Iona 3 - Buki Tabu Lowaenei 1919

‘UPWA 3.

¹ Ta Ieoba ‘ina ona ‘i mai Iona ‘ena ‘e ruena, ‘i gwae,

² ‘U da tooro, Ninebe ‘ena ‘u da tauia, ‘asa sinabwana gote, ta guguia ia da ‘eonaio ‘ena ‘u da bwau.

³ Ga Iona ‘i tooro, ta Ninebe ‘ena ‘i tauia, na‘ieana Ieoba ‘ina ona. Ta Ninebe ‘asa sinabwana Eaubada matanaia, asiata ‘e toi ‘ana tauia.

⁴ Ta Iona ‘i enugana be ‘asa ‘ena ‘i da rugu asiata ‘e bweuna ‘ana tauia, ta ‘i bwau, ta ‘i gwae, Asiata ‘e poti si miami, ga Ninebe ‘i da saoora.

⁵ Ta to mia Ninebe Eaubada si iarena; ta edidigura si loguguia‘ena, ta ‘oama koausa si ‘e‘otena, me sinabwadi ‘ediega ta me gidaridi ‘edia.

⁶ Ta ‘ana tetera Ninebe ‘Ana king ‘i nonona, ta ‘ina ‘ebemianega ‘i tooro, ta ‘ana tara‘apwara ‘i sa‘u mwa‘utena, ta ‘oama koausega ‘i bwasena, ta karikau ‘ena ‘i miatoa.

⁷ Ta ‘i guguia ta Ninebe maibo‘anega ‘i ona king ta ‘ina ‘inapwanao ‘idi loinega, ‘i gwae, Tomota nai iobai, bulomakau nai sipi, gea‘abo ‘e bweu masura ‘i lotoo: gea‘abo si ‘e‘ai, nai boasi si numanuma:

⁸ Ta si da bwasa ‘oama koausega, tomota ta iobai ruarua, ta Eaubada ‘ena si da bwau toila: tamo, ‘e bweuna ‘e bweuna ‘ina bubuna to‘umalinega ‘i da sana‘ila, ta bubuna didiga si giiaina ‘enega.

⁹ Iaita ‘i mwaratoni nai Eaubada ‘i da sana‘ila ta ‘i da nuaebuni, ta ‘ina gamwasoara didiga ‘enega ‘i da sana‘ilama, be ‘enega gea‘abo ta da saosaoora?

¹⁰ Ta Eaubada ‘idi guinua i ‘itena, ‘aene ‘idi bubuna to‘umalina ‘enega si sana‘ila; ta Eaubada to‘umalina nina manuna nuana i ‘ebunina, tauna ‘i ona ‘aene ‘i da guinua ‘edia; ta nigea ‘i guinuena.