Esiteri 6 - Buki Tabu Lowaenei 1919

‘UPWA 6.

¹ Boiboi nina king nigea ‘i da ‘enomwataia; ta ‘i loina be ‘ebenua‘i‘isiao ‘adi buki, iage iauiauna ‘adi buki si da me‘ena, ta king matanaia si sawedi.

² Ta ‘ena si loba ‘etoladi gete, ‘aene Modekai ‘i simana Bigatana ta Teresa manudi, king ‘ina eunaka ‘e rua, taudi ‘eberugu ‘adi to‐‘ita‘i‘itao ‘ediega, lowa ‘aene king Aasaberosa si ‘ebesa be si da ununa.

³ Ta king ‘i gwae, To ‘amaiaba ta to esaesa ni‘atu si guinua Modekai ‘enaia iage gete manuna? Ga king ‘ina toguinuao ‘ena si guiguinua si gwae, Nigea ‘e bweu iage si guinua manuna.

⁴ Ta king ‘i gwae, Iaita anua ‘eberugu ‘enaia? Ta Amana king ‘ina anua ‘ana ‘eberugu apwesaia ‘ena ‘i mai, be ‘enega king ‘i da eona be Modekai ‘i da loesanena kaiwe ni‘atu manuna ‘i guinuena ‘enaia.

⁵ Ta king ‘ina to‐guinuao si eonena, U ‘ita, Amana ‘i tootooro anua ‘eberugu ‘enaia. Ta king ‘i gwae, ‘I da ruguma.

⁶ Ga Amana ‘i ruguma. Ta king ‘i eonena, To‘ase ta da guinua tai king ‘i nuanuana ‘i da ‘amaiabena ‘enaia? Ta Amana ‘atenega ‘i gwaegwae, Iaita nai king ‘i nuanuana ‘aene ‘i da ‘amaiabena wawasae ‘eguia?

⁷ Ta Amana king ‘i eonena, Tai nina king ‘i nuanuana be ‘i da ‘amaiabena,

⁸ ‘Oama esaesa king ‘ana ‘ote‘otena si da me‘ei, ta ose king ‘ena ‘i gerugeru, ta peaula esaesa debanaia si sa‘usa‘u:

⁹ ta ‘oama ta ose king ‘ina ‘inapwana esaesa ‘e bweuna si da ‘ebwaeae nimanaia, be ‘enega tai nina king ‘i nuanuana ‘i da ‘amaiabena si da e‘oamena, ta si da loina be ose ‘ena ‘i da geru ta ‘asa ‘ana ‘eda ‘ena ‘i da tautauia, ta matanaia ‘i da bwau, Gete nadigega si da guinua tai nina king ‘i nuanuana ‘i da ‘amaiabena ‘enaia.

¹⁰ Ga king ‘i ona Amana ‘ena, ‘U da lomanini, ta ‘oama ta ose ‘u da ‘ewa, nadigega ‘u ona ni‘atu, ta nadigega ‘u da guinua Modekai goma Iuda ‘enaia, tauna king ‘ina ‘awa ‘ena ‘i miatoa: iage iauiauna u ‘inanena ni‘atu gea‘abo ‘e bweu ‘u da nuanuapupura.

¹¹ Ga Amana ‘oama ta ose i ‘ewedi, ta Modekai ‘i e‘oamena, ta ose ‘enaia ‘i egeruna ta ‘i tauiena ‘asa ‘ana ‘eda ‘enaia, ta matanaia ‘i bwau, Gete nadigega si da guinua tai nina king ‘i nuanuana ‘i da ‘amaiabena ‘enaia.

¹² Ta Modekai i ‘ila limana king ‘ina ‘awa ‘enaia. Ta ‘Amana ‘i lomanini ‘ina anuaia, ‘i dedoi ta debana ‘i bwasena.

¹³ Ta Amana iage iauiauna ‘ena si apweapwesa mwanena Seresa ta gosenao iauiaudi ‘edia i ‘esimanedi. Ga ‘ina to‐sinasinapuiao ta mwanena Seresa ‘ena si ona, ‘Abo Modekai, tauna matanaia ni‘atu ‘u enugana be ‘u bebe‘u, ‘abo tauna me Iuda ‘idi susu ‘enega gea‘abo sa‘i ‘ena ‘u da ewaiwai, ta matanaia ‘u da be‘u.

¹⁴ Ta ma‘enao si gwaegwae, ga king ‘ina eunakao si mai, ta si lomanini ga Amana si ‘au‘ewenama ‘e‘ai nina Esiteri ni‘atu ‘i sa‘u ‘enaia.