Esiteri 7 - Buki Tabu Lowaenei 1919

‘UPWA 7.

¹ Ga king ta Amana si mai sabi ‘e‘ai Esiteri kuini ma‘enao.

² Ta oine ‘ana ‘e‘ai ‘ana asiata ‘e ruena ‘enega king ‘i ona limana Esiteri ‘ena, To‘ase ‘imu ‘awanoi, kuini Esiteri? ta ia da ‘ebwaeio: ta to‘ase ‘imu sidasida? si da guinuena ga ‘ebeloina ‘ana ‘upwaruena.

³ Ga Esiteri kuini ‘i onalimana ta ‘i gwae, King ie, ‘abo matamuia oboboma ia lobena, ta ‘abo king ‘i nuanuana, iawasigu ‘u da ‘ebwaegu ‘igu ‘awanoiega, ta ‘igu tomota ‘igu sidesidega:

⁴ ni‘atu si gimwaniema ta ‘enega, ‘abo‘agu ta ‘igu tomota, be ‘a da saoora, ‘a da esilae, be ‘a da mwawasa. Ta ‘abo si gimwaniema be ‘a da e ioniionina me‘olotoma ta ‘a da ‘e ioniionina me wainema, ‘abo ia da ‘ara enono, ta ‘ama tarauwara nigea kapekapeana iage king ‘i da loseena ‘i da e‘isa.

⁵ Ga king Aasaberosa ‘i gwae ta Esiteri kuini ‘ena ‘i ona, Iaita tauna, ta mwa‘o ‘i miami, tauna ‘atenega ‘i opa‘ara be ‘i guinua nadigega?

⁶ Ta Esiteri ‘i gwaegwae, Tarauwara ‘e bweuna ta tonua‐to‘umalina ‘e bweuna, tauna Amana to‘umalina gete. Ga Amana ‘i matauta king be kuini matadia.

⁷ Ta king ‘ina gamwasoarega ‘i tooro oine ‘ana ‘e‘ai ‘enega ta anua ‘ana bagura ‘ena ‘i tauia: ta Amana ‘i tooro be iawasina manuna ‘i da ‘awanoi Esiteri kuini ‘enaia; i ‘itena ta ‘enega ‘aene king iage to‘umalina ‘i da loina manuna.

⁸ Ga king anua bagura ‘enega i ‘ilama oine ‘ana ‘e‘ai ‘ana sena ‘enaia; ta Amana ni‘atu ‘ebe‘eno Esiteri ‘ena ‘i miami ‘ena ‘i be‘u. Ga king ‘i gwae, Mataguia anuaia kuini ‘i didigena nai? Ona nina king ‘awanega ‘i apwesa, ga Amana maninina si waduna.

⁹ Ga Abona, tauna eunaka ‘e bweuna king matanaia, ‘i gwae, Wate ‘ita, kaiwe nina ‘ana ‘etosora kiubita e pipiti, tauna Amana ‘i guinuena Modekai manuna, tauna ‘i ona bobo‘ana king manuna, kaiwe nina Amana ‘ina anuaia ‘i tooro. Ta king ‘i gwae, ‘Ena wa da loesanena.

¹⁰ Ga Amana si loesanena kaiwe nina ‘enaia tauna ‘i guinuena Modekai manuna. Ga king ‘ina gamwasoara ‘i gumwara.