Esiteri 8 - Buki Tabu Lowaenei 1919

‘UPWA 8.

¹ Asiata gote king Aasaberosa Amana me Iuda ‘adi tarauwara ‘ina anua Esiteri kuini ‘ena i ‘ebwaea‘ena. Ta Modekai king matanaia ‘i mai; tauna toesina ni‘atu Esiteri ‘i simanena ta ‘enega.

² Ta king ‘ana nimapasapasa ‘i alolona, tauna Amana ‘enega i ‘ewe‘ewena, ta Modekai ‘ena i ‘ebwaea‘ena. Ta Esiteri Modekai ‘i sa‘una be Amana ‘ina anua ‘i da loinei.

³ Ta Esiteri ‘i ona limana king matanaia, ta ‘aenaia ‘i be‘u, ta mataserunega ‘i sidena ‘aene Amana goma Agagi ‘ina to‘umalina ‘i da ‘ewaiaulei, ta ‘ina wasegigi ‘i wasewasegigi me Iuda manudi.

⁴ Ga king ‘ina guna gola ‘i enimasusuiena Esiteri ‘enaia, Ga Esiteri ‘i tooro, ta king matanaia ‘i tooro.

⁵ Ta ‘i gwae, ‘Abo king ‘i nuanuana, ta ‘abo matanaia oboboma ia lobena, ta iage nina king matanaia ‘ana ‘ita ‘i bobo‘ana, ta ‘abo‘agu ‘agu ‘ita bobo‘ana matanaia, si da ‘etoladi be leta nidi Amana Amedata goma Agagi natuna ‘i wasegigiedi si da gibunidi, taudi leta nidi i ‘etoladidi be me Iuda king ‘ina esena iauiauna ‘edia si miami si da loemwawasidi:

⁶ mwa‘adega ia da e‘arama‘i‘itanegu be to‘umalina ‘i da mai ‘igu tomota ‘edia be ia da ‘itena? nai mwa‘adega ia da e‘arama‘i‘itanegu be ‘igu susu ‘idi saoora ia da ‘itena?

⁷ Ga king Aasaberosa Esiteri kuini ta Modekai goma Iuda ‘edia ‘i ona, Wa ‘ita, Amana ‘ina anua Esiteri ‘ena ia ‘ebwaea‘ena, ta tauna ni‘atu si loesanena kaiwe ‘enaia, me Iuda nimana ‘edia ‘i sa‘usa‘una ta ‘enega.

⁸ Wate me Iuda manudi wa da ‘etoladi, ‘atua wa nuanuana, king ‘ana esanega, ta king ‘ana nimapasapasa ‘enega wa da tuepa‘i: ‘etoladi si ‘etoladina king ‘ana esanega, ta si tuepa‘i king ‘ana nimapasapasega, gea‘abo ‘e bweu ‘i gibuni ta ‘enega.

⁹ Ga king ‘ina to‐‘etoladiao si bwauiedi tuta gote, nawarae ‘etonina ‘enega, tauna nawarae Sibana, ‘ana asiata ‘e tweniti teri nina; ta si ‘etoladi na‘ieana iage iauiauna Modekai ‘i loina me Iuda ‘edia, ta to lemeiao ‘edia, ta esena ‘Inidia ‘enega ga Aitiope ‘idi gabanao ta ‘idi ‘inapwanao, esena ‘e wan anaredi ta tweniti sebeni, esena ‘e bweuna ‘e bweuna ‘enaia na‘ieana ‘ana ‘etoladi, ta tomota ‘ebweuna ‘ebweuna ‘enaia na‘ieana ‘enadi, ta me Iuda ‘edia ‘idi ‘etoladi nadigega, ta ‘enadi nadigega.

¹⁰ Ta king Aasaberosa ‘ana esanega i ‘etoladi, ta king ‘ana nimapasapasa ‘enega ‘i tu‘epa‘iiena, ta leta ‘i etunedi topiliiareiare ‘ediega ose ‘edia si geru, ose to pili dididiga ‘edia si geru ose nidi king ‘ina guinua si guiguinue, ose esaesa natudiao:

¹¹ ‘Enega king ‘i tagwara me Iuda ‘asa iauiauna ‘edia si miamiana ‘aene si da egogonama, ta iawasidi manuna si da tooro, be tomota ta esena ‘aene si da unudi, ‘idi waiwai iauiauna si da loesawara, si da unudi, si da loemwawasidi, wate natudiao be ‘idi iineao, ta si da ‘oaedi,

¹² Asiata ‘e bweuna tuga ‘enega king Aasaberosa ‘ina esena iauiauna ‘edia, tauna nawarae ‘e twelu nina ‘ana asiata ‘e tatini nina, tauna nawarae Adara.

¹³ ‘Etoladi nina, ‘aene loina si da gieapwesa esena ‘e bweuna ‘e bweuna ‘enaia, si simana tomota iauiauna ‘edia, ta ‘aene me Iuda si da iamwaiamwa ‘ai‘aila be ‘enega asiata gote ‘adi tarauwarao ‘edia si da e‘isa.

¹⁴ Ta ‘enega topiliiareiare taudi ose pilipili didigadi king ‘ina guinua si guiguinue ‘edia si geru ga si apwesa, king ‘ina loina ‘i lomaniniedi ta ‘i loniuiedi ta ‘enega; ta loina si gieapwesena anua Susa ‘enaia.

¹⁵ Ta Modekai king matanega ‘i apwesa ma‘ana ‘oama esaesa karakarawina ta wakewakekena, ta ma‘ana peaula gola sinabwana, ta ma‘ana tara‘apwara kaleko matagidarina ta bweabwearina: ta ‘asa Susa ‘i bwau ta ‘i eguausoara.

¹⁶ Me Iuda ma‘idi ma‘edana be uiawana, ta ma‘idi guausoara be ‘amaiaba.

¹⁷ Ta esena ‘e bweuna ‘e bweuna ‘enaia, ta ‘asa ‘e bweuna ‘ebweuna ‘enaia, ‘ena king ‘ina ona ta ‘ina loina ‘i mai, ‘ena me Iuda ‘idi uiawana be guausoara, sagari be asiata bobo‘ana. Ta esena nina ‘ina tomotaiao ‘ediega iauiaudi si e goma Iuda; me Iuda ‘adi matauta ‘edia ‘i be‘u ta ‘enega.