gamwasoara.

² Ta Ieoba ‘ena i ‘awanoi, ta ‘i gwae, Ia sideio, Ieoba ie, gete nigea ‘igu ona nai, ‘ena ‘igu ‘asaia ia miami? Ta ‘enega ia dena manini Tasisa ‘enaia: ia mwaratoni ta ‘enega ‘aene ‘oio Eaubada oboboma, u ‘atenua‘ole‘ole wawasae, gamwasoara manuna ‘u so‘iso‘i, nua‘ole‘oleiega ‘u eiau, ta to‘umalina manuna nuaio i ‘ebunina.

³ Ta ‘enega gete tuga, Ieoba ie, ia sideio, iawasigu ‘eguiega ‘u da ‘ewai; ‘i bobo‘ana wawasae ‘eguia ia da mwawasa ta gea‘abo ia da bobo‘ana.

⁴ Ta Ieoba ‘i gwae, ‘Imu gamwasoara ‘i bobo‘ana nai?

⁵ Ga Iona ‘asega ‘i apwesa, ta ‘asa deideinaia sinara ‘i sae ‘enaia ‘ena ‘i miatoa, ta ‘ena ‘ina ioeioe i ‘abina, ta ‘agaraunaia iauiaukwanaia ‘i miatoa, be ‘enega ‘i da ‘ita to‘ase ‘i da apwesa ‘asa ‘enaia.

⁶ Ta Ieoba Eaubada mwanamwana ‘e bweu ‘i bubuna, ta ‘i gietabwena Iona debanaia, be ‘i da ‘e debana iauiaukwina, be ‘enega ‘i da ‘etoseena ‘ina miamia to‘umalina ‘enega. Ga Iona ‘i uiawana sinabwana mwanamwana manuna.

⁷ Ta Eaubada didimwana ‘e bweu ‘i bubuna ‘ena i ‘uli‘ulita gonagonaia, ta mwanamwana i ‘enina ga i ‘oaperu.

⁸ Ta gete ‘i apwesa, ‘ena sinara ‘i tu‘e, ga Eaubada bomatu iaiiai ‘i bubuna; ta sinara Iona debana ‘i lopisarina, ga ‘i tai, ta manuna tauna ‘i sida ‘aene ‘i da mwawasa, ta ‘i gwae, ‘I bobo‘ana ‘eguia ia da mwawasa ta gea‘abo ia da bobo‘ana.

⁹ Ta Eaubada Iona ‘i eona, Sawesawemuia mwanamwana manuna ‘u da gamwasoara? Ta ‘i gwae, Sawesaweguia ia da gamwasoara ga mwawasa ‘enaia.

¹⁰ Ta Ieoba ‘i gwae, mwanamwana u ‘atenua‘ole‘oleiena, ta nigea manuna ‘u guinua, nai ‘u gietabwena; tauna boiboi ‘e bweuna ‘enega ‘i tabwa, ta boiboi ‘e bweuna ‘enega ‘i mwawasa:

¹¹ Ta ‘abo‘agu gea‘abo Ninebe ia da ‘ate‘atenua‘ole‘oleie, ‘asa sinabwana gote; ‘ena tomota si miami ‘adi iau ‘i pilisinena ‘e wan anaredi ta tweniti tausana taudi nigea kapekapeana ataidi nai gegeumidi si da ‘ita ‘esi‘esinua; ta wate bulomakau iauiauna?