Iona 2 - Buki Tabu Lowaenei 1919

‘UPWA 2.

¹ Ga Iona iana gamwanega ‘i sidasida Ieoba ‘ina Eaubada ‘enaia.

² Ta ‘i gwae, ‘Igu elo‘uia ‘enega Ieoba ‘ena ia bwau, Ta ‘i ona limana ‘eguia; Seola gamwanega ia bwau, Ta ‘enagu ‘u nonona.

³ Ni‘uia u ‘ulamwa‘utegu ta ‘enega, ora gamwagamwanidia, Ta murua ‘i mia sakowasiegu; ‘Imu lepo ta ‘imu lisu iauiauna debaguia si taotaona.

⁴ Ta ia gwae, matamuiega si ‘ula apwesegu; Ta ‘imu anua tabu ‘ena ia da dunedune limana.

⁵ Ora ‘i sakowasiegu, tamo iaruiaruagu ‘enaia; Ni‘uia ‘i mia sakowasiegu; Douna debagu waduna.

⁶ ‘Oea siasiadi ‘edia ia mwa‘utawa; Gabura ma‘ana ‘auboda ‘i bodegu ataia: Ta gaula ‘enega iawasigu u ‘ewa tu‘eiena, Ieoba ie ‘igu Eaubada.

⁷ ‘Ena iaruiaruagu ‘i mwawasa soraguia, Ieoba ia nua‘i‘isina: Ta ‘igu sidasida ‘emuia ‘i ruguma, ‘imu anua tabu gamwanaia.

⁸ Taudi iage besobeso makabodi si nua‘i‘isidi Taudi ‘idi nua‘ole‘ole si e‘idi‘idiena,

⁹ Ta ‘abo‘agu lokagutoki ‘enanega ia da taria ‘emuia; Iage ni‘atu ia ona‘upa‘upa‘ena ia da ‘ebwaeae. Ieoba ‘enega ‘etoseana ‘i mai.

¹⁰ Ta Ieoba iana ‘i eonena, ga Iona ‘i maiwena bwa‘a iadaiadana ‘enaia.